លោក កឹម សុខា៖ CNRPនិងCPP ត្រៀមរបៀបវារៈជួបគ្នាសប្តាហ៍ក្រោយ
លោកកឹម សុខា អនុប្រធានគណបក្សសង្រ្គោះជាតិ បានថ្លែងប្រាប់អ្នកគាំទ្រគណបក្សសង្រ្គោះជាតិក្នុងប្រទេសបារាំងកាលពីយប់មិញ តាមរយៈ video conference ថា គណបក្សសង្រ្គោះជាតិ និងគណបក្សប្រជាជនអាចនឹងជួបគ្នាក្នុងសប្តាហ៍ក្រោយនេះ។ អនុប្រធានបក្សប្រឆាំងរូបនេះ បញ្ជាក់ទៀតថា គណបក្សទាំងពីរក៏បានឆ្លើយឆ្លងគ្នា ទៅវិញទៅមកដើម្បីកំណត់ពីរបៀបវារៈ នៃកិច្ចពិភាក្សាផងដែរ។
ចុះផ្សាយនៅថ្ងៃ៖
លោក កឹម សុខា ប្រធានស្តីទីគណបក្សសង្រ្គោះជាតិ បញ្ជាក់ថា គណបក្សប្រជាជនកម្ពុជាតំណាងដោយលោក ស ខេង បានផ្ញើរបៀបវារៈពីរមកឲ្យគណបក្សសង្រ្គោះជាតិ ដែលរបៀបវារៈទាំងពីរនោះ រួមមានការពិភាក្សាគ្នាពី ភារៈកិច្ចរបស់ថ្នាក់ដឹកនាំគណបក្សទាំងពីរ និងបញ្ហាផ្សេងៗទៀតពាក់ព័ន្ធនឹងសិទ្ធិ សមត្ថកិច្ច របស់ថ្នាក់ដឹកនាំតំណាងរាស្រ្តគណបក្សទាំងពីរ។ លោកកឹម សុខា បន្ថែមថាគណបក្សសង្រ្គោះជាតិមិនជំទាស់ និងរបៀបវារៈទាំងពីរ ដែលស្នើដោយគណបក្សប្រជាជនកម្ពុជានោះទេ។
លោក ឡេង ប៉េងឡុង អ្នកនាំពាក្យនិងជាអគ្គលេខាធិការដ្ឋាននៃរដ្ឋសភា ឲ្យដឹងថា លោក ស ខេង កាលពីថ្ងៃទី ១៣ ខែ មករា បានផ្ញើរលិខិតទៅកាន់គណបក្សសង្គ្រោះជាតិ ដើម្បីកំណត់របៀបវារៈចំនួនពីរខាងនេះមែន។ ក៏ប៉ុន្តែ លោក ថា កាលបរិច្ឆេទច្បាស់លាស់នៃជំនួបនេះ មិនទាន់បានកំណត់នៅឡើយនោះទេ។
ចំណែកគណបក្សសង្រ្គោះជាតិវិញនៅថ្ងៃដដែលក៏បានដាក់ស្នើរបៀវារៈចំនួនពីរដែរ សម្រាប់គណបក្សកាន់អំណាច ដែលមានដូចជា ការពិភាក្សាគ្នាពីលទ្ធភាពក្នុងការធ្វើវិសោធនកម្មច្បាប់បោះឆ្នោត ដើម្បីឲ្យពលរដ្ឋខ្មែរចំណាកស្រុកធ្វើការក្រៅប្រទេស អាចបោះឆ្នោតបាននៅឆ្នាំ២០១៨ខាងមុខ និងការពិភាក្សាពីបរិយាកាសនយោបាយមុនការបោះឆ្នោត។ នេះបើតាមប្រធានស្តីទីគណបក្សប្រឆាំង។
លោកកឹម សុខា បញ្ជាក់ថា គណបក្សប្រជាជនកម្ពុជាតាមរយៈលោក ស ខេង ក៏មិនបានជំទាស់នឹងរបៀបវារៈរបស់គណបក្សប្រឆាំងឡើយ។ លោកកឹម សុខា ថាបក្សទាំងពីរបានព្រមព្រៀងគ្នាចំពោះរបៀបវារៈ ហើយនឹងអាចនឹងជួបគ្នានៅសប្តាហ៍ក្រោយពីលោក ស ខេង ត្រឡប់មកពីប្រទេសវៀតណាមវិញ។
សូមរំឮកឡើងវិញថា កាលពីថ្ងៃទី៥ ខែមករា ឆ្នាំ ២០១៧ កន្លងទៅលោកកឹម សុខា ប្រធានថ្នាក់ដឹកនាំតំណាងរាស្ត្រគណបក្សសង្រ្គោះជាតិបានដាក់លិខិតមួយទៅកាន់លោក ស ខេង ប្រធានថ្នាក់ដឹកនាំតំណាងរាស្ត្រគណបក្សប្រជាជនកម្ពុជា ដើម្បីស្នើកំណត់ពេលវេលានៃការជួបប្រជុំគ្នារវាងថ្នាក់ដឹកនាំតំណាងរាស្ត្រនៃគណបក្សទាំងពីរ។ ជាការឆ្លើយតប លោកស ខេង តាមរយៈលិខិតមួយថ្ងៃដដែលនោះ សង្ឃឹមថាបក្សទាំងពីរអាចជួបគ្នាក្រោយថ្ងៃទី១១ ខែមករា។
ជាថ្មីម្តងទៀត តាមរយៈ Video Conference លោក កឹម សុខា បានបញ្ជាក់ពីជំហរ និង ថ្លែងទៅកាន់អ្នកគាំទ្រនៅប្រទេសបារាំងថា គណបក្សសង្គ្រោះជាតិ នឹងមិនបែកបាក់ផ្ទៃក្នុងជាដាច់ខាត ព្រោះថាចំណុចខ្លាំងរបស់គណបក្សមានភាពចាស់ទុំផ្នែកនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ