តុលាការកំពូលបន្តទាត់ចោលសំណើសុំនៅក្រៅឃុំរបស់លោក វ៉ន ពៅ និងមនុស្ស២០នាក់
តុលាការកំពូលនៅថ្ងៃសុក្រនេះ បានទាត់ចោលសំណើសុំនៅក្រៅឃុំរបស់លោក វ៉ន ពៅ និងសកម្មជនដែលជាប់ឃុំ ២០នាក់ផ្សេងទៀត ដោយតម្កល់ការសម្រេចរបស់សាលាឧទ្ធរណ៍ និងសាលាដំបូងក្រុងភ្នំពេញឲ្យនៅដដែល។ យ៉ាងណាក៏ដោយ សកម្មជនសិទ្ធិមនុស្ស បានហៅករណីនេះថា ជារឿងនយោបាយ ប៉ុន្តែមន្ត្រីក្រសួងមហាផ្ទៃបានច្រានចោល។
ចុះផ្សាយនៅថ្ងៃ៖
ស្តាប់ - ០២:១៦
មានមូលហេតុសំខាន់២ដែលតុលាការកំពូល ចាំបាច់សំរេចបន្តឃុំខ្លួនអ្នកទាំង២១នាក់ ក្នុងនោះក៏មានលោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធផងដែរ។ ទី១ គឺដោយសារសំណុំរឿងនេះ បានបិទបញ្ចប់ការស៊ើបអង្កេត និងទី២ សំណុំរឿងនេះ កំពុងស្ថិតនៅក្នុងការជំនុំជម្រះរបស់សាលាដំបូងរាជធានីភ្នំពេញនៅឡើយ។ នេះបើតាមការបញ្ជាក់ពីលោកចៅក្រម ឃឹម ប៉ុន អនុប្រធានតុលាការកំពូលនៅព្រឹកថ្ងៃទី៩ឧសភានេះ។ លោក ឃឹម ប៉ុន បានបញ្ជាក់ថា វត្ដមានរបស់ជនជាប់ចោទ នៅក្នុងអង្គសវនាការពិតជាត្រូវការជាចាំបាច់។
គួរកត់សំគាល់ថា នេះគឺជាការសំរេចច្រានចោលជាបន្តបន្ទាប់លើសំណើរសុំនៅក្រៅឃុំរបស់សកម្មជន អ្នកតវ៉ាទាំង២១នាក់ ក្នុងនោះរួមមាន តុលាការសាលាដំបូងក្រុងភ្នំពេញ សាលាឧទ្ធរណ៍ និងចុងក្រោយនេះ គឺតុលាការកំពូល។
លោក អំ សំអាត មន្ត្រីស៊ើបអង្កេតជាន់ខ្ពស់របស់អង្គការលីកាដូ ដែលបានតាមដានរឿងនេះកាលពីព្រឹកម៉ិញ បានសម្តែងការសោកស្តាយចំពោះសេចក្តីសំរេចនេះ និងហៅករណីនេះថា ជារឿងនយោបាយ។
ប៉ុន្តែលោក ខៀវ សុភ័ក្រ អ្នកនាំពាក្យក្រសួងមហាផ្ទៃបាន បដិសេធថា វាមិនមែនជាករណីនយោបាយនោះទេ តែវាជាករណីផ្លូវច្បាប់។
សូមបញ្ជាក់ថា ខណៈដែលតុលាការកំពូលកំពុងសំរេចច្រានចោលបណ្តឹងសុំនៅក្រៅឃុំរបស់អ្នកទាំង២១នាក់នេះ នៅខាងក្រៅរបងតុលាការកំពូលឯណោះវិញ ប្រជាពលរដ្ឋដូចជាសកម្មជនបឹងកក់ បុរីកីឡា និងថ្មគោល រួមទាំងពលរដ្ឋផ្សេងទៀតដែលរួមមានព្រះសង្ឃផង បានប្រមូលផ្តុំគ្នា និងបានស្រែកតវ៉ា ដោយទទូចអោយតុលាការដោះលែងសកម្មជនទាំង២១នាក់អោយមានសេរីភាពឡើងវិញ។
សំណុំរឿងរបស់លោក វ៉ន ពៅ រួមទាំងមនុស្សជាង២០នាក់នេះ កំពុងស្ថិតនៅក្នុងដៃរបស់តុលាការសាលាដំបូងក្រុងភ្នំពេញ លើកយកមកជំនុំជំរះ ចំនួន២លើករួចមកហើយ។ ការជំនុំជំរះលើកទី១ បានធ្វើឡើងកាលពីថ្ងៃទី២៥មេសា និងលើកទី២ បានធ្វើឡើងកាលពីថ្ងៃទី៦ឧសភា ហើយលើកទី៣ តុលាការសាលាដំបូងរាជធានីភ្នំពេញ គ្រោងនឹងលើកយកមកជំនុំជំរះ នៅថ្ងៃទី២០ឧសភាខាងមុខនេះ។ ក្រុមសង្គមស៊ីវិលជឿជាក់ថា ករណីរបស់ពួកគេនឹងត្រូវបញ្ចប់ ប្រសិនបើវិបត្តិនយោបាយនៅកម្ពុជាត្រូវបានដោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ