អាដហុក ព្រមានរដ្ឋាភិបាល ពីជម្លោះដីធ្លី ដែលកំពុងក្លាយជាបញ្ហាធ្ងន់ធ្ងរក្នុងសង្គមកម្ពុជា
ក្នុងពេលបង្ហាញស្ថានភាពជម្លោះដីធ្លីនៅកម្ពុជាក្នុងឆ្នាំ២០១៣ លោក ធន សារាយ ប្រធានអង្គការសិទ្ធិមនុស្ស អាដហុក បានព្រមានដល់រដ្ឋាភិបាល ពីជម្លោះដីធ្លី ដែលកំពុងក្លាយជាបញ្ហាធ្ងន់ធ្ងរក្នុងសង្គមកម្ពុជា។ តាមអាដហុក ជម្លោះដីធ្លីចាប់ពីឆ្នាំ២០០០ រហូតដល់ឆ្នាំ២០១៣ មានមនុស្សចំនួន ៧៧០.០០០ នាក់ ត្រូវបានទទួលរងផលប៉ះពាល់យ៉ាងធ្ងន់ធ្ងរ។ ក្នុងឆ្នាំ២០១៣ មានការចោទប្រកាន់មនុស្ស ១០៩ នាក់ ចាប់ខ្លួន ៤៣ នាក់ ហើយជាប់ពន្ធនាគារ ១៩ នាក់។ ក្នុងឆ្នាំ២០១២ មានការចាប់ខ្លួនមនុស្ស ២៣២ នាក់។ ប៉ុន្តែរយៈពេលបីខែ ដើមឆ្នាំ២០១៤ ជម្លោះដីធ្លីបានផ្ទុះឡើងវិញ ដោយមានមនុស្ស ៤៨ នាក់ ត្រូវបានគេចោទប្រកាន់ និងចាប់ខ្លួន និង ១២ នាក់ ត្រូវគេដាក់ក្នុងពន្ធនាគារ។
ចុះផ្សាយនៅថ្ងៃ៖
ស្តាប់ - ០២:៥៥
មានមនុស្សចំនួន ៧៧០.០០០ នាក់ ស្មើនឹង ៦% នៃចំនួនប្រជាជនកម្ពុជាសរុប ត្រូវបានទទួលរងផលប៉ះពាល់យ៉ាងធ្ងន់ធ្ងរ ដោយសារការទន្ទ្រានដីធ្លី ពីឆ្នាំ២០០០ ដល់ឆ្នាំ២០១។ នេះបើតាមអង្គការអាដហុក។
នៅឆ្នាំ២០១៣ អាដហុក បានទទួលបណ្តឹងលើវិវាទដីធ្លី ១៣៥ ករណី ក្នុងនោះ មានមនុស្ស ១០៩ នាក់ ត្រូវបានចោទប្រកាន់ ចាប់ខ្លួន ៤៣ នាក់ និងដាក់ក្នុងពន្ធនាគារ ១៩ នាក់។ ក្នុងឆ្នាំ២០១២ មានការចាប់ខ្លួនមនុស្ស ២៣២ នាក់។
ដោយឡែក ក្នុងរយៈពេល ៣ ខែ ដើមឆ្នាំ២០១៤ អាដហុក បានកត់ត្រាថា យ៉ាងហោចណាស់ មានមនុស្ស ៤៨ នាក់ ត្រូវបានចោទប្រកាន់ និងចាប់ខ្លួន និង ១២ នាក់ ត្រូវបានគេដាក់ក្នុងពន្ធនាគារ។
យោងតាមស្ថានភាពជម្លោះដីធ្លីខាងលើ លោក ធន សារាយ ប្រធានអង្គការអាដហុក បានព្រមានដល់រដ្ឋាភិបាល នៅក្នុងសន្និសីទកាសែត នាព្រឹកថ្ងៃទី៨ឧសភាថា ជម្លោះដីធ្លីដ៏រ៉ាំរ៉ៃនេះ ជាការទទួលខុសត្រូវរបស់រដ្ឋាភិបាល។ រដ្ឋាភិបាល ត្រូវតែប្រញាប់ដោះស្រាយ ខណៈដែលនៅដើមឆ្នាំ២០១៤ ជម្លោះដីធ្លី បានផ្ទុះឡើងមកវិញ។
តាមលោក ធន សារាយ បញ្ហាដីធ្លី ជាកត្តាមួយដ៏សំខាន់ ដែលធ្វើឲ្យប៉ះពាល់ដល់លទ្ធផលបោះឆ្នោត កាលពីខែកក្កដា ឆ្នាំ២០១។ ពោលគឺគណបក្សប្រជាជនកម្ពុជា ដែលបានដឹកនាំរដ្ឋាភិបាលច្រើនឆ្នាំមកហើយ បានបាត់បង់សន្លឹកឆ្នោត ដោយសារតែបញ្ហាដីធ្លី។
លោក ធន សារាយ បានស្នើដល់រដ្ឋាភិបាល ឲ្យបញ្ឈប់ទាំងស្រុង នូវការផ្តល់ដីសម្បទានសេដ្ឋកិច្ច ដល់ក្រុមហ៊ុនឯកជន សម្រាប់អភិវឌ្ឍន៍វិស័យកសិកម្ម ខណៈដែលរដ្ឋាភិបាល បានសម្រេចផ្អាកជាបណ្តោះអាសន្ននូវការផ្តល់ដីសម្បទានសេដ្ឋកិច្ច កាលពីឆ្នាំ២០១។ ក្នុងនោះ រដ្ឋាភិបាល ក៏ត្រូវរៀបចំគោលនយោបាយ សម្រាប់ការបណ្តេញចេញ ឲ្យស្របតាមស្តង់ដារអន្តរជាតិ ជាដើម។
អាដហុក ក៏បានលើកឡើងថា ក្នុងឆ្នាំ២០១៣ មិនមានការផ្តល់ដីសម្បទានសេដ្ឋកិច្ចថ្មីៗទៀតនោះទេ ខណៈដែលមានការផ្តល់ដីចំនួន ជាង ២ លាន ៦ សែនហិកតា ដល់ក្រុមហ៊ុនឯកជន គិតត្រឹមឆ្នាំ២០១។ ក្នុងនោះ រដ្ឋាភិបាល បានរឹបអូសដីសម្បទានសេដ្ឋកិច្ចមកវិញ ច្រើនជាង ៣៣០.០០០ ហិកតា។ ក្នុងឆ្នាំ២០១៣ មានករណីជម្លោះដីធ្លី ចំនួន ២៩ ករណី ទាក់ទងនឹងដីសម្បទានសេដ្ឋកិច្ច ដែលរដ្ឋាភិបាល ប្រគល់ឲ្យក្រុមហ៊ុនឯកជន។ ភាគច្រើន កើតឡើងនៅតំបន់ភាគឥសាន។
រីឯដីសម្បទានសង្គមកិច្ច ត្រូវបានអាដហុក បង្ហាញថា នៅឆ្នាំ២០១៣ មានចំនួន ៤៨៥ កន្លែង មានផ្ទៃដីសរុប ជាង ៦ សែន ២ម៉ឺន ហិកតា។ នៅឆ្នាំ២០១២ ដីសម្បទានសង្គមកិច្ច មាន ៣៨ កន្លែង គ្របដណ្តប់លើផ្ទៃដីសរុប ជាង ១ សែនហិកតា។
លោក ផៃ ស៊ីផាន អ្នកនាំពាក្យរដ្ឋាភិបាល បានចាត់ទុករបាយការណ៍របស់អាដហុក ថាជាការឆ្លុះបញ្ចាំងពីស្ថានភាពដីធ្លី កាលពីអតីតកាល។ ប៉ុន្តែសព្វថ្ងៃ លោកអះអាងថា រដ្ឋាភិបាល កំពុងដោះស្រាយបញ្ហាដីធ្លី ដោយសម្របសម្រួលឲ្យអាជ្ញាធរដែនដី ទទួលបណ្តឹង ដោះស្រាយនៅនឹងកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ