ទំនាស់ដីធ្លីមួយកន្លែងនៅខេត្តរតនគីរីឈានដល់ការប្រើកងកម្លាំងប្រដាប់អាវុធ
ដីចម្ការកៅស៊ូនៅស្រុកអូរជុំ ខេត្តរតនគីរី ទំហំប្រមាណជា២ពាន់ហិកតា ធ្វើឱ្យមានការប្រឈមមុខដាក់គ្នា រវាងប្រជាពលរដ្ឋ៣០០គ្រួសារ នៅឃុំអូរជុំ និងក្រុមហ៊ុនចិនឈ្មោះ ហ្វីល រ៉ាប់ប៊ើ លីមីធីត។ ការប្រឈមមុខ ដែលឈានដល់ការប្រើប្រាស់កម្លាំងប្រដាប់អាវុធ ដើម្បីរុះរើលំនៅដ្ឋានរបស់ប្រជាពលរដ្ឋ តាមអំណាចសាលក្រមតុលាការខេត្ត ត្រូវបានរម្ងាប់ទៅវិញ បន្ទាប់ពីប្រជាពលរដ្ឋប្រឆាំងតបត ហើយអាជ្ញាធរមូលដ្ឋានសន្យាដោះស្រាយវិវាទនោះដោយសន្តិវិធី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ប្រជាពលរដ្ឋប្រហែល៧០០នាក់ នៅខេត្តរតនគីរី បានលើកគ្នាប្រឆាំងនឹងការចុះរុះរើលំនៅដ្ឋានរបស់ខ្លួន ដែលស្ថិតក្នុងឃុំអូរជុំ ស្រុកអូរជុំ ដោយកងកម្លាំងប្រដាប់អាវុធ នាព្រឹកថ្ងៃព្រហស្បតិ៍ ទី២២ ខែឧសភា។ នេះជាការប្រឈមមុខដាក់គ្នា ដែលហៀបនឹងផ្ទុះអំពើហិង្សា នៅក្នុងការអនុវត្តសាលក្រមរបស់តុលាការខេត្តរតនគីរី ដែលបានសម្រេចប្រគល់ដីចម្ការកៅស៊ូទំហំប្រមាណជា២ពាន់ហិកតា ទៅឱ្យក្រុមហ៊ុន ហ្វីល រ៉ាប់ប៊ើ លីមីធីត។
ការអនុវត្តសាលក្រម ដោយកម្លាំងប្រដាប់អាវុធ ត្រូវបានអាក់ខានទៅវិញ ដោយសារប្រជាពលរដ្ឋ ប្រហែល១០២គ្រួសារ ដែលបានតាំងទីលំនៅលើដីចម្ការកៅស៊ូនោះជាយូរមកហើយ មិនព្រមចាកចេញពីលំនៅដ្ឋាន ហើយលើកដើមឈើមករាំងផ្លូវពីទីរួមខេត្តរតនគីរីទៅស្រុកអូរជុំ។ ជម្លោះថ្ងៃនេះបានកើតឡើង បន្ទាប់ពីអាជ្ញាធរបានរុះរើខ្ទមរបស់ប្រជាពលរដ្ឋចំណូលថ្មីប្រហែល២០០គ្រួសារផ្សេងទៀត កាលពីថ្ងៃទី២១ ខែឧសភា។
ដីចម្ការកៅស៊ូនោះ ពីដំបូងឡើយ ជាដីរបស់រដ្ឋ ហើយរដ្ឋបានប្រគល់ឱ្យក្រុមហ៊ុនតាយសេងវិនិយោគ។ ក្រោយមក ក្រុមហ៊ុន ហ្វីល រ៉ាប់ប៊ើ លីមីធី បានទទួលសិទ្ធិពីរដ្ឋាភិបាល ដើម្បីធ្វើអាជីវកម្មបន្ត ពីក្រុមហ៊ុន តាយសេង។
ប៉ុន្តែការផ្តល់ដីសម្បទានសេដ្ឋកិច្ចនេះត្រូវបានធ្វើឡើង ដោយជាន់លើចម្ការកៅស៊ូគ្រួសាររបស់ប្រជាពលរដ្ឋប្រមាណ១០២គ្រួសារ។ ក្នុងចំណោមនោះ គ្រួសារខ្លះបានអាស្រ័យផលលើទីតាំងនោះ តាំងពីទស្សវត្សរ៍ឆ្នាំ១៩៦០ ហើយគ្រួសារខ្លះទៀតបានចាប់ផ្តើមតាំងពីឆ្នាំ១៩៩៤។
ក្រៅពីនេះ ប្រជាពលរដ្ឋប្រហែល២០០គ្រួសារក្រោយ ដែលមកពីខេត្តកំពង់ចាម ព្រៃវែង និងបាត់ដំបង ជាដើម ហើយដែលត្រូវអាជ្ញាធររើខ្ទមចោលនោះ ទើបតែចូលតាំងទីនៅលើដីនោះ អំឡុងពេលឃោសនាបោះឆ្នោតជ្រើសរើសតំណាងរាស្ត្រឆ្នាំ២០១៣ប៉ុណ្ណោះ។
មិនមានអំពើហិង្សាណាមួយកើតឡើងគួរឱ្យកត់សម្គាល់ទេ ក្រៅតែពីការចាប់ខ្លួនជាពលរដ្ឋ២នាក់ដាក់ក្នុងឡាន បម្រុងដឹកចេញទៅ ប៉ុន្តែប្រជាពលរដ្ឋផ្សេងទៀតបានដណ្តើមអ្នកត្រូវចាប់ខ្លួននោះបានមកវិញ។
ក្រោមការសម្របសម្រួលពីអង្គការអាដហុក ការពារសិទ្ធិមនុស្ស និងអភិវឌ្ឍន៍នៅកម្ពុជា អាជ្ញាធរមូលដ្ឋានបានផ្អាកប្រតិបត្តិការអនុវត្តសាលក្រមតុលាការ ហើយសន្យារកដំណោះស្រាយឱ្យប្រជាពលរដ្ឋ ទៅតាមគោលការណ៍ច្បាប់ភូមិបាល ព្រមទាំងស្នើឱ្យពួកគេបើផ្លូវឡើងវិញ។
ក្នុងចំណោមប្រជាពលរដ្ឋទាំងនោះ គ្រួសារខ្លះមានលិខិតកាន់កាប់ដីចម្ការ ដែលផ្តល់ឱ្យដោយអាជ្ញាធរភូមិឃុំផងដែរ។ បើតាមអាជ្ញាធរស្រុក ប្រជាពលរដ្ឋចាស់ ដែលតាំងទីលើដីនោះតាំងពីយូរមកហើយនោះ មានតែ៨គ្រួសារទេ ហើយអ្នកក្រៅពីនោះសុទ្ធសឹងតែជាជនចំណូលថ្មី។ ទោះបីជាយ៉ាងណាក្តី សមាគមអាដហុកបានជម្រុញឱ្យប្រជាពលរដ្ឋ ដែលត្រូវបណ្តេញចេញ ដាក់ពាក្យស្នើសុំដីសម្បទានសង្គមកិច្ចពីរដ្ឋាភិបាល តាមរយៈការិយាល័យរបស់ខ្លួនប្រចាំនៅខេត្តរតនគីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ