ចៅក្រម និងព្រះរាជអាជ្ញាទទួលបានការអនុញ្ញាតឲ្យបន្តការងារទៅមុខទៀត
ព្រះមហាក្សត្រចេញព្រះរាជក្រិត្យ អនុញ្ញាតឲ្យចៅក្រម និងព្រះរាជអាជ្ញាចំនួន៤០រូប បន្តការងាររបស់ខ្លួនតទៅទៀត ខណៈដែលមន្ត្រីជាន់ខ្ពស់តុលាការទាំងនេះ មានអាយុច្រើនដល់អាយុចូលនិវត្តន៍ទៅហើយក្តី។ ចៅក្រម និងព្រះរាជអាជ្ញាដែលត្រូវបន្តការងារលើសអាយុចូលនិវត្តន៍ដែលរងការរិះគន់ពីសង្គមស៊ីវិលទាំងនោះ រួមមានប្រធានតុលាការកំពូល និងប្រធានសាលាដំបូងរាជធានីភ្នំពេញផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ចៅក្រម និងព្រះរាជអាជ្ញាចំនួន៤០រូប ដែលមានអាយុចូលនិវត្តន៍ ត្រូវបានព្រះមហាក្សត្រ ត្រាស់បង្គាប់អនុញ្ញាតឲ្យបន្តការងារតទៅទៀត ដោយគ្មានកំណត់។តាមព្រះរាជក្រិត្យ ចុះថ្ងៃទី០៦ខែមេសាឆ្នាំ ២០១៤ ហើយត្រូវបានផ្សព្វផ្សាយដល់សារព័ត៌មាននៅថ្ងៃទី១២ខែមេសានេះ បង្ហាញថា ចៅក្រម និងព្រះរាជអាជ្ញាទាំង៤០ រូបនោះ រួមមានលោក ឌិត មុន្ទី ប្រធានតុលាការកំពូល និងអនុប្រធានរបស់លោក គឺលោក ឃឹម ប៉ុណ្ណ ព្រមទាំងចៅក្រមតុលាការកំពូល ៦នាក់ផ្សេងទៀត។ក្រៅពីនោះមានអគ្គព្រះរាជអាជ្ញារងអមសាលាឧទ្ធរណ៍ ប្រធាននិងអនុប្រធានសាលាដំបូងរាជធានី-ខេត្តជាច្រើនទៀត។
ក៏ប៉ុន្តែព្រះរាជក្រិត្យដែលមានបញ្ជាក់ពីមូលហេតុនៃការបន្តការងារដល់ចៅក្រម និងព្រះរាជអាជ្ញាទាំងអស់នោះឡើយ។ក្រសួងយុត្តិធម៌ក៏មិនមានការពន្យល់អ្វីដែរ ទាក់ទងទៅនឹងការពន្យាកំណើតជាពិសេសទៅដល់មន្ត្រីជាន់ នៃប្រព័ន្ធតុលាការប្រទេសកម្ពុជា។
ក៏ប៉ុន្តែសង្គមស៊ីវិល ហាក់ដូចជាបានធ្វើអត្ថាធិប្បាយបញ្ឆិតបញ្ឆៀងខ្លះៗថា គួរតែមានភាពស្មើភាពគ្នាលើគោលការណ៍នេះ, នេះបើតាមលោក អំ សំអាត ប្រធានផ្នែកបច្ចេកទេសស៊ើបអង្កេតអង្គការការពារសិទ្ធិមនុស្សលីកាដូយល់ឃើញថា ចៅក្រមនិងព្រះរាជអាជ្ញាដែលទទួលបានសិទ្ធិពិសេសទាំងនេះ គឺជាអ្នកដែលធ្លាប់ដែលមានគុណបំណាច់ដល់រដ្ឋាភិបាល និងគណបក្សកាន់អំណាច។
ជាមួយគ្នានេះ មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សអាដហុកលោកចាន់ សុវ៉េត បានកត់សម្គាល់ថា ការធ្វើដូច្នេះនឹងធ្វើឲ្យប៉ះពាល់ដល់អនាគត និងសមត្ថភាពការងាររបស់យុវជនជំនាន់ក្រោយដែលជាទំពាំងត្រៀមស្នងឬស្សី។ លោកចាន់ សុវ៉េតបន្តថា ទាំងនេះក៏ជាការអនុវត្តមួយផ្ទុយទៅនឹងការតាំងចិត្តក្នុងការកែទម្រង់ប្រព័ន្ធយុត្តិធម៌របស់រដ្ឋាភិបាលផងដែរ។
សូមបញ្ជាក់ថា ការដាក់ឲ្យចូលនិវត្តន៍នៃមន្ត្រីរាជការនៅក្នុងប្រទេសកម្ពុជាដែលមនុស្សប្រុសចាប់ពីអាយុ៦០ឆ្នាំឡើងទៅ ត្រូវគេរិះគន់ថា បានទទួលប្រាក់ចូលនិវត្តន៍តិចតួច ជាហេតុធ្វើឲ្យ
មន្ត្រី រាជការ ម្នាក់ៗដែលដល់អាយុចូលនិវត្តន៍ហើយនោះ រិះរកវិធីផ្សេងៗ មិនចង់ចូលនិវត្តន៍
ឡើយ។ជាមួយគ្នានេះក៏មានការស្នើឲ្យរដ្ឋាភិបាលគិតគូរឲ្យបានសមរម្យផងដែរសម្រាប់ប្រាក់
ចូលនិវត្តន៍នេះដើម្បីផ្តល់ឱកាសតៗគ្នាដល់អ្នកជំនាន់ក្រោយក្នុងការបំរើការងារជូនរាជការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ