អាជ្ញាធរសម្ដែងការព្រួយបារម្ភពីការខ្វះទឹកធ្វើស្រែក្រោយទឹកជំនន់
បន្ទាប់ពីជំនន់ទឹកភ្លៀង អាជ្ញាធរបានសម្តែងនូវការព្រួយបារម្ភពីការខ្វះខាតទឹកសម្រាប់ធ្វើស្រែ ដោយសារតែចាប់ពីពាក់កណ្តាលខែសីហានេះ រហូតដល់ចុងខែ ប្រទេសកម្ពុជាមានភ្លៀងធ្លាក់តិចតួច។ ឥទ្ធិពលព្យុះ និងប្រព័ន្ធសម្ពាធទាបនឹងបន្តកើតមាន ក៏ប៉ុន្តែ មិនមានភ្លៀងធ្លាក់ច្រើនដូចកាលពីដើមខែសីហាកន្លងទៅឡើយ។ ជាមួយគ្នានេះ អង្គការការីតាសកម្ពុជាក៏បានត្រៀមថវិការបស់ខ្លួនប្រមាណ ៥០ម៉ឺនដុល្លារ សម្រាប់គម្រោងជំនួយលើគ្រោះទឹកជំនន់និងភាពរាំងស្ងួតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
មន្ត្រីនានាដែលធ្វើការងារទាក់ទងទៅនឹងទឹកជំនន់បានថ្លែងឲ្យដឹងថា មកទល់ពេលនេះជំនន់ទឹកភ្លៀងក៏ដូចជាជំនន់ទន្លេមេគង្គ មិនមានអ្វីជាការព្រួយបារម្ភថានឹងមានការគំរាមកំហែងទៀតទេ ដោយសារទឹកបានស្រកទៅវិញអស់ហើយ។
នាយកខុទ្ទកាល័យ និងជាអ្នកនាំពាក្យក្រសួងធនធានទឹក លោក ចាន់ យុត្ថា, បានប្រាប់វិទ្យុបារាំង RFI ថា កម្ពុជាមានតែការព្រួយបារម្ភពីការខ្វះខាតទឹកសម្រាប់ធ្វើស្រែទៅវិញនោះទេ។ លោក ចាន់ យុត្ថា ពន្យល់ថា តាមការព្យាករណ៍ចាប់ពីថ្ងៃទី ១៤ ដល់ថ្ងៃទី ២៣ ខែ សីហានេះ ប្រទេសកម្ពុជាមានភ្លៀងធ្លាក់តិចតួចបំផុត ហេតុដូច្នេះ ខេត្តមួយចំនួនអាចប្រឈមនឹងកង្វះខាតទឹកសម្រាប់ធ្វើស្រែ ដូចជាខេត្តកំពង់ធំ បាត់ដំបង បន្ទាយមានជ័យ និងខេត្តសៀមរាបជាដើម ដោយខេត្តទាំងនេះមានផ្ទៃដីស្រែធំៗ ហើយកាលពីសំបូរទឹកប៉ុន្មានថ្ងៃកន្លងទៅនេះដោយជំនន់ទឹកភ្លៀង, ទឹកមួយភាគធំត្រូវបានកាយប្រឡាយបង្ហូរទៅអស់។
ដោយឡែកចំពោះជំនន់ទឹកទន្លេវិញ មន្ត្រីជាន់ខ្ពស់ក្រសួងធនធានទឹកបន្ថែមថា ទឹកទន្លេក៏មិនបង្កឲ្យមានការព្រួយបារម្ភអ្វីដែរ ដោយកម្ពស់ទឹកគ្រប់ស្ថានីយ៍ជលសាស្ត្រទាំងអស់ បានស្រកទៅវិញជាបណ្តើរៗហើយ។
ទោះជាយ៉ាងនេះក្តី កំពស់ទឹកទន្លេអតិបរមាលើកទី២ នឹងកើតមានម្តងទៀត នៅចុងខែកញ្ញា និងដើមខែតុលាខាងមុខ។ ដោយគិតមកទល់ពេលនេះ កូនព្យុះទី ១២ និងទី ១៣ បាននឹងកំពុងកើតឡើង តែមិនមានឥទ្ធិពលមកលើប្រទេសកម្ពុជានោះទេ។
ទោះបីជាយ៉ាងណាក៏ដោយ អង្គការការីតាសកម្ពុជា ដែលជាអង្គការគ្រិស្តសាសនា ធ្វើសកម្មភាពជួយដល់វិស័យគ្រោះមហន្តរាយនៅក្នុងប្រទេសកម្ពុជា បានចាប់ផ្តើមផ្តល់ជំនួយជាបន្តបន្ទាប់ ដល់អាជ្ញាធរមូលដ្ឋាន និងគ្រួសាររងគ្រោះដោយទឹកជំនន់ ខណៈដែលជំនន់ទឹកភ្លៀងបានបន្តលិចលង់ខេត្តមួយចំនួន។
ដោយផ្តើមចេញពីខេត្តបន្ទាយមានជ័យ អង្គការការីតាសកម្ពុជាបានចាប់អារម្មណ៍ និងផ្តល់ជា
ជំនួយសម្ភារៈសង្គ្រោះបន្ទាន់ កាលពីពេលថ្មីៗនេះ ដល់សេវាកម្មគ្រោះមហន្តរាយខេត្ត រួមមាន
ទូកម៉ាស៊ីន កៅស៊ូតង់ ស៊ីទែនទឹកធំ និងមុងភួយ សម្រាប់ប្រើប្រាស់ ត្រៀមឆ្លើយតបនឹង
ទឹកជំនន់។ លោក គីម រតនា ប្រធានអង្គការការីតាសកម្ពុជា បានប្រាប់ឲ្យដឹងថា នៅក្នុងការងារត្រៀមបង្ការឆ្លើយតបគ្រោះមហន្តរាយ និងស្តារឡើងវិញ អង្គការគ្រឹះសាសនាមួយនេះបានគ្រោងថវិកាប្រមាណជាកន្លះលានដុល្លារ ហើយផ្តោតទៅលើខេត្តចំនួន ៩ ក្នុងនោះខេត្ត ៥ ជាខេត្តដែលងាយរងគ្រោះដោយទឹកជំនន់ និងខេត្ត៤ ទៀតជាខេត្តងាយរងគ្រោះដោយគ្រោះរាំងស្ងួត។ លោក គីម រតនា ក៏បានឲ្យដឹងផងដែរថា ក្នុងមួយឆ្នាំ អង្គការរបស់លោកមានគម្រោងផ្តល់ទូកម៉ាស៊ីនចំនួន ២០គ្រឿង ដល់តំបន់ដែលរងគ្រោះ សម្រាប់ជាមធ្យោបាយសង្គ្រោះប្រជាពលរដ្ឋដោយទឹកជំនន់ និងការងារអប់រំផ្សព្វផ្សាយដល់ប្រជាពលរដ្ឋដទៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ