សន្និបាតក្រុមប្រឹក្សាជាតិរបស់បក្សប្រឆាំងអនុម័ត ៧ ចំណុច
ដូចការគ្រោងទុក នៅព្រឹកថ្ងៃអាទិត្យ ទី ២៧ កក្កដា នេះ គណបក្សសង្គ្រោះជាតិបានរៀបចំធ្វើសន្និបាតក្រុមប្រឹក្សាជាតិលើកទី ១ របស់ខ្លួននៅសួនច្បារ មុខវត្តបទុមវត្តី ក្រោមវត្តមានថ្នាក់ដឹកនាំគណបក្សសង្គ្រោះជាតិ និង សមាជិក សមាជិកាជាច្រើននាក់ផ្សេងទៀត។ ក្រោយធ្វើសន្និបាតពេញមួយព្រឹក គណបក្សនេះ បានអនុម័តនូវចំណុចសំខាន់ចំនួន ៧ ក្រោមការអបអរសាទរពីសំណាក់អ្នកគាំទ្ររាប់ពាន់នាក់ដែលបានចូលរួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
សេចក្តីសម្រេចទាំង ៧ ចំណុចនោះរួមមានដូចជា ទី១អង្គសន្និបាតគាំទ្រគោលនយោបាយ និង គោលជំហររបស់គណបក្សសង្គ្រោះជាតិ ។ ទី២ គាំទ្រជាគោលការណ៍នូវកិច្ចព្រមព្រៀងបញ្ចប់វិបត្តិនយោបាយ រវាងគណបក្សកាន់អំណាច និង គណបក្សប្រឆាំង ទី ៣ គាំទ្ររូបមន្ត ៤-៤-១ ក្នុងការរៀបចំសមាសភាពគណៈកម្មាធិការជាតិរៀបចំការបោះឆ្នោត និង ទាមទារឲ្យគណបក្សទាំងពីរព្រមព្រៀងគ្នាជាមុន លើសមាសភាពមួយរូបដែលត្រូវឯកភាពគ្នា មុនពេលដែលបេក្ខជនជាប់ឆ្នោតគណបក្សសង្គ្រោះជាតិចូលធ្វើសច្ចាប្រណិធាន និង ចូលប្រជុំសភា។
ទី ៤ គាំទ្រការកែទម្រង់ស្ថាប័នរដ្ឋសភា ដើម្បីឲ្យស្ថានប័នមួយនេះ មានតុល្យភាពអំណាច។ ទី ៥ ក្រោយចូលសភា តំណាងរាស្ត្រគណបក្សប្រឆាំងត្រូវវង្កើនសកម្មភាពទ្វេឡើង ក្នុងការទាមទារឲ្យធ្វើការកែទម្រង់ស្ថាប័នជាតិសំខាន់ៗ ។ទី ៦ អ្នកតំណាងរាស្ត្រគណបក្សសង្គ្រោះជាតិ ជម្រុញឲ្យរដ្ឋាភិបាលយកគោលនយោបាយទាំង ៧ ចំណុចរបស់គណបក្សសង្គ្រោះជាតិទៅអនុវត្ត ។ ទី ៧ តំណាងរាស្ត្រគណបក្សសង្គ្រោះជាតិ ការពារយុត្តិធម៌សង្គម បូរណភាពទឹកដី និង ផលប្រយោជន៍ប្រជាពលរដ្ឋខ្មែរ។
លោក សម រង្ស៊ី ប្រធានគណបក្សសង្គ្រោះជាតិ បានបញ្ជាក់ថា ការជ្រើសរើសសមាជិកទី ៩ នៃសមាសភាពគ.ជ.ប នឹងត្រូវធ្វើឡើងនៅថ្ងៃស្អែកនេះ ពេលដែលរដ្ឋសភាបើកកិច្ចប្រជុំប្រកាសសុពលភាពរបស់លោកជាតំណាងរាស្ត្រ។
សូមបញ្ជាក់ថា នៅក្នុងសន្និបាតព្រឹកមិញនេះ លោក សម រង្ស៊ី និង លោក កឹម សុខា ប្រធាន និង អនុប្រធានគណបក្សសង្គ្រោះជាតិ បានបកស្រាយយ៉ាងច្រើនពីមូលហេតុដែលគណបក្សសង្គ្រោះជាតិព្រមចូលសភាធ្វើការជាមួយគណបក្សប្រជាជនកម្ពុជា ។ ជាការបកស្រាយក្រោយពីគណបក្សប្រឆាំង រងការិះគន់យ៉ាងចាស់ដៃពីសំណាក់អ្នកគាំទ្ររបស់ខ្លួន បន្ទាប់ពី គណបក្សសង្គ្រោះជាតិសម្រេចកិច្ចព្រព្រៀងបញ្ចប់នយោបាយជាមួយគណបក្សប្រជាជនកម្ពុជាកាលពីថ្ងៃទី ២២ កក្កដា កន្លងទៅ។
ទាំងលោក សម រង្ស៊ី និង លោក កឹម សុខា សុទ្ធតែបង្ហាញពីសុទុដ្ខិនិយមចំពោះកិច្ចចរចា ពីព្រោះវាជាជោគជ័យសម្រាប់បក្សប្រឆាំងក្នុងទាមទារឲ្យមានការកែទម្រង់ការបោះឆ្នោត និង ទទួលបានប្រព័ន្ធផ្សព្វផ្សាយដោយខ្លួនឯង។ លោក សម រង្ស៊ី បានគូសបញ្ជាក់ ថា ទាល់តែមានអំណាចនៅក្នុងដៃ ទើបគណបក្សសង្គ្រោះជាតិអាចដោះស្រាយបញ្ហាសង្គមនានាជូនប្រជាពលរដ្ឋបាន។
ជាមួយគ្នានោះ គណបក្សសង្គ្រោះជាតិ ក៏បានបង្ហាញពីទិសដៅយុទ្ធសាស្ត្រ និង សកម្មភាព មួយចំនួននៅពេលខាងមុខរបស់គណបក្សផងដែរ។ ជាទិសដៅយុទ្ធសាស្ត្រមានដល់ទៅ ២៤ ចំណុច ដូចជាទាមទារឲ្យបើកទីលានប្រជាធិបតេយ្យ ដកបម្រាមជួបជុំ កែទម្រង់ប្រព័ន្ធយុត្តិធម៌ និង ធ្វើវិសោធនកម្មរដ្ឋធម្មនុញ្ញតាមសំឡេង ២ ភាគ៣ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ