ព្រះសក្យមុនីចេតិយគួរតែត្រូវបានថែទាំឡើងវិញ
ចុះផ្សាយនៅថ្ងៃ៖
ស្តាប់ - ០៤:១៦
ព្រោះតែកិច្ចខិតខំប្រឹងប្រែងរបស់សមត្ថកិច្ច ព្រះសុវណ្ណកោដ្ឋ និងព្រះបរមសារីរិកធាតុត្រូវបានរកឃើញមកវិញ។ ហើយការណ៍នេះបានធ្វើអោយប្រជាពុទ្ធបរិស័ទ្ធស្ងប់ចិត្ត និងអបអរសាទរយ៉ាងខ្លាំង។ នៅពេលនេះ ព្រះបរមសារីរិកធាតុដែលវត្ថុជាទីសក្ការៈដ៏កម្រត្រូវបានបានយកមករក្សាទុកនៅក្នុងព្រះបរមរាជវាំង មុននឹងយកទៅដំកល់សារជាថ្មីនៅក្នុងព្រះសក្យមុនីចេតិយ លើកំពូលព្រះរាជទ្រព្យ។ ប៉ុន្តែថា ឆ្លងកាត់បទពិសោធន៍នៃចោរកម្ម ព្រះសក្យមុនីចេតិយគួរតែត្រូវថែទាំឡើងវិញដោយម៉ត់ចត់ និងត្រឹមត្រូវបំផុត ដើម្បីអោយស័ក្តិសមជាទីសក្ការៈបូជារបស់ប្រទេសជាតិ និងរបស់ពុទ្ធសាសនិកគ្រប់មជ្ឈដ្ឋាន។
តាមរយៈបណ្តាញសង្គមគេអាចយល់បានថា តើពលរដ្ឋខ្មែរទូទៅអោយតម្លៃខ្លាំងយ៉ាងណាទៅលើវត្ថុសាកសិទ្ធិ ឬវត្ថុជាទីសក្ការៈនៃព្រះបរមសារីរិកធាតុ ដែលត្រូវបានរកឃើញវិញពីក្នុងដៃចោរខិលខូច ជាទមិឡឥតសាសនានោះ។ ម្នាក់ៗសុទ្ធតែបាននិយាយអបអរ និងសំដែងអារម្មណ៍សប្បាយរីករាយឡើងវិញចំពោះការរកឃើញព្រះសុវណ្ណកោដ្ឋ និងព្រះបរមសារីរិកធាតុ ហើយបានបង្ហោះរូបភាពចែកផ្សាយ ផ្តល់ដំណឹងតៗគ្នា។ នៅតាមបណ្តាញសារព័ត៌មានវិញ ក៏ដូចជាថ្ងៃដែលបាត់បង់វត្ថុសក្ការៈបូជានេះដែរ ព័ត៌មានស្តីពីការរកឃើញ ព្រះសុវណ្ណកោដ្ឋ និងព្រះបរមសារីរិកធាតុបានគ្របដណ្តប់លើទំព័រមុខសារព័ត៌មានទាំងអស់។ នេះក៏បង្ហាញថាប្រធានបទនេះ ជាប្រធានបទថ្នាក់ជាតិ ដែលទាក់ទាញដោយអ្នកអាន អ្នកស្តាប់ និងអ្នកទស្សនាក្នុងទូទាំងប្រទេស។ បើទោះជាមានមតិខ្លះបង្ហាញអំពីការសង្ស័យ និងបារម្ភអំពីភាពមិនពិតនៃវត្ថុដែលត្រូវបានរកឃើញមកវិញនោះក៏ដោយ មតិទាំងនេះក៏បង្ហាញអំពីការផ្តល់តម្លៃទៅលើវត្ថុជាទីសក្ការៈនេះដែរ។
ខណៈព្រះសុវណ្ណកោដ្ឋ និងព្រះបរមសារីរិកធាតុត្រូវបានដង្ហែយកមករក្សាទុកនៅក្នុងព្រះបរមរាជវាំង ដោយរង់ចាំសេចក្តីសម្រេចនៃដង្ហែយកទៅដំកល់ក្នុងព្រះសក្យមុនីចេតិយនៅលើកំពូលភ្នំព្រះរាជទ្រព្យឡើងវិញ។ គឺនៅពេលនេះហើយ ដែលអ្នកពាក់ព័ន្ធទាំងអស់ត្រូវគិតគូរពិចារណាអំពីការថែរក្សា និងថែទាំឡើងវិញទីរមណីយដ្ឋានសក្ការៈបូជានោះ។
ឆ្លងកាត់ហេតុការណ៍លើកនេះ អាជ្ញាធរពាក់ព័ន្ធគួរទាញបាននូវពិសោធន៍ និងមេរៀនជាច្រើន។
ជាបឋម ទីសក្ការៈបូជាដែលធម្មតាត្រូវការ ការពារយ៉ាងតឹងរឹងនោះ បែរជាត្រូវចោរចូលលួចដោយជោគជ័យ វាពិតជាបានបង្ហាញអំពីភាពកំសោយនៃផ្នែកសន្តិសុខ ដោយមិនអាចប្រកែកបាន។
បន្ទាប់មកទៀត ប្រសិនបើគេត្រូវរៀបចំរចនាសម្ព័ន្ធគ្រប់គ្រងទីរមណីយដ្ឋានសក្ការៈមួយនេះឡើងវិញមែននោះ បញ្ហាអនាម័យក៏មិនត្រូវគេមើលរំលងដែរ។ កុំថាឡើយថាជាទីសក្ការៈបូជា សូម្បីតែទីរមណីយដ្ឋានទេសចរណ៍ ក៏គេគួរបារម្ភ និងយកចិត្តទុកដាក់អំពីបញ្ហាអនាម័យដែរ។ កន្លងមក ពលរដ្ឋអ្នកទេសចរនៅរមណីយដ្ឋានភ្នំព្រះរាជទ្រព្យធ្លាប់រអ៊ូរទាំអំពីបញ្ហាអនាម័យនេះ នៅតាមជណ្តើរឡើងទៅព្រះសក្យមុនីចេតិយ។ មិនត្រឹមតែមានសំរាមទេ ប៉ុន្តែក៏មានដែរក្លិនឆ្អេះឆ្អាបនោះ។ ប្រការនេះហើយដែលបង្ហាញអំពីការមិនគោរពបូជាសាសនានោះ។
គេគួរយល់បានថា ការសម្រេចដង្ហែព្រះបរមសារីរិកធាតុពីកណ្តាលរាជធានីភ្នំពេញ ទៅលើភ្នំព្រះរាជទ្រព្យនោះ គឺដើម្បីធ្វើយ៉ាងណាអោយទីសក្ការៈបូជានៃព្រះពុទ្ធសាសនា ស្ថិតនៅទីកន្លែងដ៏ពិសិដ្ឋ នៅដាច់ឆ្ងាយពីទីកខ្វក់គ្មានអនាម័យ នៅឆ្ងាយពីភាពរញេរញ៉ៃនៃអំពើបាបរបស់មនុស្សជាដើម។ ប៉ុន្តែ អ្វីដែលបានកើតឡើងកន្លងមកនោះ គឺអំពើបាបរបស់មនុស្សបានតាមទៅដល់ទីសក្ការៈព្រះពុទ្ធសាសនានៅលើកំពូលភ្នំតែម្តង។
តាមពិតទៅ ក្រៅពីការគោរពបូជាជារៀងរាល់ថ្ងៃនៃអ្នកទេសចរ ព្រះសក្យមុនីចេតិយក៏ត្រូវទទួលពិធីបុណ្យសាសនាដ៏ធំជារៀងរាល់ឆ្នាំ គឺបុណ្យមាឃបូជាផងដែរ។ ដូច្នេះ ព្រះសក្យមុនីចេតិយនេះ ត្រូវតែជាទីកន្លែងដែលមនុស្សផងទាំងពួងកោតខ្លាចនូវបារមី និងផ្តល់ការគោរពយ៉ាងខ្លាំង។
ដើម្បី ធ្វើអោយទីសក្ការៈនេះក្លាយជាទីកន្លែងដ៏ពិសិដ្ឋ និងមានតម្លៃនោះ អាជ្ញាធរពាក់ព័ន្ធគួររៀបចំការគ្រប់គ្រងតំបន់នេះឡើងវិញ ពិសេសផ្នែកសន្តិសុខ និងអនាម័យ។ វិធានការដ៏មានប្រសិទ្ធភាពមួយដែលគេមិនត្រូវមើលរំលងនោះ គឺការចូលរួមរបស់ប្រជាពលរដ្ឋមូលដ្ឋាន។ ថ្វីដ្បិតត្រូវមានកំលាំងសន្តិសុខផ្លូវការមែនហើយ ប៉ុន្តែអាជ្ញាធរគួរចាប់ផ្តើមបំផុសអោយមានការចូលរួមយ៉ាងសកម្មពីប្រជាពលរដ្ឋក្នុងភូមិអំពីជួយថែរក្សា និងការពារសម្បត្តិវប្បធម៌ជាតិ។ ប្រជាជនក្នុងភូមិម្នាក់ក៏អាចជាកំលាំងសន្តិសុខម្នាក់។ ប្រជាពលរដ្ឋក្នុងភូមិម្នាក់ក៏អាចជាអ្នកបោសសំអាត និងអ្នកថែរក្សាទីតាំងសក្ការៈនេះម្នាក់ទៀតដែរ។ ដូច្នេះប្រសិនបើគេអាចធ្វើយ៉ាងនេះបាន នោះទីរមណីយដ្ឋានព្រះសក្យមុនីចេតិយ នឹងអាចទទួលបានការផ្លាស់ប្តូរមុខមាត់ថ្មីថែមទៀត ហើយក៏អាចទទួលបានអ្នកទេសចរកាន់តែច្រើនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ