ប្រជាជនត្រូវអាជ្ញាធរបណ្តេញចេញពីអគារបុរីកីឡា បន្ទាប់ពីឡើងទៅនៅបានពីរថ្ងៃ
ប្រជាពលរដ្ឋនៅសហគមន៍បុរីកីឡាត្រូវអាជ្ញាធរបង្ក្រាបឲ្យរងរបួសកាលពីព្រឹកមិញខណៈដែលពួកគេព្យាយាមចូលកាន់កាប់អគារទី៩ ដែលសាងសង់ទុកចោលដោយក្រុមហ៊ុនផានអ៊ីមិច។ អាជ្ញាធរក្រុងភ្នំពេញឲ្យដឹងថា នោះជាវិធានការរដ្ឋបាល ដោយសារការចូលទៅស្នាក់នៅក្នុងអគារនោះខុសច្បាប់។ តែការប្រទូសសារ៉ាយនោះ ត្រូវបានរិះគន់ពីអង្គការសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
យ៉ាងហោចមានប្រជាជននៅសហគមន៍បុរីកីឡាចំនួន៩នាក់រងរបួសធ្ងន់ និងស្រាលបន្ទាប់ពីមានការប៉ះទង្គិចគ្នាមួយកាលពីព្រឹកថ្ងៃសុក្រនេះ នៅឯសំណង់អគារទី៩ ដែលគេស្គាល់ថាបានសាងសង់ឡើងដោយ ក្រុមហ៊ុនផានអ៊ីមិច។ ការប្រឈមមុខដែលមានការបង្ក្រាបដោយហិង្សាពីសំណាក់អាជ្ញាធរនេះ បានកើតឡើងបន្ទាប់ពីប្រជាជនជាង១៥០គ្រួសារ នៃតំបន់បុរីកីឡាបានព្យាយាមចូលទៅស្នាក់នៅបានរយៈពេលពីរថ្ងៃ ក្នុងអគារដែលគេអះអាងថាជាកម្មសិទ្ធិឯកជន។
បន្ទាប់ពីមានការបណ្តេញចេញពីទីនោះ លោក ពេជ្រ លឹមឃួន ប្រធានសហគមន៍បុរីកីឡា បានថ្លែងថាអាជ្ញាធរបានប្រើអំពើហិង្សាធ្ងន់ធ្ងរមកលើពួកគាត់ ដែលគ្រាន់តែទាមទារសិទ្ធិរស់នៅសមរម្យនៅក្នុងតំបន់ដែលធ្លាប់រស់នៅ ជាយូរមកហើយនោះ។ លោក លឹមឃួន អះអាងថា ការការសម្រេចចិត្តចូលទៅរស់នៅលើអគារទី៩នោះ គឺដោយសារតែ អាជ្ញាធរមិនដោះស្រាយបញ្ហាដីធ្លីឲ្យពួកគាត់ដែលមានការអូសបន្លាយ។
ទាក់ទងទៅនឹងបញ្ហានេះ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងថាប្រជាជនទាំងនោះចូលទៅរស់នៅក្នុងអគារឯកជនខុសច្បាប់។ ពួកគេនឹងប្រឈមធ្ងន់ធ្ងរជាងនេះចំពោះការប្តឹងផ្តល់ពីម្ចាស់អគារ ប្រសិនបើមិនចេញពីទីនោះនាពេលនេះ ។ ហេតុនេះហើយទើប សមត្ថកិច្ចបង្ខំចិត្តមានវិធានការរដ្ឋបាលនាពេលនេះ។
ក៏ប៉ុន្តែវិធានការនេះ ត្រូវទទួលរងនូវការរិះគន់ពីសង្គមស៊ីវិលយ៉ាងខ្លាំង ភ្លាមៗនេះដែរ។ លោកអំ សំអាត ប្រធានក្រុមបច្ចេកទេសស៊ើបអង្កេតនៃអង្គការការពារសិទ្ធិមនុស្សលីកាដូ ឲ្យដឹងថាលោកមានការសោកស្តាយចំពោះការបង្ក្រាបនេះ ដោយលោកពិព័ណ៌នាថា ជាសកម្មភាព ដែលមិនមានការលើកលែង សូម្បីតែថ្ងៃនេះជាថ្ងៃបុណ្យព្រះពុទ្ធសាសនាមាឃបូជា និងជាថ្ងៃនៃសេចក្តីស្រលាញ់ ដែលមនុស្សផ្តល់នូវការអាណិតអាសូរឲ្យគ្នាពេញពិភពលោកក៏ដោយ។ សកម្មជនការពារសិទ្ធិមនុស្សរូបនេះបន្តថា អំពើហិង្សាបែបនេះមិនមែនជាដំណោះស្រាយដែលអាចបញ្ចប់ភាពរ៉ាំរ៉ៃរបស់សហគមន៍បុរីកីឡាបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ