គណបក្សសង្គ្រោះជាតិ នឹងធ្វើសន្និបាតក្រុមប្រឹក្សាជាតិ នៅសួនច្បារ មុខវត្តបុទម ថ្ងៃ២៧កក្កដា
គណបក្សសង្គ្រោះជាតិ នឹងរៀបចំធ្វើសន្និបាតក្រុមប្រឹក្សាជាតិ លើកទី១ នាថ្ងៃទី២៧កក្កដា នៅព្រឹកថ្ងៃអាទិត្យ ទី២៧ កក្កដា នៅសួនច្បារ មុខវត្តបទុមវត្តី។ បន្ទាប់ពីកិច្ចប្រជុំនៅរសៀលម៉ោង ៣ ថ្ងៃសុក្រនេះ អាជ្ញាធរសាលារាជធានីភ្នំពេញ បានព្រមព្រៀង ឲ្យគណបក្សសង្គ្រោះជាតិ ជួបជុំមនុស្ស ៥០០០នាក់ ហើយសម្រេចផ្តល់កិច្ចការពារសន្តិសុខ នៅខាងក្រៅកន្លែងជួបជុំ រីឯសន្តិសុខនៅក្នុងពិធីជួបជុំ ជាភារកិច្ចរបស់គណបក្សសង្គ្រោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
បន្ទាប់ពីត្រូវរ៉ូវគ្នាខាងនយោបាយរួចមក គណបក្សសង្គ្រោះជាតិ អាចយកសួនច្បារ មុខវត្តបទុម ជិតផ្ទះលោកនាយករដ្ឋមន្ត្រី ហ៊ុន សែន ដើម្បីជួបជុំ ធ្វើសន្និបាតគណបក្ស នាព្រឹកថ្ងៃអាទិត្យ ទី២៧កក្កដា។ គម្រោងរៀបចំជួបជុំនោះ ត្រូវបានអាជ្ញាធររាជធានីភ្នំពេញ បានសម្រេចព្រមព្រៀងជាគោលការណ៍រួចហើយ។
អាជ្ញាធរសាលារាជធានីភ្នំពេញ បានជួបប្រជុំជាមួយតំណាងគណបក្សសង្គ្រោះជាតិ កាលពីម៉ោង ៣ រសៀលថ្ងៃទី២៥កក្កដានេះ ដើម្បីជជែកឲ្យច្បាស់ពីបញ្ហាសន្តិសុខ និងបញ្ហាអនាម័យ ជាដើម សម្រាប់ពិធីជួបជុំនោះ។ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានឲ្យដឹងថា អាជ្ញាធរបានសម្រេចអនុញ្ញាតឲ្យគណបក្សសង្គ្រោះជាតិ ជួបជុំនៅថ្ងៃអាទិត្យខាងមុខ ហើយអាជ្ញាធរនឹងផ្តល់កិច្ចការពារសន្តិសុខពីខាងក្រៅ ហើយគណបក្សសង្គ្រោះជាតិ ត្រូវទទួលខុសត្រូវលើសន្តិសុខ និងបញ្ហាអនាម័យ ក្នុងពិធីជួបជុំនាព្រឹកថ្ងៃអាទិត្យនោះ។
សន្និបាតក្រុមប្រឹក្សាជាតិ លើកទី១ នៅថ្ងៃទី២៧ ខែកក្កដា របស់គណបក្សសង្គ្រោះជាតិ នឹងមានអ្នកចូលរួមប្រមាណជា ៥ ពាន់នាក់ ដែលជាថ្នាក់ដឹកនាំ និងសមាជិកក្រុមប្រឹក្សាឃុំសង្កាត់ របស់គណបក្សសង្គ្រោះជាតិ មកពីទូទាំងប្រទេស។
លោក កឹម សុខា អនុប្រធានគណបក្សសង្គ្រោះជាតិ បានបញ្ជាក់ថា សន្និបាតថ្ងៃ២៧កក្កដានេះ លោកនឹងដាក់ទិសដៅទៅមុខ សម្រាប់គណបក្សសង្គ្រោះជាតិ ដើម្បីឲ្យបង្កើនសកម្មភាពរបស់ខ្លួន។ តាមលោក កឹម សុខា មកដល់ឥឡូវនេះ ប្រជាពលរដ្ឋ ហាក់ដូចជាស្រពិចស្រពិលនឹងគោលជំហររបស់គណបក្សសង្គ្រោះជាតិ។ ដូច្នេះតំណាងរាស្ត្រ និងថ្នាក់ដឹកនាំបក្សប្រឆាំង ត្រូវបង្កើនការងារ ពី ១ ដល់១០។ ពោលគឺតំណាងរាស្ត្របក្សប្រឆាំង ត្រូវបង្កើនសកម្មភាពជួយប្រជារាស្ត្រឲ្យខ្លាំងជាងមុន និងចុះទៅគ្រប់ទិសទី ដើម្បីពន្យល់ពីគោលជំហរ និងការសម្រេចចិត្តរបស់បក្សប្រឆាំង លើការបញ្ចប់វិបត្តិនយោបាយ ហើយចូលប្រជុំរដ្ឋសភា ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ