រដ្ឋសភានឹងអនុម័តសេចក្តីព្រាងច្បាប់ស្តីពីប្រព័ន្ធតុលាការទោះជាមានការរិះគន់
ការរិះគន់នានាទាក់ទងនឹងសេចក្តីព្រាងច្បាប់សំខាន់ទាំងបីក្នុងវិស័យតុលាការមិនបានរារាំងដំណើរការនីតិវិធីរបស់រដ្ឋសភាក្នុងការអនុម័តសេចក្តីព្រាងច្បាប់ទាំងនោះទេ។ រដ្ឋសភាដែលមានតែតំណាងរាស្ត្រគណបក្សប្រជាជនកម្ពុជានឹងលើកយកសេចក្តីព្រាងច្បាប់សំខាន់ទាំងបីទៅពិភាក្សានិងអនុម័តក្នុងកិច្ចប្រជុំពេញអង្គចាប់ពីថ្ងៃទី២០ឧសភា នេះតទៅហើយ។ យ៉ាងណាក៏ដោយ សង្គមស៊ីវិលនៅតែបន្តការតស៊ូមតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ដូចការគ្រោងទុក សេចក្តីព្រាងច្បាប់សំខាន់ទាំងបីពាក់ព័ន្ធនឹងវិស័យតុលាការនឹងត្រូវរដ្ឋសភាលើកយកទៅពិភាក្សានឹងអនុម័តនៅថ្ងៃទី២០ឧសភានេះដោយគ្មានការបែប្រែឡើយបើទោះបីជាសង្គមស៊ីវិលទាមទារឲ្យផ្អាកសិនក៏ដោយ។ នេះបើតាមលោក ជាម យៀប សមាជិកគណៈកម្មាធិការអចិន្ត្រៃយ៍រដ្ឋសភាដែលបានប្រាប់វិទ្យុបារាំងអន្តរជាតិនៅថ្ងៃសុក្រនេះ។
សេចក្តីព្រាងច្បាប់ដ៏ចម្រូងចម្រាសទាំងបីនោះរួមមាន សេចក្តីព្រាងច្បាប់ស្តីពីការរៀបចំអង្គការតុលាការ សេចក្តីព្រាងច្បាប់ស្តីពីការរៀបចំនិងការប្រព្រឹត្តទៅនៃឧត្តម ក្រុមប្រឹក្សានៃអង្គចៅក្រម និងសេចក្តីព្រាងច្បាប់ស្តីពីលក្ខន្តិកៈនៃចៅក្រម និងព្រះរាជអាជ្ញា។ សេចក្តីព្រាងច្បាប់សំខាន់ទាំងបីត្រូវបាន រដ្ឋាភិបាលចាត់ទុកថាជាផ្នែកមួយដ៏សំខាន់នៃកំណែទម្រង់ ប្រព័ន្ធយុត្តិធម៌កម្ពុជា។
ប៉ុន្តែ ក្រុមអ្នកច្បាប់អង្គការសង្គមស៊ីវិលបានរិះគន់សេចក្តីព្រាងច្បាប់ដែលតាក់តែងដោយរដ្ឋាភិបាលនេះ ថាមិនអាចធានាឲ្យប្រព័ន្ធតុលាការកម្ពុជា ឯករាជ្យបានទេ។ ផ្ទុយទៅវិញ អង្គការសង្គមស៊ីវិលនៅតែមើលឃើញថា ប្រព័ន្ធតុលាការនៅតែស្ថិតក្រោមឥទ្ធិពលរបស់រដ្ឋាភិបាលតែដដែលបើទោះជា មានច្បាប់សំខាន់ទាំងបីក៏ដោយ។
ទោះបីជាការទាមទារឲ្យមានការពិភាក្សាទូលំទូលាយមិនបានសម្រេចលទ្ធផលក៏ដោយ អង្គការសង្គមស៊ីវិលក៏នៅតែបន្តការតស៊ូមតិដដែល។ មជ្ឈមណ្ឌលសិទ្ធិមនុស្សកម្ពុជាគ្រោងបើកធ្វើសន្និសីទកាសែតមួយនៅរសៀលថ្ងៃសុក្រនេះដើម្បីបង្ហាញពីចំណុចគួរឲ្យព្រួយបារម្ភមួយចំនួនដែលមាននៅក្នុងសេចក្តីព្រាងច្បាប់ទាំងនោះ ជាពិសេសទាក់ទងនឹងឧត្តមក្រុមប្រឹក្សានៃអង្គចៅក្រមដែលគេរិះគន់ថាជាស្ថាប័នស្ថិតក្រោមការគ្រប់គ្រងរបស់ក្រសួងយុត្តិធម៌។
ឆ្លើយតបនឹងការរិះគន់លោកនាយករដ្ឋមន្ត្រីហ៊ុនសែនធ្លាប់បានព្រមានអង្គការសង្គមស៊ីវិលកុំឲ្យទាមទារហួសពីដែនកំណត់នៃកិច្ចការរបស់ខ្លួន។លោកនាយករដ្ឋមន្ត្រីបញ្ជាក់ថា ច្បាប់មិនអនុញ្ញាតឲ្យរដ្ឋាភិបាលត្រូវយកសេចក្តីព្រាងច្បាប់ទៅឆ្លង អង្គការសង្គមស៊ីវិលទេ។ក៏ដូចជាលោកនាយករដ្ឋមន្ត្រីដែរលោកជាមយៀបបានអះអាងជាចុងក្រោយថារដ្ឋសភាមិនរង់ចាំផ្តល់យោបល់ពីសង្គមស៊ីវិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ