អ្នកមានជម្លោះដីធ្លីនៅកំពង់ស្ពឺស្វែងរកអន្តរាគមន៍ពីសង្គមស៊ីវិលក្រោយអស់ជំនឿលើស្ថាប័នរដ្ឋ
ប្រជាពលរដ្ឋដែលកំពុងមានជម្លោះដីធ្លីមកពីខេត្តកំពង់ស្ពឺ បានស្វែងរកការអន្តរាគមន៍ពីសមាគមអាដហុកនៅក្នុងរាជធានីភ្នំពេញ បន្ទាប់ពីពួកគេអស់ជំនឿលើស្ថាប័នរដ្ឋ។ តំណាងប្រជាពលរដ្ឋដែលមានជម្លោះដីធ្លីទាំងនេះបានអះអាងនៅក្នុងសន្និសីទកាសែតនៅទីស្នាក់ការកណ្តាលសមាគមអាដហុកនៅព្រឹកថ្ងៃទី២៩ ឧសភានេះថា ពួកគេបានស្វែងរកការអន្តរាគមន៍ និងដំណោះស្រាយពីអាជ្ញាធរគ្រប់លំដាប់ថ្នាក់ជាបន្តបន្ទាប់នាពេលកន្លងមក ប៉ុន្តែមិនមានអាជ្ញាធរណាចេញមុខដោះស្រាយនោះទេ ហើយថែមទាំងគំរាមកំហែងលើពួកគាត់ទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ប្រជាពលរដ្ឋប្រមាណ៦០នាក់តំណាងឲ្យ ២៥០គ្រួសារដែលកំពុងមានបញ្ហាជម្លោះដីធ្លីនៅក្នុងស្រុកភ្នំស្រួច ខេត្តកំពង់ស្ពឺ បានមកស្វែងរកកិច្ចអន្តរាគមន៍ដោយផ្ទាល់ពីសមាគមអាដហុកនៅក្នុងរាជធានីភ្នំពេញ។
អ្នកស្រី សៅ ពុំ តំណាងប្រជាពលរដ្ឋមានជម្លោះដីធ្លីបានឲ្យដឹងនៅក្នុងសន្និសីទកាសែតនៅព្រឹកថ្ងៃព្រហស្បតិ៍នេះថា ប្រជាពលរដ្ឋក្នុងភូមិចំនួនបី គឺ ភូមិតាំងសំរោង ភូមិក្រាំងបឹង និង ភូមិខ្នងក្រាំង ក្នុងឃុំសំរោង ស្រុកភ្នំស្រួច កំពុងមានជម្លោះដីធ្លីយ៉ាងរ៉ាំរ៉ៃជាមួយក្រុមហ៊ុន ម៉ាស្ទ័រ អ៊ីនធឺណេសិនណល។ ជម្លោះដីធ្លីនេះ បានកើតឡើងតាំងពីអំឡុងឆ្នាំ២០០៥ និង ២០០៦ ហើយនៅក្នុងឆ្នាំ២០១០ ក្រុមហ៊ុនម៉ាស្ទ័រ អ៊ីនធឺណេសិនណល បានយកគ្រឿងចក្រទៅឈូសឆាយលើដីស្រែចម្ការរបស់ពួកគេ ដោយមានការចួលរួមការពារពីសំណាក់អាជ្ញាធរផងដែរ។
អ្នកស្រី សៅ ពុំ បានបញ្ជាក់ថា ប្រជាពលរដ្ឋធ្លាប់បានស្វែងរកការដោះស្រាយពីអាជ្ញាធរមូលដ្ឋានតាំងពីថ្នាក់ភូមិ ឃុំ ស្រុក ខេត្ត តែអាជ្ញាធរមិនអើពើនោះទេ។ ហើយប្រជាពលរដ្ឋក៏បានធ្វើដំណើរមកស្វែងរកការអន្តរាគមន៍ពីស្ថាប័នរដ្ឋកំពូលៗដូចជា ទីស្តីការគណៈរដ្ឋមន្ត្រី ខុទ្ទកាល័យនាយករដ្ឋមន្ត្រី និងក្រសួងដែនដីនគរូបនីយកម្ម និងសំណង់ផងដែរ តែមិនទទួលបានលទ្ធផលនោះទេ។ តំណាងប្រជាពលរដ្ឋបានលើកឡើងបន្ថែមថា ដីដែលមានទំនាស់នោះមានទំហំ៩៥០ហិកតា ហើយពួកគាត់បានកាន់កាប់ដីទាំងនេះតាំងពីឆ្នាំ១៩៨៥ មកម្លេះ។
អាជ្ញាធរដែនដី និងក្រសួងដែនដីនគរូបនីយកម្ម និងសំណង់ មិនអាចទាក់ទងសុំបំភ្លឺជុំវិញការចោទប្រកាន់ថា មិនអើពើនឹងជម្លោះដីធ្លីនៅកំពង់ស្ពឺនេះបាននៅឡើយនោះទេ នៅព្រឹកថ្ងៃព្រហស្បតិ៍ ទី២៩ឧសភានេះ។
ដោយឡែក លោក នី ចរិយា ប្រធានផ្នែកស៊ើបអង្គេតនៃសមាគមអាដហុក បានមានប្រសាសន៍ឲ្យដឹងថា សមាគមអាដហុកនឹងធ្វើការសិក្សារយៈពេលខ្លី លើឯកសារពាក់ព័ន្ធនានាលើជម្លោះដីធ្លីនេះ ហើយធ្វើការសហការជាមួយអាជ្ញាធរដែនដីដើម្បីដោះស្រាយបញ្ហាដីទំនាស់ទាំងនេះ។ លោក នី ចរិយា បានសង្កត់ធ្ញន់ថា អាជ្ញាធរត្រូវធ្វើការស៊ើបអង្កេតនៅកន្លែងកើតហេតុនៅពេលប្រជាពលរដ្ឋប្តឹង ហើយត្រូវបញ្ឈប់ក្រុមហ៊ុន កុំឲ្យធ្វើការឈូសឆាយលើដីមានជម្លោះ។ យ៉ាងណាក៏ដោយ សមាគមអាដហុកនឹងធ្វើការជាមួយប្រជាពលរដ្ឋទាំងនេះដើម្បីឲ្យពួកគាត់ទទួលបានដីទាំងនោះមកធ្វើស្រែចម្ការឡើងវិញ។
ជាមួយគ្នានេះដែរ តំណាងប្រជាពលរដ្ឋបានអះអាងថា ពួកគាត់នឹងធ្វើតវ៉ាដើម្បីកាន់កាប់ដីរបស់ពួកគាត់វិញ ទោះបីត្រូវរងការបង្ក្រាបពីសំណាក់អាជ្ញាធរបែបណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ