ជីម៉ាក ថាសហជីពបង្វែរកូដកម្មកម្មករទៅក្រុងបាវិតក្រោយបរាជ័យនៅភ្នំពេញ
សមាគមរោងចក្រកាត់ដេរនៅកម្ពុជាហៅកាត់ថា ជីម៉ាក( GMAC) បានលើកឡើងថា កួដកម្មកម្មករដែលកំពុងធ្វើនៅក្នុងក្រុងបាវិត ខេត្តស្វាយរៀងនៅពេលនេះ បានកើតឡើងក្រោយពេលដែលក្រុមសហជីពបានបរាជ័យក្នុងការដឹកនាំកម្មករធ្វើកូដកម្មនៅរាជធានីភ្នំពេញ។ជីម៉ាក បានលើកឡើងដូច្នេះនៅក្នុងសេចក្តីថ្លែងការណ៍ពិសេសរបស់ខ្លួនកាលពីទី២៥ មេសា ម្សិលមិញ។ក៏ប៉ុន្តែសហជីពបានច្រានចោលដោយអះអាងថា ការផ្ទុះកូដកម្មនៅបាវិតនេះ គឺស្របទៅនឹងកូដកម្មនៅកន្លែងផ្សេងទៀតរួមទាំងរាជធានីភ្នំពេញផងដែរ។
ចុះផ្សាយនៅថ្ងៃ៖
ស្តាប់ - ០២:៥២
នៅក្នុងសេចក្តីថ្លែងការណ៍នោះ សមាគមរោងចក្រកាត់ដេរនៅកម្ពុជាបានចង្អុលចំៗ ថា សម្ព័ន្ធសហជីពចលនាកម្មករដែលដឹកនាំដោយ លោក ប៉ាវ ស៊ីណា កំពុងដឹកនាំកម្មករ កម្មការិនីធ្វើកូដកម្ម នៅតំបន់សេដ្ឋកិច្ចពិសេសនៅក្រុងបាវិតខេត្តស្វាយរៀង បន្ទាប់ពីបរាជ័យក្នុងការដឹកនាំកូដកម្មនៅក្នុងរាជធានីភ្នំពេញ។
បន្ថែមលើនេះ សមាគមរោងចក្រកាត់ដេរនៅកម្ពុជាបានបញ្ជាក់ថា ការចោទប្រកាន់ថានិយោជកបានសន្យាផ្តល់ប្រាក់ចំនួន៥០ ដុល្លារដល់កម្មករ ដើម្បីជាថ្នូរនឹងការមិនចូលរួមធ្វើកូដកម្មនាពេលកន្លងមក ជាការបំផ្លើស ។ ហើយការបង្ខំឲ្យនិយោជកធ្វើដូចនេះជាសកម្មភាពខុសច្បាប់ដែលមិនខុសពីការជម្រិតទារប្រាក់នោះឡើយ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានហៅការលើកឡើងរបស់សមាគមរោងចក្រកាត់ដេរនៅកម្ពុជានេះថា មិនបានសិក្សាច្បាស់លាស់ពីរឿងរាវដែលកើតឡើងនៅក្នុងតំបន់សេដ្ឋកិច្ចពិសេសនេះ។លោក បានបកស្រាយថា ការផ្ទុះកូដកម្មនៅបាវិតនេះកើតឡើងដោយសាររោងចក្រមួយនៅក្នុងតំបន់សេដ្ឋកិច្ចពិសេសនេះបានសន្យាផ្តល់ប្រាក់៥០ដុល្លារដល់កម្មករ កម្មការិនីកុំឲ្យចូលរួមធ្វើកូដកម្មជាមួយសហជីពទាំង ១៨ កាលពីថ្ងៃទី ១២ ដល់ថ្ងៃ ១៧ ខែមីនា កន្លងមក។សកម្មភាពបែបនេះ ធ្វើឲ្យកម្មករនៅរោងចក្រផ្សេងទៀត បាននាំគ្នាធ្វើកូដកម្មទាមទារប្រាក់រង្វាន់នោះពីថៅកែរោងចក្ររបស់ខ្លួនផងដែរ ទើបបង្កជាកូដកម្មទ្រង់ទ្រាយធំកើតឡើង។
លោក ប៉ាវ ស៊ីណាបានបញ្ជាក់ថា ការធ្វើកូដកម្មនៅភ្នំពេញ និង កន្លែងផ្សេងទៀត គឺ ស្របគ្នានឹងកូដកម្មនៅបាវិតនេះ មិនមែនបរាជ័យដូចការលើកឡើងនោះទេ។បើតាមលោក ប៉ាវ ស៊ីណា កម្មករ កម្មការិនីប្រមាណ ពីរ មឺននាក់នៅក្នុងរោងចក្រប្រមាណ ៣០ កំពុងបន្តកូដកម្មមិនចូលធ្វើការ។
សូមជំរាបជូន ថា ការផ្ទុះធ្វើកូដកម្មរបស់កម្មករនៅក្នុងតំបន់សេដ្ឋកិច្ចពិសេសនៅក្រុងបាវិតនេះ បានចាប់ផ្តើមឡើងកាលពី ១៨ មេសា គឺស្របពេលជាមួយយុទ្ធនាការឈប់សម្រាកមិនចូលធ្វើការរបស់កម្មករដែលអំពាវនាវដោយសហជីពទាំង ១៨ ។
ក្រៅពីការចោទប្រកាន់ទៅលើក្រុមសហជីព សមាគមរោងចក្រកាត់ដេរនៅកម្ពុជាក៏បានសម្តែងការសោកស្តាយដែលរាជរដ្ឋាភិបាល និង អាជ្ញាធរដែនដីបានបណ្តែតបណ្តោយឲ្យមានសកម្មភាពល្មើសច្បាប់នេះកើតឡើង និង គ្មានវិធានការទប់ស្កាត់ឲ្យមានប្រសិទ្ធភាព។
ជាមួយគ្នានោះដែរ សមាគមរោងចក្រកាត់ដេរនៅកម្ពុជាបានអំពាវនាវឲ្យក្រសួងការងារ ស្ថាប័នពាក់ព័ន្ធ និង អាជា្ញធរដែនដីអនុវត្តតួនាទីរបស់ខ្លួនក្នុងការទប់ស្កាត់បាតុភាពនេះជាបន្ទាន់ដើម្បីធានាសន្តិសុខសុវត្ថិភាពដល់វិនិយោគ និងកម្មករដែលមានបំណងចូលធ្វើការ។
ក្រសួងការងារមិនអាចទាក់ទងសុំការបំភ្លឺជុំវិញការលើកឡើងរបស់សមាគមរោងចក្រកាត់ដេរនៅកម្ពុជាបាននោះទេនៅថ្ងៃទី ២៦ មេសា នេះ។
យ៉ាងណាក៏ដោយ សមាគមរោងចក្រកាត់ដេរនៅកម្ពុជា បានព្រមានដល់កម្មករដែលបានចូលរួមកូដកម្មនេះថា នឹងប៉ះពាល់ដល់ប្រាក់ឈ្នួលរបស់ពួកគេព្រោះនិយោជកនឹងអនុវត្តតាមច្បាប់ស្តីពីការងារដោយមិនផ្តល់ប្រាក់ឈ្នួល និងអត្ថប្រយោជន៍ផ្សេងៗទៀតឡើយក្នុងអំឡុងពេលកូដកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ