កំណែទម្រង់ស៊ីជម្រៅលើប្រព័ន្ធបោះឆ្នោត នៅកម្ពុជាជាប់គាំង ដោយខ្វះកិច្ចពិភាក្សាល្អិតល្អន់
ចុះផ្សាយនៅថ្ងៃ៖
ស្តាប់ - ១០:៤៩
ទាក់ទងនឹងជម្លោះក្នុងការបោះឆ្នោតជ្រើសរើសតំណាងរាស្ត្រ ខែកក្កដា ឆ្នាំ២០១៣ ទីស្តីការគណៈរដ្ឋមន្ត្រី នៅថ្ងៃអង្គារម្សិលមិញ បានបង្ហាញរបាយការណ៍មួយ ដែលចោទសម្ព័ន្ធកំណែទម្រង់ការបោះឆ្នោត (ហៅកាត់ជាភាសាអង់គ្លេសថា អ៊ីរ៉ា)ថាបានសរសេររបាយការណ៍រួមរបស់ខ្លួន ដោយបំភ្លៃការពិត ភូតកុហកសាធារណមតិជាតិ អន្តរជាតិ និងដើម្បីផ្គាប់ចិត្តអ្នកនយោបាយគណបក្សប្រឆាំងតែប៉ុណ្ណោះ។ របាយការណ៍របស់សង្គមស៊ីវិល ផ្សាយក្នុងខែវិច្ឆិកា ឆ្នាំ២០១៣នោះ បានបង្ហាញនូវភាពមិនប្រក្រតីធ្ងន់ធ្ងរច្រើន ដែលបង្កការមិនទុកចិត្តទៅលើការបោះឆ្នោតទាំងមូល ជាពិសេសលទ្ធផលបោះឆ្នោត។ លទ្ធផលឆ្នោតជាប្រភពនៃទំនាស់រវាងគណបក្សប្រជាជនកម្ពុជា និងគណបក្សសង្រោះជាតិ និងជាប្រភពនៃការទាមទារកំណែទម្រង់ប្រព័ន្ធបោះឆ្នោតទាំងមូល។ គណបក្សទាំងពីរសុទ្ធតែចង់កែលម្អប្រព័ន្ធបច្ចុប្បន្នឱ្យស៊ីជម្រៅ ប៉ុន្តែមិនបានជជែកគ្នាឱ្យពិស្តារឡើយ បន្ទាប់ពីរដ្ឋាភិបាល ដឹកនាំដោយគណបក្សប្រជាជនកម្ពុជា បានសម្រេចបង្កើតគណៈកម្មការស្រាវជ្រាវការកែទម្រង់ការបោះឆ្នោតមួយ នៅថ្ងៃទី០៩ ខែធ្នូ ឆ្នាំ២០១៤។
