កម្ពុជា-ជប៉ុន គ្រោងបង្កើតជើងហោះហើរផ្ទាល់នៅក្នុងឆ្នាំ២០១៤
កម្ពុជា-ជប៉ុន គ្រោងបង្កើតជើងហោះហើរផ្ទាល់នៅក្នុងឆ្នាំ២០១៤ ក្នុងគោលបំណងពង្រឹង និងពង្រីកវិស័យពាណិជ្ជកម្ម វិស័យទេសចរណ៍ ព្រមទាំងការវិនិយោគ រវាងប្រទេសទាំងពីរផងដែរ។ សព្វថ្ងៃ បើទោះជាមិនទាន់មានជើងហោះហើរផ្ទាល់កម្ពុជា-ជប៉ុន យ៉ាងណាក្ដី ក៏អ្នកវិនិយោគជប៉ុន បានសម្រុកចូលមកកម្ពុជា កាន់តែច្រើនឡើងៗជារៀងរាល់ថ្ងៃ។ ជើងហោះហើរផ្ទាល់ កម្ពុជា-ជប៉ុននាពេលខាងមុខនេះ នឹងនាំមកនូវអ្នកវិនិយោគ ព្រមទាំងអ្នកទេសចរទ្វេដង មកកាន់កម្ពុជា។
ចុះផ្សាយនៅថ្ងៃ៖
ស្តាប់ - ០១:៥៣
ការបង្កើតជើងហោះហើរផ្ទាល់ កម្ពុជា-ជប៉ុន ក្នុងរយៈពេល៦ខែខាងមុខ គឺជាសេចក្ដីរំពឹងរបស់លោកនាយករដ្ឋមន្ដ្រីហ៊ុន សែន ដែលបានបង្ហើបឲ្យដឹង នៅក្នុងជំនួបជាមួយលោក ហ៊ីដេអុ សាវ៉ាដា អគ្គនាយកក្រុមហ៊ុនទេសចរណ៍ជប៉ុន H.I.S Company Ltd នៅថ្ងៃទី៣១មករាកន្លងទៅ។ ជើងហោះហើរផ្ទាល់កម្ពុជា-ជប៉ុន ដែលត្រូវប្រសូត្រឡើងក្នុងពេលដ៏ខ្លីខាងមុខនេះ នឹងជម្រុញឲ្យមានកំណើនពាណិជ្ជកម្មរវាងប្រទេសទាំងពីរ ព្រមទាំងនាំមកនូវអ្នកវិនិយោគ និងអ្នកទេសចរជប៉ុន ទ្វេដងមកកាន់កម្ពុជា។
បើតាមលោកហ៊ុន សែន នាយករដ្ឋមន្ដ្រី កម្ពុជានឹងជួយសម្រួលដល់អ្នកទេសចរជប៉ុន តាមរយៈការផ្ដល់ទិដ្ឋាការនៅពេលមកដល់កម្ពុជាតែម្ដង ដោយមិនចាំបាច់ស្វែងរក ឬធ្វើទិដ្ឋាការនៅប្រទេសក្រៅនោះទេ។ ហើយថា ទេសចរជប៉ុន ក៏អាចប្រើប្រាស់ប្រាក់យ៉េនជប៉ុន នៅកម្ពុជាផងដែរ។
សព្វថ្ងៃ បើទោះជាមិនទាន់មានជើងហោះហើរផ្ទាល់កម្ពុជា-ជប៉ុន យ៉ាងណាក្ដី ក៏អ្នកវិនិយោគជប៉ុន បានសម្រុកចូលមកកម្ពុជា កាន់តែច្រើនឡើងៗជារៀងរាល់ថ្ងៃ។ ជប៉ុន បានដាក់ទុនវិនិយោគ បង្កើតតំបន់សេដ្ឋកិច្ចពិសេសនៅកម្ពុជា ជាមួយនឹងវត្តមានរោងចក្រជប៉ុនជាច្រើន។ ក្រៅពីការវិនិយោគនៅក្នុងតំបន់សេដ្ឋកិច្ចពិសេស ក៏មានដែរការវិនិយោគក្នុងវិស័យផ្សេងៗនៅកម្ពុជា ពីសំណាក់ក្រុមហ៊ុនយក្សរបស់ជប៉ុន មានដូចជា ក្រុមហ៊ុន AEON និងក្រុមហ៊ុន Casio ជាដើម។ ភោជនីយដ្ឋានម្ហូបជប៉ុន ក៏កំពុងតែវាយលុកទីផ្សារអាហារកម្ពុជាយ៉ាងគំហុក។
ការវិនិយោគរបស់ជប៉ុននៅកម្ពុជា បានកើនឡើងពី៧៥លានដុល្លារ ក្នុងឆ្នាំ២០១១ រហូតដល់៣២៨លានដុល្លារ ក្នុងឆ្នាំ២០១២។ រីឯចំនួនភ្ញៀវទេសចរជប៉ុនចូលមកកម្សាន្តនៅកម្ពុជា ក៏កើនឡើងគួរឲ្យកត់សម្គាល់ដែរ។ គ្រាន់តែរយៈពេល១១ខែ ដើមឆ្នាំ២០១៣ កម្ពុជាទទួលភ្ញៀវទេសចរជប៉ុន បានប្រមាណ១សែន៨ម៉ឺននាក់ កើនឡើងជាង១៥ភាគរយ ធៀបនឹងរយៈពេលដូចគ្នាក្នុងឆ្នាំ២០១២ ដែលមានត្រឹមតែជិត១សែន៦ម៉ឺននាក់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ