តុលាការកំពូល បើកសវនាការលើបណ្ដឹងសារទុក្ខរបស់អ្នកវិភាគនយោបាយ លោក គឹម សុខ
តុលាការកំពូលបានបញ្ចប់សវនាការសួរដេញដោលលើសំណុំរឿងបរិហារកេរ្តិ៍របស់លោក គឹម សុខ ហើយនៅព្រឹកថ្ងៃទី៩ មិថុនានេះ។ ជាសំណុំរឿងដែលបានប្តឹងដោយលោក គី តិច មេធាវីការពារក្តី របស់លោកនាយករដ្ឋមន្រី្ត ហ៊ុន សែន។ សាលដីកាមិនត្រូវបានប្រកាសនៅឡើយទេ ដោយត្រូវរង់ចំាដល់ថ្ងៃទី ២៣ ខែមិថុនា។ នេះបើតាមលោក ជួង ជូងី មេធាវីការពារក្តីឲ្យលោក គឹម សុខ។ ខណៈពេលដែលសាលដីកាមិនទាន់ប្រកាស ប៉ុន សោភ័ណ សូមឆ្លៀតរំលឹកជូនលោកអ្នកស្តាប់ ជុំវិញរឿងរ៉ាវក្តីកាំ្តរបស់ លោក គឺម សុខ អ្នកវិភាគសង្គមរូបនេះជូនលោកអ្នកស្តាប់។
ចុះផ្សាយនៅថ្ងៃ៖
ស្តាប់ - ០២:០៦
លោក គឹម សុខ ជាអ្នកវិភាគនយោបាយនិងសង្គម។ លោកត្រូវបានតុលាការក្រុងភ្នំពេញសម្រេចឃុំខ្លួនកាលពី ថ្ងៃទី១៧ ខែកុម្ភៈ ឆ្នាំ២០១៧ ក្រោមបទចោទញុះញង់ឲ្យប្រព្រឹត្តបទឧក្រិដ្ឋជាអាថិ៍ និងបរិហារកេរ្តិ៍ជាសាធារណៈ។ ការឃុំខ្លួននេះធ្វើឡើងតាមបណ្ដឹងលោកនាយករដ្ឋមន្ដ្រី ហ៊ុន សែន ដែលប្ដឹងអ្នកវិភាគរូបនេះអំពីការចោទបក្សកាន់អំណាចថាជាអ្នកនៅពីក្រោយឃាតកម្មលោកបណ្ឌិត កែម ឡី។
គួរជម្រាបជូនថា រឿងរ៉ាវនេះបានកើតឡើងកាលពីថ្ងៃទី១១ កុម្ភៈ ឆ្នាំ២០១៧ ក្នុងពេលអ្នកវិភាគសង្គមរូបនេះបានធ្វើអត្ថាធិប្បាយក្នុងស្ថានីយ៍វិទ្យុអន្តរជាតិមួយជុំវិញការសម្លាប់លោកបណ្ឌិតកែម ឡី។ ភ្លាមៗនៅរំលងមិនដល់មួយថ្ងៃស្រួលបួលផង លោកនាយករដ្ឋមន្ត្រីហ៊ុន សែន ចេញបញ្ជាឱ្យមេធាវីប្តឹងលោក គឹម សុខ ទៅកាន់តុលាការ។
ថ្ងៃទី ១៣ ខែកុម្ភៈ ឆ្នាំ២០១៧ ដំណើរការនីតិវិធីតុលាការបានចាប់ផ្តើម។ គឺលោកនាយករដ្ឋមន្ត្រីហ៊ុន សែនប្តឹងអ្នកវិភាគរូបនេះ ទាមទារសំណងជំងឺចិត្ត៥០ម៉ឺនដុល្លារ ពីព្រោះបើតាមប្រសាសន៍របស់លោកនាយករដ្ឋមន្ត្រី ការអត្ថាធិប្បាយរបស់លោកគឹម សុខ បានចោទគណបក្សប្រជាជនកម្ពុជាថាអ្នកនៅពីក្រោយឃាតកម្ម។
ក្រៅពីបណ្តឹងខាងលើ លោកនាយករដ្ឋមន្ត្រីហ៊ុន សែន បានប្តឹងលោក គឹម សុខ មួយបណ្តឹងបន្ថែមទៀតពីបទ«ចោទរដ្ឋាភិបាលបច្ចុប្បន្នបានបង្កើតឲ្យមានប្រព័ន្ធមួយ ដែលមានការសម្លាប់មនុស្សហើយ រកមុខឃាតករមិនឃើញ» ដោយទាមទារសំណងជំងឺចិត្ត១០លានរៀល ដែលស្មើនឹង២ពាន់៥រយដុល្លារ។ សរុបលោកគឹម សុខមានបណ្តឹងជាប់ខ្លួនចំនួនពីរដែលលោកនាយករដ្ឋមន្ត្រីប្តឹងក្រោយការអត្ថាធិប្បាយនេះ ។
នៅថ្ងៃទី ១៧ កុម្ភៈ លោកគឹម សុខ ត្រូវបានប៉ូលិសចាប់ដាក់រថយន្តចេញពីតុលាការក្រុងភ្នំពេញទៅកាន់មន្ទីរឃុំឃាំងព្រៃស ខណៈដែលប្រជាពលរដ្ឋដែលឈរនៅក្រៅរបងតុលាការមួយក្រុមស្រែកថាអយុត្តិធម៌ និងរិះគន់តុលាការកម្ពុជាជាខ្លាំង។
ខណៈដែលកំពុងជាប់ឃុំនៅពន្ធនាគារ លោក គឹម សុខ, កាលពីថ្ងៃទី ២៨ ឧសភា មុនការបោះឆ្នោតឃុំ សង្កាត់ អាណត្តិទី៤នេះ លោកបានធ្វើកូដកម្មបង្អត់អាហាររយៈពេល១សប្តាហ៍ ដើម្បីអង្វរប្រជាពលរដ្ឋឲ្យទៅបោះឆ្នោតគ្រប់ៗគ្នាដើម្បី ផ្លាស់ប្តូរមេដឹកនាំទំាងនៅមូលដ្ឋាន និង ថ្នាក់ជាតិ។
ចំពោះការចាប់ខ្លួនលោកគឹម សុខ ក្រុមអ្នកវិភាគនៅកម្ពុជាបានអះអាងថា វាជាការបំបិទសិទ្ធិសេរីភាពក្នុងការបញ្ចេញមតិ ដែលគ្មានអ្នកណាហ៊ានអត្ថាធិប្បាយទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ