តំណែងបេក្ខជននាយករដ្ឋមន្ត្រី ជាចំណោទសម្រាប់គណបក្សសង្គ្រោះជាតិ
ចុះផ្សាយនៅថ្ងៃ៖
ស្តាប់ - ០៤:៤៨
គណបក្សសង្គ្រោះជាតិដែលត្រូវបានបង្កើតឡើងយ៉ាងប្រញាប់ប្រញាល់ដើម្បីឲ្យទាន់ការបោះឆ្នោតខែកក្កដា ឆ្នាំ ២០១៣ បានឆ្លងផុតឧបសគ្គដ៏សំខាន់មួយ នោះគឺការចុះបញ្ជីផ្លូវការនៅឯក្រសួងមហាផ្ទៃដែលមានលោកសម រង្ស៊ីជាប្រធាន។ ប៉ុន្តែ បើទោះបីជាលោកសម រង្ស៊ី អាចឈរឈ្មោះជាប្រធានគណបក្សបាន តែលោកនៅតែមិនអាចឈរឈ្មោះជាបេក្ខជននាយករដ្ឋមន្ត្រីបានដដែល។ ការទន្ទឹងរង់ចាំដំណោះស្រាយនយោបាយជារឿងមួយ ប៉ុន្តែការលុបឈ្មោះលោកសម រង្ស៊ីចេញពីបញ្ជីបោះឆ្នោតគឺជាឧបសគ្គថ្មីមួយទៀតដែលជាចំណោទធំធេងសម្រាប់អនាគតគណបក្សប្រឆាំងថ្មីមួយនេះ។ តើគណបក្សសង្គ្រោះជាតិនឹងទៅជាយ៉ាងណា ?
ការកាត់ទោសលោកសម រង្ស៊ីឲ្យជាប់ពន្ធនាគារជាច្រើនឆ្នាំបានបង្កបញ្ហាធំធេងណាស់ទៅហើយសម្រាប់មេដឹកនាំបក្សប្រឆាំងដែលល្បីល្បាញជាងគេនៅកម្ពុជា។ ឥឡូវនេះ ការលុបឈ្មោះរបស់លោកចេញពីបញ្ជីបោះឆ្នោត គឺជាសម្ពាធដ៏ធ្ងន់មួយទៀតដែលសង្កត់ទៅលើអនាគតនយោបាយរបស់លោកសម រង្ស៊ី ។ ទោះបីជាមានការរិះគន់ពីសំណាក់បក្សប្រឆាំង និងសង្គមស៊ីវិលថា គ្មាននីតិវិធីផ្លូវច្បាប់សម្រាប់លុបឈ្មោះ «ទណ្ឌិត» ចេញពីបញ្ជីបោះឆ្នោតក៏ដោយ ក៏ក្រុមប្រឹក្សាធម្មនុញ្ញបានសម្រេចតម្កល់ការលុបឈ្មោះលោកសម រង្ស៊ី ដដែល និងបិទផ្លូវតវ៉ា។ ដូច្នេះ ចំណោទដ៏ធំសម្រាប់គណបក្សសង្គ្រោះជាតិនៅពេលនេះ គឺតើនរណាជាបេក្ខជននាយករដ្ឋមន្ត្រីសម្រាប់ការបោះឆ្នោតឆ្នាំ ២០១៣ ?
កាលពីមុននេះ គេអាចនៅរំពឹងទោះតិច ឬច្រើនថា លោកសម រង្ស៊ី អាចនឹងមានផ្លូវវិលមកឈរឈ្មោះជាបេក្ខជននាយករដ្ឋមន្ត្រីដើម្បីប្រកួតជាមួយលោកនាយករដ្ឋមន្ត្រី ហ៊ុន សែនក្នុងការបោះឆ្នោតឆ្នាំក្រោយ។ ក្តីសង្ឃឹមនេះត្រូវបានគេព្យាយាមចិញ្ចឹមវាបាន ពីព្រោះតែកម្ពុជាធ្លាប់មានប្រវត្តិដោះស្រាយនយោបាយរបៀបនេះជាច្រើនលើករួចមកហើយ។ ប៉ុន្តែ ការលុបឈ្មោះចេញពីបញ្ជីបោះឆ្នោត គឺជារនាំងផ្លូវច្បាប់ដ៏រឹងមាំមួយទៀតដែលបង្កើតបានជារបាំងដល់ទៅពីរជាន់សម្រាប់ជីវិតនយោបាយរបស់លោកសម រង្ស៊ី។ របាំងទី១ គឺទោសព្រហ្មទណ្ឌដែលតុលាការបានដាក់ទៅលើមេដឹកនាំបក្សប្រឆាំង និងរបាំងទី២ គឺការបាត់ឈ្មោះពីបញ្ជីបោះឆ្នោត។
ជាការពិត របាំងទី១អាចលើកចេញពេលណាក៏បាន តាមរយៈដំណោះស្រាយនយោបាយ ប៉ុន្តែរបាំងទី២ គឺការចុះឈ្មោះក្នុងបញ្ជីបោះឆ្នោតឡើងវិញមិនអាចធ្វើឡើងពេលណាក៏បាននោះឡើយ ពីព្រោះវាជារបៀបវារៈដែលមានកាលកំណត់ច្បាស់លាស់ដែលតម្រូវដោយច្បាប់។ ពីនេះដល់ការបោះឆ្នោតខែកក្កដា ឆ្នាំ ២០១៣ គ្មានឡើយពេលវេលាសម្រាប់ចុះឈ្មោះបោះឆ្នោត។ ដូច្នេះ លោកសម រង្ស៊ីត្រូវរង់ចាំរហូតដល់ការបោះឆ្នោតរួច ទើបអាចចុះឈ្មោះជាថ្មីបាន បើទោះជាមានដំណោះស្រាយនយោបាយជាយថាហេតុនៅមុនការបោះឆ្នោតក៏ដោយ។ និយាយដោយខ្លី ក្តីសង្ឃឹមរបស់លោកសម រង្ស៊ី ក្នុងការវិលត្រឡប់មកឈរឈ្មោះជាបេក្ខជននាយករដ្ឋមន្ត្រីរបស់បក្សប្រឆាំងមិនអាចទៅរួចទៀតឡើយ។
វាពិតជារឿងគួរឲ្យសោកស្តាយមួយ ពីព្រោះថា ដំណោះស្រាយដែលអាចបើកច្រកឲ្យលោកសម រង្ស៊ី វិលមកប្រទេសវិញ និងអាចឈរឈ្មោះបោះឆ្នោតឆ្នាំ ២០១៣ ត្រូវគេមើលឃើញថា ជាជម្រើសដ៏ល្អបំផុតសម្រាប់បរិបទនយោបាយប្រទេសកម្ពុជាទាំងមូល។ ល្អដោយហេតុថា វាបានបង្ហាញពីការផ្សះផ្សារផ្ទៃក្នុងកម្ពុជាផង និងធ្វើឲ្យអន្តរជាតិអបអរសាទរផង។ ប៉ុន្តែឥឡូវនេះ ដំណោះស្រាយដ៏ល្អនេះមិនអាចចេញរួចទេ។ ដូច្នេះសំណួរដែលត្រូវចោទសួរពេលនេះគឺ តើអ្នកណាត្រូវឈរឈ្មោះជំនួសលោកសម រង្ស៊ី ? តើតំណែងបេក្ខជននាយករដ្ឋមន្ត្រីអាចនឹងត្រូវគេប្រគល់ឲ្យលោក កឹម សុខាបានដែរ ឬទេ ? ប្រសិនបើមិនបានវិញ តើបញ្ហានឹងទៅជាយ៉ាងណា ? ចំណោទទាំងនេះជាបញ្ហាធំធេងដែលបក្សប្រឆាំងត្រូវដោះស្រាយ។
ការប្រគល់តំណែងបេក្ខជននាយករដ្ឋមន្ត្រីទៅឲ្យលោកកឹម សុខា ជាជម្រើសសមស្របមួយ ប៉ុន្តែជម្រើសនេះទាមទារការលះបង់ខ្ពស់បំផុតសម្រាប់គណបក្សសម រង្ស៊ី ដែលគេពិបាកជឿថា អាចនឹងទៅរួច។ ផ្ទុយទៅវិញ ជម្រើសផ្សេងពីនេះនឹងធ្វើឲ្យគណបក្សសិទ្ធិមនុស្សពិបាកទទួលយកពីព្រោះ គណបក្សនេះនឹងគិតថា ខ្លួនគ្មានតម្លៃគ្រប់គ្រាន់ក្នុងការចងសម្ពន្ធ័ភាពជាមួយគណបក្សសម រង្ស៊ី។ ក្នុងបរិបទនេះ ការបែកបាក់គឺជាលទ្ធភាពដ៏ធំមួយសម្រាប់គណបក្សសង្គ្រោះជាតិ។ មានតែការលះបង់ប៉ុណ្ណោះដែលអាចទប់សភាពការណ៍បាន។
ឆ្លងកាត់របត់នយោបាយចុងក្រោយនេះ គេអាចមើលឃើញថា ការលះបង់គឺជារឿងចាំបាច់សម្រាប់បក្សប្រឆាំង ទោះជាក្នុងតម្លៃណាក៏ដោយដើម្បីសង្គ្រោះសភាពការណ៍ ប្រសិនបើមិនដូច្នេះទេ កុំថាឡើយដល់ទៅសង្គ្រោះជាតិ សូម្បីតែសង្គ្រោះខ្លួនឯងក៏បក្សប្រឆាំងមិនអាចធ្វើបានដែរ។ នេះជាស្ថានភាពដែលគណបក្សសង្គ្រោះជាតិកំពុងប្រឈមមុខដោះស្រាយ ហើយវាក៏ជាវិញ្ញាសារចុងក្រោយមួយសម្រាប់សាកល្បងអំពីទំនុកចិត្តគ្នានៅក្នុងគណបក្សប្រឆាំងនៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ