កំណែទម្រង់ការបោះឆ្នោត៖ សង្គមស៊ីវិលផ្តល់អនុសាសន៍ដល់រដ្ឋាភិបាលកម្ពុជា និងជប៉ុន
នៅថ្ងៃសុក្រទី២៣ឧសភានេះ សង្គមស៊ីវិលដែលមានជំនាញលើការបោះឆ្នោតនៅកម្ពុជា បានផ្តល់អនុសាសន៍ចំនួន១០ចំណុចទៅកាន់ប្រតិភូជប៉ុន និង រដ្ឋាភិបាលតាមរយៈក្រសួងមហាផ្ទៃសម្រាប់កំណែទម្រង់ការបោះឆ្នោត។ អនុសាសន៍ទាំង១០ចំណុចនោះ មានកំណែទម្រង់គ.ជ.ប កំណែទម្រង់បញ្ជីឈ្មោះអ្នកបោះឆ្នោត និងយន្តការដោះស្រាយជម្លោះបោះឆ្នោតជាដើម។ ក្រៅពីកំណែទម្រង់គ.ជ.ប រដ្ឋសភាជាតិក៏ត្រូវបានសង្គមស៊ីវិលផ្តល់អនុសាសន៍មួយចំនួនទៀតដើម្បីកែលម្អផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
មាន៥ចំណុចដែលអ្នកជំនាញការបោះឆ្នោតនៅកម្ពុជាបានផ្តល់អនុសាសន៍ទៅដល់គណៈប្រតិភូកំណែទម្រង់ការបោះឆ្នោតជប៉ុន។ នេះបើតាមការបញ្ជាក់ពីលោក ហង្ស ពុទ្ធា នាយកប្រតិបត្តិអង្គការនិចហ្វិកដែលបានជួបប្រជុំជាមួយគណៈប្រតិភូជប៉ុន។
លោក ហង្ស ពុទ្ធា បានបញ្ជាក់ប្រាប់ចំណុចទាំង៥នោះរួមមាន ទី១ កំណែទម្រង់គណៈកម្មាធិការជាតិរៀបចំការបោះឆ្នោត ទី២ កំណែទម្រង់បញ្ជីឈ្មោះអ្នកបោះឆ្នោត ទី៣ យន្តការដោះស្រាយជម្លោះបោះឆ្នោត ទី៤ កំណែទម្រង់ប្រព័ន្ធផ្សព្វផ្សាយ និង ទី៥គឺប្រព័ន្ធបោះឆ្នោតប្រកបដោយតម្លាភាព។
សូមបញ្ជាក់ថា នៅព្រឹកថ្ងៃសុក្រនេះ គណៈប្រតិភូកំណែទម្រង់ការបោះឆ្នោតជប៉ុនដែលមានគ្នា១០នាក់ បានជួបប្រជុំជាមួយអង្គការដែលមានជំនាញបោះឆ្នោតនៅកម្ពុជា ដើម្បីស្វែងយល់ពីភាពមិនប្រក្រតី និងបញ្ហាបោះឆ្នោតនៅកម្ពុជា។ ជំនួបជាមួយសង្គមស៊ីវិលនេះ គឺជាជំនួបចុងក្រោយហើយសម្រាប់គណៈប្រតិភូជប៉ុន បន្ទាប់ពីបានជួបជាមួយរដ្ឋាភិបាល និងគណបក្សសង្គ្រោះជាតិ រួមទាំងគ.ជ.ប។បើតាមលោក ហង្ស ពុទ្ធា ដដែល គណៈប្រតិភូជប៉ុនមិនមានប្រតិកម្មអ្វីនោះទេ ក្រៅពីការកត់ត្រា។
សូមកត់សម្គាល់ផងដែរថា កាលពីល្ងាចថ្ងៃព្រហស្បតិ៍ទី២២ឧសភា សង្គមស៊ីវិលចំនួន៣អង្គការដោយមានជំនួយសម្របសម្រួលពីតំណាងស្ថានទូតអាមេរិក បានជួបជាមួយនឹងក្រសួងមហាផ្ទៃ។ ក្នុងនោះសង្គមស៊ីវិល បានផ្តល់អនុសាសន៍ចំនួន៥ចំណុច ដើម្បីកំណែទម្រង់គណៈកម្មាធិការជាតិរៀបចំការបោះឆ្នោត និង៥ចំណុចផ្សេងទៀតដើម្បីកំណែទម្រង់រដ្ឋសភាជាតិ។ នេះបើតាមការបញ្ជាក់ពីលោក ហង្ស ពុទ្ធានាយកប្រតិបត្តិអង្គការនិចហ្វិកដដែល។ នៅក្នុងនោះមានអនុសាសន៍៥ចំណុចដែលសង្គមស៊ីវិលផ្តល់ឱ្យគណៈប្រតិភូជប៉ុនគឺដូចគ្នាទៅនឹងអនុសាសន៍កំណែទម្រង់គ.ជ.ប។
ដោយឡែក កំណែទម្រង់រដ្ឋសភាវិញ សង្គមស៊ីវិលបានផ្តល់អនុសាសន៍ដូចជា ទី១ គឺតម្លាភាពរបស់លេខាធិការដ្ឋានសភា ទី២ ឱកាសជជែកពិភាក្សានៃគណបក្សនយោបាយដែលមានអាសនៈនៅក្នុងសភា ទី៣ ការគោរពតាមនីតិវីធីនិងបទប្បញ្ញត្តិរបស់សភា ទី៤ សិទ្ធនៃគណបក្សដែលមានសំឡេងតិចនៅក្នុងសភា និងទី៥ការទប់ស្កាត់ការអនុម័តដោយមិនឆ្លងនីតិវិធី។ ក្នុងជំនួបជាមួយលោក សក់ ស៊ីដ្ឋា រដ្ឋលេខាធិការក្រសួងមហាផ្ទៃ សង្គមស៊ីវិលដែលមានតំណាងស្ថានទូតអាមេរិកជាអ្នកសម្របសម្រួលបាន ស្នើឱ្យបង្កើតគណៈកម្មការត្រួតពិនិត្យការអនុវត្តបទបញ្ជាផ្ទៃក្នុងរបស់សភា។
លោក ហង្ស ពុទ្ធាដដែលបានបញ្ជាក់ថា អនុសាសន៍ពីសង្គមស៊ីវិលនេះ គឺដើម្បីជួយបញ្ចៀសបញ្ហាដែលកើតឡើងក្រោយបោះឆ្នោតនៅអាណត្តិក្រោយទៀត។ លោក សង្កត់ធ្ងន់ថា អនុសាសន៍សង្គមស៊ីវិលជាច្រើនមកហើយដែលបានស្នើទៅ ប៉ុន្តែរដ្ឋាភិបាលបានព្រងើយកន្តើយ។
ទាក់ទងទៅនឹងអនុសាសន៍របស់សង្គមស៊ីវិល អ្នកនាំពាក្យអង្គភាពប្រតិកម្មរហ័សនៃទីស្តីការគណៈរដ្ឋមន្ត្រី លោក ផៃ ស៊ីផាន បានស្នើឱ្យសង្គមស៊ីវិលគោរពតួនាទីរបស់ខ្លួន។ អ្នកនាំពាក្យដដែលរូបនេះ បានរិះគន់សហរដ្ឋអាមេរិកថាបានលូកដៃចូលកិច្ចការផ្ទៃក្នុងរបស់កម្ពុជា។ លោកបញ្ជាក់ថា រដ្ឋាភិបាលកម្ពុជា និងសង្គមស៊ីវិល រួមទាំងប្រជាជាតិកម្ពុជាទាំងមូលមិនទាន់ជាសត្រូវនឹងគ្នានោះទេ ដែលត្រូវការឱ្យមានសហរដ្ឋអាមេរិកជាអ្នកសម្របសម្រួលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ