តុលាការកំពូលទាត់ចោលបណ្ដឹងប្រឆាំងនឹងដីកាឃុំខ្លួនលោក គឹម សុខ
តុលាការកំពូលនៅថ្ងៃទី២៣មិថុនានេះ បានទាត់ចោលបណ្ដឹងប្រឆាំងនឹងដីកាឃុំខ្លួនលោក គឹម សុខ ប្ដឹងដោយមេធាវីការពារក្ដី លោក ជួង ជូងី ។ ការច្រានចោលនេះបន្ទាប់ពីតុលាការកំពូលយល់ថា សេចក្ដីសម្រេចរបស់សាលាដំបូងរាជធានីភ្នំពេញនិងសភាស៊ើបសួរសាលាឧទ្ធរណ៍ធ្វើឡើង ត្រឹមត្រូវតាមនីតិវិធីច្បាប់។
ចុះផ្សាយនៅថ្ងៃ៖
ស្តាប់ - ០២:០៨
លោកមេធាវី ជួង ជូងី សោកស្ដាយចំពោះការទាត់ចោលបណ្ដឹងប្រឆាំងនឹងដីកាឃុំខ្លួនរបស់លោក គឹម សុខ អ្នកឃ្លាំមើលបញ្ហាសង្គម និងនយោបាយ។ លោកមេធាវីជួង ជូងី ពន្យល់ថា បណ្ដឹងប្រឆាំងនឹងដីកាឃុំខ្លួននេះធ្វើឡើងបន្ទាប់ពីលោក គឹម សុខ មិនសុខចិត្តនឹងការឃុំខ្លួនរបស់តុលាការ ដែលលោកបានចាត់ទុកថា ជាការបំពានច្បាប់និងសិទ្ធិ។ដូច្នេះហើយទើបលោកមេធាវីជួង ជូងី សម្រេចប្ដឹងសារទុក្ខតាំងពីសាលាឧទ្ធរណ៍រហូតដល់តុលាការកំពូល។
បច្ចុប្បន្នលោក គឹម សុខ កំពុងរងបណ្ដឹងបីផ្សេងគ្នាដែលបណ្ដឹងទាំងនោះសុទ្ធតែឡើងមកដល់ដៃតុលាការកំពូល។ ការទាត់ចោទបណ្ដឹងប្រឆាំងនឹងដីកាឃុំខ្លួនលោក គឹម សុខ ដោយតុលាការកំពូលនៅថ្ងៃនេះ គឺជាបណ្ដឹងមួយហើយ ប្ដឹងសារទុក្ខដោយលោក ជួង ជូងី ។
ដោយឡែក កាលថ្ងៃពុធក្នុងសប្ដាហ៍នេះ តុលាការកំពូល បានបើកសវនាការជំនុំជម្រះ លើសំណុំរឿងស្នើសុំនៅក្រៅឃុំរបស់ លោក គឹម សុខ ។ តាមគម្រោងតុលាការនឹង ប្រកាសសាលដីកា នៅព្រឹក ថ្ងៃទី២៨ ខែមិថុនា ខាងមុខនេះ។ បណ្ដឹងនេះត្រូវបានសាលាដំបូងរាជធានីភ្នំពេញចោទប្រកាន់លោក គឹម សុខ ពីបទញុះញង់ឲ្យប្រព្រឹត្តបទឧក្រឹដ្ឋជាអាទិ៍ និងបរិហាកេរ្តិ៍ជាសាធារណៈ បន្ទាប់ពីលោក និយាយវាយប្រហារលើរាជរដ្ឋាភិបាល និងគណបក្សប្រជាន ជាអ្នករៀបចំឃាតកម្មលើ លោក កែម ឡី។
បណ្ដឹងចុងក្រោយ នៅថ្ងៃទី២៨មិថុនខាងមុខនេះ តុលាការនឹងជំនុំជម្រះទាក់ទងនឹងការ ទាមទាររបស់លោក គឹម សុខ ឲ្យដើមបណ្ដឹងមកតទល់នៅតុលាការ។ ក្នុងន័យនេះលោក គឹម សុខ ចង់ឲ្យលោកនាយករដ្ឋមន្ត្រី ហ៊ុន សែន មកតទល់ជាមួយលោកដោយផ្ទាល់ក្នុងសវនាការ ពាក់ព័ន្ធនឹងបទចោទប្រកាន់អំពីការបង្កអំពើញុះញង់ នាំឲ្យមានមានភាពវឹកវរដល់សង្គម។ តែការទាមទារនេះត្រូវបានបដិសេធដោយសាលាឧទ្ធរណ៍។
ពាក់ព័ន្ធបញ្ហាសំណងទាមទារជំងឺចិត្តវិញ គឺលោកនាយករដ្ឋមន្ត្រីហ៊ុន សែនប្តឹងអ្នកវិភាគរូបនេះ ទាមទារសំណងជំងឺចិត្ត៥០ម៉ឺនដុល្លារ ចំពោះការអត្ថាធិប្បាយរបស់លោកគឹម សុខ បានចោទគណបក្សប្រជាជនកម្ពុជាថាអ្នកនៅពីក្រោយឃាតកម្ម។
មួយករណីទៀត «ចោទរដ្ឋាភិបាលបច្ចុប្បន្នបានបង្កើតឲ្យមានប្រព័ន្ធមួយ ដែលមានការសម្លាប់មនុស្សហើយ រកមុខឃាតករមិនឃើញ» ដោយទាមទារសំណងជំងឺចិត្ត១០លានរៀល ដែលស្មើនឹង២ពាន់៥រយដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ