ជំនួបចរចាជាថ្មីរវាងបក្សជាប់ឆ្នោតទាំងពីរស្ថិតក្នុងភាពមិនច្បាស់លាស់
គិតមកដល់ថ្ងៃអាទិត្យ ទី ២០ កក្កដា នេះ ជំនួបចរចាគ្នាជាថ្មី រវាងគណបក្សជាប់ឆ្នោតទាំងពីរនៅមិនទាន់បានកំណត់នៅឡើយទេ បើទោះបីលោក សម រង្ស៊ី ប្រធានគណបក្សសង្គ្រោះជាតិបានអំពាវនាវឲ្យមានការជួបគ្នាឡើងវិញនៅថ្ងៃចន្ទ ស្អែកនេះក៏ដោយ។ គណបក្សសង្គ្រោះជាតិបានផ្តល់រូបមន្តថ្មីមួយទៀតនៃកំណែទម្រង់គ.ជ.បដល់គណបក្សប្រជាជនកម្ពុជា ប៉ុន្តែមន្ត្រីជាន់ខ្ពស់គណបក្សកាន់អំណាច បានអះអាងថា រូបមន្តថ្មីនេះមិនអាចទៅរួចនោះឡើយ។
ចុះផ្សាយនៅថ្ងៃ៖
ស្តាប់ - ០២:២១
ជំនួបចរចាជាថ្មី ដើម្បីបញ្ចប់វិបត្តិនយោបាយតាមការអំពាវនាវរបស់លោក សម រង្ស៊ី នៅថ្ងៃចន្ទស្អែកនេះ ទំនងមិនអាចកើតមានឡើងនោះទេ។ មិនអាចកើតមាន គឺដោយសារតំណាងចរចាគណបក្សជាប់ឆ្នោតទាំងពីរ នៅមិនទាន់បានទាក់ទងគ្នាកំណត់ថ្ងៃជួបចរចាជាថ្មីនោះនៅឡើយទេ។
លោក គួយ ប៊ុនរឿន ប្រធានក្រុមការងារចរចារបស់គណបក្សសង្គ្រោះជាតិ បានថ្លែងប្រាប់វិទ្យុបារាំងអន្តរជាតិនៅថ្ងៃអាទិត្យនេះថា គណបក្សសង្គ្រោះជាតិនៅមិនទាន់ទទួលបានព័ត៌មាននៃការចរចាជាថ្មីពីគណបក្សប្រជាជនកម្ពុជានៅឡើយទេ ក្រោយពីលោក សម រង្ស៊ី បានអំពាវនាវឲ្យការជួបចរចាជាថ្មីកាលពីថ្ងៃសៅរ។ ប៉ុន្តែ លោក អះអាងថា រង់ចាំទទួលដំណឹងនៅថ្ងៃចន្ទស្អែក បន្តទៀត។
លោក ព្រុំ សុខា ប្រធានក្រុមការងារចរចារបស់គណបក្សប្រជាជនកម្ពុជា មិនអាចទាក់ទងសាកសួរពីព័ត៌មាននៃការចរចានេះបាននៅឡើយទេនៅថ្ងៃអាទិត្យ ទី ២០ កក្កដា នេះ។
សូមបញ្ជាក់ថា កាលពីរសៀលថ្ងៃទី ១៨ កក្កដា លោក គួយ ប៊ុនរឿន បានជួបផ្ទាល់ក្រៅផ្លូវការជាមួយលោកព្រុំ សុខា ហើយបានផ្តល់នូវរូបមន្តថ្មី នៃកំណែទម្រង់គ.ជ.ប ជូនដល់លោក ព្រុំ សុខា ផងដែរ។ យ៉ាងណាក៏ដោយ មកដល់ថ្ងៃអាទិត្យនេះ លោក គួយ ប៊ុនរឿន បានបញ្ជាក់ថា លោកមិនទាន់ទទួលបានការឆ្លើយតប និង កំណត់ថ្ងៃចរចាពីតំណាងក្រុមការងារចរចារបស់គណបក្សប្រជាជនកម្ពុជានៅឡើយទេ។ ចំពោះរូបមន្តថ្មីនេះ លោក គួយ ប៊ុនរឿន មិនបានលម្អិតនោះទេ ដោយរង់ចាំជួបចរចាគ្នាផ្ទាល់តែម្តង ។
ក៏ប៉ុន្តែ លោក កឹម សុខា អនុប្រធានគណបក្សសង្គ្រោះជាតិ នៅក្នុងទំព័រទំនាក់ទំនងសង្គមហ្វេសប៊ុក របស់លោក បានបង្ហាញថា រូបមន្តថ្មីនោះ គឺ ក្នុងចំណោមសមាសភាព គ.ជ.ប ៩រូប លោកស្នើឲ្យមានសង្គមស៊ីវិល៣រូប គណបក្សប្រជាជនកម្ពុជា ៣រូប និងគណបក្សសង្គ្រោះជាតិចំនួន៣រូប។
យ៉ាងណាក៏ដោយ លោក ឈាង វុន មន្ត្រីជាន់ខ្ពស់ និងជាសមាជិកនៃក្រុមការងារចរចារបស់គណបក្សប្រជាជនកម្ពុជា ជឿថា រូបមន្តថ្មីរបស់គណបក្សសង្គ្រោះជាតិនេះ មិនអាចទៅរួចនោះទេ។ មិនអាចទៅរួច គឺដោយសារលោកយល់ថា សង្គមស៊ីវិលមួយចំនួនមិនមានឯករាជ្យភាព។
សូមជំរាបជូនថា គណបក្សប្រជាជនកម្ពុជា និងគណបក្សសង្គ្រោះជាតិ បានខ្វែងគំនិតគ្នា លើកំណែទម្រង់ការបោះឆ្នោត នៅត្រង់នីតិវិធីជ្រើសរើសសមាជិកគ.ជ.ប។ នោះគឺគណបក្សប្រជាជនកម្ពុជា ចង់បានការជ្រើសរើសសមាជិកគ.ជ.ប ដោយសំឡេងភាគច្រើនដាច់ខាត ឬ ៥០ភាគរយ បូក ១ នៃចំនួនសមាជិករដ្ឋសភាសរុប ១២៣ រូប។ រីឯគណបក្សសង្គ្រោះជាតិ វិញចង់បានតាមមតិ ២ ភាគ ៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ