លោកហ៊ុន សែន អំពាវនាវឱ្យស្ថាប័នរដ្ឋយកចិត្តទុកដាក់ចំពោះកម្មករ
ក្នុងថ្ងៃទិវាពលកម្មអន្តរជាតិ១ឧសភាដែលនឹងចូលមកដល់ប៉ុន្មានថ្ងៃខាងមុខ លោកនាយករដ្ឋមន្ត្រីហ៊ុន សែន បានអំពាវនាវជាច្រើនចំណុចដល់ស្ថាប័នរដ្ឋក្រោមឱវាទឱ្យយកចិត្តទុកដាក់ចំពោះកម្មករ។ ជាការយកចិត្តទុកដាក់ដែលលោកនាយករដ្ឋមន្ត្រី បានអំពាវបន្តការងារលើបញ្ហាលក្ខខណ្ឌការងារកាន់តែប្រសើរសម្រាប់កម្មករ បញ្ហាការដំឡើងប្រាក់ឈ្នួលអប្បបរមា សេរីភាពសហជីព ជាដើម។ ប៉ុន្តែក្នុងចំណុចនៃការអំពាវនាវនោះ លោកប្រមុខរដ្ឋាភិបាល ក៏បានអំពាវនាវកុំឱ្យកម្មករចូលរួមសកម្មភាពបាតុកម្មនៅថ្ងៃ១ឧសភានោះផងដែរ។ ប៉ុន្តែសហជីពបានលើកឡើងថា ការអំពាវនាវរបស់លោកនាយករដ្ឋមន្ត្រីនឹងមិនមានប្រសិទ្ធភាពនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ការបន្តលើកកម្ពស់ឱ្យកាន់តែប្រសើរនូវលក្ខខណ្ឌការងារ ការពង្រឹងប្រព័ន្ធសុខភាពរបស់កម្មករ ការពង្រឹងសេរីភាពសហជីព និងការសិក្សាគ្រប់ជ្រុងជ្រោយដើម្បីកំណត់ប្រាក់ឈ្នួលអប្បបរមារបស់កម្មកររួមទាំងសមត្ថភាពការងារជាដើមនោះ។ នេះគឺជាការអំពាវនាវរបស់លោកនាយករដ្ឋមន្ត្រីហ៊ុន សែន ទៅកាន់ស្ថាប័នពាក់ព័ន្ធក្រោមឱវាទរបស់លោក។ ក្នុងលិខិតចូលរួមអបអរសាទរថ្ងៃទី១ឧសភាដែលមានកម្រាស់៦ទំព័រ ប្រមុខរដ្ឋាភិបាល បានលើកឡើងថា ចំណុចកង្វះខាតខាងលើនេះ គឺជាបញ្ហាប្រឈមនៃវិស័យកាត់ដេរកម្ពុជា ដែលត្រូវតែជំនៈក្នុងលើកកម្ពស់លក្ខខណ្ឌការងារ គុណភាព ស្ថិរភាព ផលិតភាព ភាពប្រកួតប្រជែងជាដើម។
ប្រមុខរដ្ឋាភិបាល៥អាណត្តិរូបនេះ បានបន្ថែមថា តាមរយៈចំណុចទាំងនេះ គឺនឹងអាចគាំទ្រដល់ពិពិធភាវូបនីយកម្មមូលដ្ឋានផលិតកម្ម ផលិតភាព និងសមត្ថភាពប្រកួតប្រជែង និង ការទាក់ទាញវិនិយោគឱ្យបានជាអតិបរមាពីសហគមន៍សេដ្ឋកិច្ចអាស៊ានឆ្នាំ២០១៥ខាងមុខ។ ឆ្នាំ២០១៥ ដែលប្រទេសចំនួន១០ ក្នុងប្រជាជាតិអាស៊ីអាគ្នេយ៍ នឹងបើកចំហរលំហូរនៃសេដ្ឋកិច្ចរបស់ខ្លួន។ យ៉ាងណាក៏ដោយ លោកនាយករដ្ឋមន្ត្រី ក៏មិនភ្លេចឡើយចំពោះការអំពាវនាវឱ្យកម្មករទាំងអស់មិនត្រូវចូលរួមក្នុងសកម្មភាពបាតុកម្មជួបជុំ ឬសកម្មភាពនានាក្នុងថ្ងៃទី១ឧសភានោះទេ។ ដែលលោកហៅថា ជាសកម្មភាពដែលនឹងប៉ះពាល់ដល់ផលប្រយោជន៍របស់កម្មករ។ មិនត្រឹមតែប៉ុណ្ណោះលោកហ៊ុន សែន បានអះអាងថា សកម្មភាពបាតុកម្មនាពេលកន្លងមក គឺបានប៉ះពាល់ស្ថេរភាពសេដ្ឋកិច្ចសកម្មផងដែរ។
ផ្ទុយទៅវិញប្រធានសហជីពសេរីកម្មករនៃព្រះរាជាណាចក្រកម្ពុជា លោកជា មុនី បាននិយាយថា ការអំពាវនាវរបស់លោកនាយករដ្ឋមន្ត្រីទៅកាន់មន្ត្រីក្រោមឱវាទនោះ គឺមិនមានប្រសិទ្ធភាពនោះទេ។ មិនមានប្រសិទ្ធភាពព្រោះថា ការណែនាំរបស់លោកនាយករដ្ឋមន្ត្រីមិនមានជាលើកទី១នោះទេ ប៉ុន្តែមន្ត្រីក្រោមឱវាទភាគច្រើនមិនគោរពតាមបទបញ្ជាដែលបានដាក់ចេញនោះទេ។ ក្រៅពីនេះ លោកជាមុនី ក៏បានបន្ថែមថា លោកនាយករដ្ឋមន្ត្រី ក៏មិនអាចហាមឃាត់កម្មករមិនឱ្យចូលរួមសកម្មភាពបាតុកម្មបាននោះដែរ ព្រោះថា នោះគឺជាសិទ្ធរបស់កម្មករ។ ហើយថាបើមិនមានការតវ៉ានោះ ក៏មិនមានដែរការគិតគូរពីរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ