រដ្ឋាភិបាលបដិសេធថាមិនបានលក់សិទ្ធិនៃការចុះបញ្ជីកប៉ាល់ពាណិជ្ជកម្មដល់ក្រុមហ៊ុនបរទេសទេ
ក្រោយពីបណ្តាញសារព័ត៌មានមួយចំនួនបានចុះផ្សាយថា រាជរដ្ឋាភិបាលបានលក់សិទ្ធិនៃការចុះបញ្ជីកប៉ាល់ពាណិជ្ជកម្មមកនោះ រដ្ឋាភិបាលបានចេញមកបដិសេធព័ត៌មាននេះ។ ក្នុងសន្និសីទកាសែតមួយនៅទីស្តីការគណៈរដ្ឋមន្ត្រីនាព្រឹកថ្ងៃសុក្រនេះ មន្ត្រីរដ្ឋាភិបាលអះអាងថាមិនបានលក់សិទ្ធិនៃការចុះបញ្ជីកប៉ាល់ពាណិជ្ជកម្មដល់ក្រុមហ៊ុនបរទេសទេ តែវាជាការជ្រើសរើសដៃគូសហប្រតិបត្តិការដែលមានវិជ្ជាជីវៈ និង ត្រឹមត្រូវតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានចោទបណ្តាញព័ត៌មានមួយចំនួនដែលបានចុះផ្សាយព័ត៌មានថា កម្ពុជាបានលក់សិទ្ធិនៃការចុះបញ្ជីកប៉ាល់ទៅឲ្យបរទេសនោះថា គ្មានវីជ្ជាជីវៈ និងគ្មានក្រមសីលធម៌ ដែលមានគោលដៅវាយប្រហាររដ្ឋាភិបាលកម្ពុជា។ លោកបានពន្យល់ថា រដ្ឋាភិបាលមិនបានលក់សិទ្ធិនៃការចុះបញ្ជីកប៉ាល់ពាណិជ្ជកម្មនោះទេ តែរាជរដ្ឋាភិបាលបានរៀបចំអន្តរក្រសួង ដើម្បីជ្រើសរើសដៃគូសហប្រតិបត្តិការដែលជាក្រុមហ៊ុនមានសមត្ថភាព ឯកទេស វិជ្ជាជីវៈ ក្រមសីលធម៌ និង ស្ថិរភាពហិរញ្ញវត្ថុ។
លោកបន្តថា មូលហេតុដែលរដ្ឋាភិបាលធ្វើដូចនេះ គឺដើម្បីឆ្លើយតបក្នុងការកែលម្អរួបភាព និង កិត្តិយសប្រទេសជាតិក្នុងការដឹកជញ្ជូន ពីព្រោះកម្ពុជាមិនទាន់មាននាវាដឹកជញ្ជូនតាមសមុទ្រនៅឡើយ។ បើតាមអ្នកនាំពាក្យរូបនេះ កិច្ចការនេះបានធ្វើឡើងបន្ទាប់ពីកម្ពុជាបានលុបចោលកិច្ចព្រមព្រៀងនៃការចុះបញ្ជីកប៉ាល់ពាណិជ្ជកម្មជាមួយស្ថាប័ន CSC ( Cambodian ship corporation) ដោយសារស្ថាប័ននេះមានបញ្ហាច្រើន។ ម្យ៉ាងទៀតកម្ពុជានៅមិនទាន់មានធនធានមនុស្សគ្រប់គ្រាន់នៅក្នុងវិស័យនាវាចរណ៍។
លោក ផៃ ស៊ីផានបានបញ្ជាក់ឲ្យដឹងផងដែរថា កន្លងមកកម្ពុជាបានលុបចោលកប៉ាល់ពាណិជ្ជកម្មចំនួន ៩១១គ្រឿងពីបញ្ជីនាវាកម្ពុជា ដោយសារតែពួកគេមិនគោរពតាមលក្ខខណ្ឌ មិនគោរពច្បាប់កម្ពុជា និងច្បាប់អន្តរជាតិជាដើម។ លោក សេង លឹមនៅ ប្រធានគណៈកម្មការអន្តរក្រសួងត្រួតពិនិត្យក្រុមហ៊ុនចុះបញ្ជីនាវាកម្ពុជាបានពន្យល់ពីនីតិវិធី និង បច្ចេកទេសនៃការចុះបញ្ជីនាវារបស់កម្ពុជាយ៉ាងច្រើនដល់អ្នកកាសែតដើម្បីកុំមានការភាន់ច្រឡំ។ លោក លើកឡើងថា មកដល់ឆ្នាំ២០១៤នេះ កប៉ាល់ដែលបានចុះក្នុងបញ្ជីនាវាកម្ពុជាមានចំនួន ៥៤៩ គ្រឿង ដោយមួយចំនួនបានដកចេញពីបញ្ជីទៅវិញ។
គួរបញ្ជាក់ថា បញ្ហាកប៉ាល់បរទេសដែលដោតទង់ជាតិកម្ពុជាបានកើតឡើងជារឿយ។ ពេលខ្លះ កប៉ាល់មួយចំនួនដែលដឹកទំនិញខុសច្បាប់ឬគ្រឿងញៀនដែលត្រូវគេចាប់បានគឺជាកប៉ាល់ដែលមានដោតទង់ជាតិកម្ពុជា។ បញ្ហានេះហើយដែលនាំឲ្យមានការសង្ស័យថា កម្ពុជាទំនងជាបានលក់សិទ្ធិនៃការចុះបញ្ជីកប៉ាល់ពាណិជ្ជកម្មទៅឲ្តបរទេស។
បន្ទាប់បានបកស្រាយអំពីព័ត៌មាននេះ លោកផៃ ស៊ីផានក៏បានលើកយកទិដ្ឋភាពច្បាប់មួយចំនួនទាក់ទងនឹងការញុះញង់ និង ការប៉ះពាល់ដល់អាជ្ញាធររបស់រដ្ឋមកបង្ហាញដល់ក្រុមអ្នកកាសែតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ