មេដឹកនាំបក្សប្រឆាំង ទៅកាន់ខេត្តព្រៃវែង នៅថ្ងៃទី២នៃយុទ្ធនាការឃោសនាបោះឆ្នោត ខណៈអាជ្ញាធររារាំង
លោក សម រង្ស៊ី និងលោក កឹម សុខា នៅថ្ងៃសៅរិ៍ទី៣ឧសភា ជាថ្ងៃទី២នៃយុទ្ធនាការឃោសនាបោះឆ្នោតក្រុមប្រឹក្សា រាជធានី ខេត្ត ក្រុង ស្រុក ខណ្ឌនេះ បានធ្វើដំណើរទៅកាន់ខេត្តព្រៃវែង ដើម្បីជួបជុំជាមួយអង្គបោះឆ្នោតជាង៣០០នាក់។ នៅខេត្តព្រៃវែង ក្រៅពីជួបជុំអង្គបោះឆ្នោត មេបក្សប្រឆាំងទាំងពីរ ក៍បានដឹកនាំដង្ហែរក្បួនឃោសនានៅក្រុងព្រៃវែង បើទោះបីជាមានការរារាំងពីអាជ្ញាធរខេត្តក៍ដោយ។
ចុះផ្សាយនៅថ្ងៃ៖
ស្តាប់ - ០២:៣៨
មិនមានអំពើហិង្សាណាមួយបានកើតនៅឡើង នៅពេលលោក សម រង្ស៊ី និងលោក កឹម សុខា បានដឹកនាំក្បួនឃោសនាបោះឆ្នោត នៅក្នុងខេត្តព្រៃវែងនាព្រឹកថ្ងៃទី៣ឧសភានេះឡើយ បើទោះបីជាអាជ្ញាធរជាច្រើន ត្រូវបានដាក់ពង្រាយដែលប្រដាប់ដោយខែល ដំបង និងអាវុធវែងខ្លី។
មេដឹកនាំបក្សប្រឆាំងទាំងពីរ បានធ្វើដំណើរទៅកាន់ខេត្តព្រៃវែង នៅព្រឹកថ្ងៃសៅរិ៍នេះ ដើម្បីជួបជាមួយ សមាជិកក្រុមប្រឹក្សាឃុំសង្កាត់៣៥៦រូប ជាអង្គបោះឆ្នោតមកពីគណបក្សសម រង្ស៊ី និងគណបក្សសិទ្ធិមនុស្ស រួមជាមួយមហាជនជាង៣ពាន់នាក់នៅទីស្នាក់ការបក្សរបស់ខ្លួន។ ប៉ុន្តែក្រោយពីការជួបជុំ មេដឹកនាំបក្សប្រឆាំងទាំងពីរ ក៍បានដឹកនាំក្បួនឃោសនាបោះឆ្នោតនៅក្រុងព្រៃវែងផងដែរ។ ក្បួនឃោសនាបានចេញពីទីស្នាក់ការបក្សនៅប្រមាណជាម៉ោង១០ កាត់តាមមាត់ទន្លេ ផ្សារ និងសាលាខេត្ត រួមទាំងមន្ទីរការងារជាច្រើនទៀត នៅក្នុងខេត្តដែលគណបក្សនេះទទួលបានការគាំទ្រច្រើននៅក្នុងការបោះឆ្នោតជាតិកាលពីខែកក្កដា។ នេះបើតាមការបញ្ជាក់ពីលោក យ៉ែម បុញ្ញាឬទ្ធិ អ្នកនាំពាក្យគណបក្សសង្គ្រោះជាតិ។ លោក យ៉ែម បុញ្ញាឬទ្ធិ បានបន្តថា កងកំលាំងប្រដាប់អាវុធជាច្រើន ដែលប្រដាប់ដោយដំបង ខែល និង អាវុធវែងខ្លី ត្រូវបានដាក់ពង្រាយ និងទប់ស្កាត់ការហែរក្បួន និងអ្នកគាំទ្ររបស់គណបក្សប្រឆាំងនេះ ក៍ប៉ុន្តែមិនមានអំពើហិង្សាណាមួយកើតឡើងនោះទេ។
លោក សម រង្ស៊ី និងលោក កឹម សុខា នៅពេលបញ្ចប់ការហែរក្បួនឃោសនានៅខេត្តព្រៃវែងនាពេលព្រឹកម៉ីញ អ្នកទាំងពីរក៍បានបន្តធ្វើដំណើរចូលមកកាន់ក្រុងភ្នំពេញវិញនៅរសៀលថ្ងៃសៅរិ៍នេះ ដើម្បីបន្តដឹកនាំក្បួនឃោសនានៅភ្នំពេញ។ ការដឹកនាំក្បួនឃោសនានៅក្នុងទីក្រុងភ្នំពេញ ដែលកំពុងទទួលរងការរិះគន់ពីលោក ប៉ា សុជាតិវង្ស អភិបាលរាជធានីភ្នំពេញ។ តាមរយៈលិខិតមួយច្បាប់ផ្ញើរជូនប្រធានគណៈកម្មាធិការជាតិរៀបចំការបោះឆ្នោត គជប កាលពីថ្ងៃម្សិលម៉ិញ លោក ប៉ា សុជាតិវង្ស បានជំរុញអោយស្ថាប័ណរៀបចំការបោះឆ្នោតមួយនេះ ចាត់វិធានការជាបន្ទាន់ ចំពោះ សកម្មភាពរំលោភបទបញ្ជា និងនីតិវិធីនៃការបោះឆ្នោតរបស់គណបក្សសង្គ្រោះជាតិ។ ប៉ុន្តែលោក យ៉ែម បុញ្ញាឬទ្ធិ និងលោក យឹម សុវណ្ណ អ្នកនាំពាក្យគណបក្សសង្គ្រោះជាតិបានបញ្ជាក់ថា គណបក្សនៅតែបន្តហែរក្បួន បើទោះបីជាមានការហាមឃាត់។
សូមបញ្ជាក់ថា យុទ្ធនាការឃោសនាបោះឆ្នោត ក្រុមប្រឹក្សារាជធានី ខេត្ត ក្រុង ស្រុក ខណ្ឌ នឹងបញ្ចប់នៅថ្ងៃទី១៦ឧសភាខាងមុខ។
លោក ទេព នីថា អគ្គលេខាធិការ គណៈកម្មាធិការជាតិ រៀបចំការបោះឆ្នោត (គ.ជ.ប.) បានមានប្រសាសន៍ថា គណបក្សចំនួន៤ បានជួបប្រជុំ និងចាក់មីក្រូនៅតាមស្នាក់ការគណបក្សរបស់ខ្លួន ដោយឡែក មានតែគណបក្សសង្គ្រោះជាតិតែមួយគត់ ដែលបានដឹកនាំហែក្បួនឃោសនាទៅវិញ។ ទោះជាយ៉ាងណា លោកទេព នីថា បានបញ្ជាក់ថា នៅក្នុងថ្ងៃយុទ្ធនាការឃោសនាកាលពីថ្ងៃម្សិលម៉ិញ ពុំមានបណ្តឹងតវ៉ាណាមួយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ