កម្ពុជាសុំឲ្យអូស្ត្រាលីជួយដល់កំណែទម្រង់ការបោះឆ្នោត
ក្នុងជំនួបជាមួយរដ្ឋមន្ត្រីការបរទេសអូស្ត្រាលីលោកស្រី ជូលី ប៊ីស្សប (Julie Bishop) នៅវិមានសន្តិភាព នៅព្រឹកថ្ងៃសៅរ៍ទី ២២ កុម្ភៈនេះ លោកនាយករដ្ឋមន្ត្រី ហ៊ុន សែន បានស្នើសុំឲ្យអូស្ត្រាលីជួយកម្ពុជាអំពីកំណែទម្រង់ការបោះឆ្នោត។ សំណើនេះបានធ្វើឡើងខណៈដែលគណបក្សនយោបាយកំពុងមានទំនាស់ទាំងពីររបស់កម្ពុជាកំពុងជជែកគ្នាអំពីកំណែទម្រង់បោះឆ្នោតនេះយ៉ាងសកម្ម។ ប្រមុខការទូតអូស្ត្រាលីបានទទួលយកសំណើនេះ និងបានសុំឲ្យកម្ពុជាទទួលយកជនភៀសខ្លួនស្របច្បាប់នៅអូស្ត្រាលីមកតាំងទីលំនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
បន្ទាប់ពីជប៉ុនឥឡូវនេះដល់វេនអូស្ត្រាលីម្តងដែលកម្ពុជាបានស្នើសុំឲ្យជួយផ្នែកកំណែទម្រង់ការបោះឆ្នោត។ លោកនាយករដ្ឋមន្ត្រី ហ៊ុន សែនបានលើកសំណើនេះនៅក្នុងជំនួបជាមួយរដ្ឋមន្ត្រីការបរទេសអូស្ត្រាលីនៅព្រឹកថ្ងៃសៅរ៍នេះនៅឯវិមានសន្តិភាព។ នេះបើយោងតាមលោក អ៊ាង សុផល្លែត ជំនួយការរបស់លោកនាយករដ្ឋមន្ត្រីដែលបានថ្លែងប្រាប់អ្នកកាសែតនៅក្រោយជំនួបនោះ។ ប្រមុខការទូតអូស្ត្រាលីបានទទួលយកសំណើរបស់កម្ពុជា។
សំណើដូចគ្នានេះក៏ត្រូវបានលោកនាយករដ្ឋមន្ត្រី ហ៊ុន សែន លើកឡើងទៅកាន់ប្រទេសជប៉ុនដែរកាលពីពេលថ្មីៗនេះ។
សូមបញ្ជាក់ថា រដ្ឋមន្ត្រីការបរទេសអូស្ត្រាលី លោកស្រី Julie Bishop កំពុងទស្សនកិច្ចរយៈពេលពីរថ្ងៃនៅកម្ពុជាចាប់ពីថ្ងៃទី ២១ ដល់២២កុម្ភៈ។ ក្នុងអំឡុងពេលនេះ លោកស្រីគ្រោងជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា។
ជាសំណើតបវិញ រដ្ឋមន្ត្រីការបរទេសអូស្ត្រាលីក៏បានស្នើឲ្យកម្ពុជាទទួលយកជនភៀសខ្លួនស្របច្បាប់ពីប្រទេសអូស្ត្រាលីមកតាំងទីលំនៅក្នុងប្រទេសកម្ពុជា។ ទីក្រុងភ្នំពេញក៏បានទទួលយកសំណើនេះហើយប្រគល់ភារកិច្ចឲ្យក្រសួងមហាផ្ទៃដើម្បីពិភាក្សានិងដំណើការនីតិវិធី។
គួរបញ្ជាក់ថា កំណែទម្រង់ការបោះឆ្នោតគឺជាប្រធានបទក្តៅគគុកដែលគណបក្សជាប់ឆ្នោតទាំងពីរកំពុងតែជជែកគ្នា។ទោះបីជាមិនទាន់មានដំណោះស្រាយនយោបាយពិតប្រាកដដែលអនុញ្ញាតឲ្យគណបក្សសង្គ្រោះជាតិចូលអង្គុយក្នុងសភានៅឡើយក៏ដោយ ក៏ចុងក្រោយនេះ គណបក្សប្រឆាំងសុខចិត្តជជែកជាមួយគណបក្សកាន់អំណាចអំពីកំណែទម្រង់ការបោះឆ្នោត។
បន្ទាប់ពីកិច្ចព្រមព្រៀងបង្កើតគណៈកម្មការចម្រុះជាមួយគ្នាកាលពីថ្ងៃទី ១៨ កុម្ភៈ គណបក្សទាំងពីរគ្រោងជួបគ្នាជាថ្មីទៀតក្នុងពេលឆាប់ៗនេះដើម្បីជជែកលម្អិតអំពីកំណែទម្រង់បោះឆ្នោត។ យ៉ាងណាក៏ដោយ គេមិនទាន់ដឹងថា តើជប៉ុននិងអូស្ត្រាលីនឹងជួយកម្ពុជាលើបញ្ហាជាក់ស្តែងអ្វីខ្លះនៅឡើយទេទាក់ទងនឹងកំណែទម្រង់ការបោះឆ្នោតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ