ក្រុមការងារគណបក្សទាំងពីរពិភាក្សាទាំងនយោបាយ និងយន្តការកំណែទម្រង់ការបោះឆ្នោត
ដូចការគ្រោងទុកនៅព្រឹកថ្ងៃព្រហស្បតិ៍ទី២២ ឧសភានេះ តំណាងចរចាពីគណបក្សប្រជាជនកម្ពុជា និងគណបក្សសង្គ្រោះជាតិ បានជួបប្រជុំគ្នាជាលក្ខណៈឯកជនហើយ ចំពោះវិបត្តិនយោបាយនៅកម្ពុជាដែលកំពុងអូសបន្លាយក្រោយការបោះឆ្នោត។ គណបក្សទាំងពីរបានលើកយកយន្តការកំណែទម្រង់ការបោះឆ្នោត និងការពិភាក្សាកញ្ចប់នយោបាយ ដើម្បីបិទបញ្ចប់វិបត្តិនយោបាយក្រោយការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
យន្តការកំណែទម្រង់ការបោះឆ្នោត និង នីតិវិធីដំណើរការងារនៃគណៈកម្មការចម្រុះនៃគណបក្សទាំងពីរ រួមទាំងការព្រមព្រៀងជាលក្ខណៈកញ្ចប់នយោបាយ ដើម្បីបិទបញ្ចប់ជម្លោះនយោបាយក្រោយការបោះឆ្នោត គឺជាប្រធានបទដែលតំណាងគណបក្សទាំងពីរបានពិភាក្សាគ្នានៅព្រឹកនេះ។
តំណាងក្រុមចរចានៃគណបក្សសង្គ្រោះជាតិ លោក គួយ ប៊ុនរឿន បានវិទ្យុបារាំងអន្តរជាតិក្រោយកិច្ចប្រជុំបន្តិចថា គណបក្សទាំងពីរនៅមិនទាន់កំណត់ថ្ងៃជួបប្រជុំគ្នាសាជាថ្មីម្តងទៀតនោះទេ។ ពោលគឺតំណាងគណបក្សនីមួយៗត្រូវរាយការណ៍ជូនថ្នាក់ដឹកនាំ និងសុំការអនុញ្ញាត។ លោកបន្តថា គណបក្សទាំងពីរកំពុងតែបំពេញចំណុចលម្អិតៗថែមទៀតដើម្បីធានាដល់ការបោះឆ្នោតនៅកម្ពុជា នៅពេលខាងមុខជាបន្តទៀត។
ដោយឡែក តំណាងចរចានៃគណបក្សប្រជាជនកម្ពុជា លោកព្រុំ សុខា វិញបានថ្លែងថា កិច្ចប្រជុំឯកជននេះ គឺដើម្បីពិភាក្សាបើកផ្លូវឱ្យមានការប្រជុំផ្លូវការមួយនៅពេលខាងមុខដើម្បីឈានទៅសម្រេចកិច្ចព្រមព្រៀងនយោបាយ នាពេលខាងមុខផងដែរ។
ប៉ុន្តែ យ៉ាងណាក៏ដោយ ក្នុងកិច្ចប្រជុំប្រមាណជិត៣ម៉ោងពីម៉ោង៩:៣០នាទីដល់ម៉ោង ១១ លោកគួយ ប៊ុនរឿន បានបញ្ជាក់ថាគណបក្សទាំងពីរបានឈរលើស្មារតីឯកភាពគ្នា និងមានសុឆន្ទៈដើម្បីដោះស្រាយនិងបិទបញ្ចប់បញ្ហាសាំញ៉ាំទាក់ទងការបោះឆ្នោតនៅកម្ពុជា។
សូមរម្លឹកជូនថា ការជួបប្រជុំគ្នានៃតំណាងក្រុមចរចានៃគណបក្សទាំងពីរនេះគឺស្របពេលដែលប្រតិភូកំណែទម្រង់ការបោះឆ្នោតរបស់ជប៉ុន បានកំពុងបំពេញទស្សនកិច្ចនៅកម្ពុជា។ គណបក្សប្រតិភូជប៉ុនដែលបានជួបពិភាក្សាជាមួយគណបក្សកាន់អំណាច គណបក្សប្រឆាំង និងគណៈកម្មាធិការជាតិរៀបចំការបោះឆ្នោត នឹងគ្រោងជួបជាមួយអង្គការសង្គមស៊ីវិលផងដែរ។
កិច្ចពិភាក្សាជាលក្ខណៈឯកជននៅព្រឹកនេះ មានលោក ព្រុំសុខា រដ្ឋលេខាធិការក្រសួងមហាផ្ទៃ ជាតំណាងពីគណបក្សប្រជាជនកម្ពុជា រីឯលោក គួយ ប៊ុនរឿន ជាតំណាងគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ