អតីតអ្នកភូមិបឹងកក់នឹងរៀបចំធ្វើសន្និសីទកាសែតពីផែនការតវ៉ាបន្ត
អតីតប្រជាពលរដ្ឋនៅសហគមន៍បឹងកក់ នឹងធ្វើសន្និសីទកាសែតនៅថ្ងៃស្អែក ដើម្បីបញ្ជាក់ជំហរតវ៉ារបស់ពួកគេ។ តំណាងប្រជាពលរដ្ឋថ្លែងថា ពួកគេនឹងដាក់ផែនការជាថ្មីក្នុងការទាមទារសំណងបន្ថែម ដោយបោះតង់ ហូបចុក និងស្នាក់នៅមុខសាលាក្រុងភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ក្រុមអតីតប្រជាពលរដ្ឋបឹងកក់ដែលធ្លាប់ត្រូវបានបណ្តេញចេញពីកន្លែងរស់នៅ បានប្រកាសឲ្យដឹងថា ពួកគេនឹងរៀបចំធ្វើសន្និសីទកាសែតមួយនៅព្រឹកថ្ងៃចន្ទទី០៥ ខែឧសភា ឆ្នាំ២០១៤ ស្អែកនេះដើម្បីបង្ហាញពីជំហរតវ៉ារបស់ពួកគេ និងចង់បញ្ជាក់ពីវត្ថុបំណងច្បាស់លាស់ថា ពួកគេមិនជាប់ពាក់ព័ន្ធនឹងនយោបាយឡើយ។
អ្នកស្រី សយ កូឡាប តំណាងអតីតប្រជាជនបឹងកក់មួយរូប បានថ្លែងប្រាប់វិទ្យុបារាំងអន្តរជាតិ RFI នៅថ្ងៃនេះថា សកម្មភាពតវ៉ារបស់ពួកគេគឺក្នុងនាមជាជនរងគ្រោះនៃការបណ្តេញចេញ ហើយការត្រឡប់មកតវ៉ានាពេលនេះគឺមិនមានការឡូកឡំនឹងរឿងនយោបាយឡើយ។ ប្រតិកម្មតាមរយៈការធ្វើសន្និសីទកាសែតថ្ងៃចន្ទស្អែកនេះ គឺធ្វើឡើងបន្ទាប់ពីលោក ឡុង ឌីម៉ង់ អ្នកនាំពាក្យសាលារាជធានីភ្នំពេញកាលពីដើមសប្តាហ៍នេះ បានហៅការតវ៉ារបស់ប្រជាជនទាំងនេះថាអាចមានការជម្រុញណាមួយពីនយោបាយ។
កាលពីថ្ងៃចន្ទទី២៨ មេសា កន្លងទៅនេះ សហគមន៍អតីតបឹងកក់ បានអះអាងថាពួកគេមានគ្នា៦០០នាក់ ហើយមានគម្រោងធ្វើការតវ៉ាដោយបោះតង់នៅខាងមុខសាលាក្រុងទាំងថ្ងៃទាំងយប់រយៈពេលបីថ្ងៃ ដើម្បីទាមទារសំណងបន្ថែម ចំនួន ២ម៉ឺនដុល្លារ និងស្នើសុំដីទំហំ៥ម៉ែត្រ គុណនឹង១៦ម៉ែត្រ ចម្ងាយប្រមាណពី៣ទៅ៥គីឡូម៉ែត្រពីតំបន់អភិវឌ្ឍន៍បឹងកក់។ ក៏ប៉ុន្តែ ការប៉ុនប៉ងនេះមិនអាចធ្វើទៅរួចឡើយ ដោយសារតែមានការប្រមូលផ្តុំតិចតួច ហើយម្យ៉ាងទៀត សាលារាជធានីភ្នំពេញក៏បានទទួលយកសំណើរបស់អ្នកតវ៉ាទៅពិចារណាដែរ។
នៅថ្ងៃនេះដែរ អ្នកស្រី សយ កូឡាប បានអះអាងថា ការតវ៉ានឹងមិនបញ្ចប់ឡើយ។ បន្ទាប់ពីការប្រកាសប្រាប់មហាជនថា ការតវ៉ារបស់អតីតអ្នកបឹងកក់មិនពាក់ព័ន្ធនឹងនយោបាយហើយ ពួកគេនឹងដាក់កាលបរិច្ឆេទជាថ្មីដើម្បីធ្វើការទាមទារនៅមុខសាលាក្រុង តាមគម្រោងដដែល ប្រសិនបើគ្មានដំណោះស្រាយណាមួយនោះទេ។ មន្ត្រីសាលារាជធានីភ្នំពេញនៅថ្ងៃនេះមិនមានការពន្យល់អ្វីឡើយទាក់ទងទៅនឹងសកម្មភាពរបស់អតីតអ្នកបឹងកក់ទាំងនេះ។
សូមបញ្ជាក់ថា កាលពី៥ ទៅ៦ឆ្នាំមុន អតីតប្រជាពលរដ្ឋដែលរស់នៅតំបន់បឹងកក់ជាច្រើនគ្រួសារ ត្រូវបានបណ្តេញចេញឲ្យទៅរស់នៅ២០គីឡូម៉ែត្រក្រុង ដោយផ្តល់នូវសំណង ៨៥០០ដុល្លារ ក្នុងមួយគ្រួសារ។ ក៏ប៉ុន្តែ ភាគច្រើននៃប្រជាជនទាំងនោះបានវិលត្រលប់មកជួលផ្ទះគេនៅភ្នំពេញវិញ ដើម្បីរកប្រកបរបរចិញ្ចឹមជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ