សង្គមស៊ីវិលសាទរក្រសួង៣ ដែលរៀបគម្រោងដោះស្រាយទំនាស់ដីធ្លី
សង្គមស៊ីវិលបានបង្ហាញអំពីការសាទរចំពោះការជួបប្រជុំគ្នា ដើម្បីរៀបគម្រោងក្នុងការគ្រប់គ្រងដីធ្លី និងធនធានធម្មជាតិ រវាងក្រសួង៣គឺ ក្រសួងរៀបចំដែនដីនគរូបនីយកម្ម ក្រសួងកសិកម្ម រុក្ខាប្រមាញ់និងនេសាទ និងក្រសួងបរិស្ថាន។ ក្រសួងទាំងបីបានបើកកិច្ចប្រជុំរួមគ្នាមួយកាលពីថ្ងៃទី៣កុម្ភៈ ដើម្បីរិះរកវិធីគ្រប់គ្រងដីធ្លី។ យ៉ាងណាក៏ដោយ មន្ត្រីសង្គមស៊ីវិលអះអាងថា ប្រសិនបើការជួបប្រជុំមានតែលើក្រដាស នោះបញ្ហានឹងនៅតែបន្តកើតមានដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
លោក អំ សំអាត អ្នកគ្រប់គ្រងបច្ចេកទេសស៊ើបអង្កេតសិទ្ធិមនុស្សនៃអង្គការលីកាដូ បានប្រាប់វិទ្យុបារាំងអន្តរជាតិ នាព្រឹកថ្ងៃអង្គារនេះថា ការរួមដៃគ្នានៃក្រសួងទាំង៣នេះ គឺជា ជំហានដំបូងនៃការកែទម្រង់ថ្មីរបស់រដ្ឋាភិបាលអាណត្តិថ្មីនេះ ហើយប្រសិនបើការកែទម្រង់នេះប្រកបដោយប្រសិទ្ធភាព ប្រសិនមានឆន្ទៈក្នុងការកែទម្រង់មែននោះ មានន័យថា កំនែទម្រង់ស៊ីជម្រៅនេះ គឺជាជំហានវិជ្ជមានមួយក្នុងការដោះស្រាយបញ្ហាដីធ្លី និងការថែរក្សាអោយបានគង់វង្សនូវធនធានធម្មជាតិកម្ពុជា ដែលកំពុងតែបាត់បង់ទៅ។
មន្ត្រីស៊ើបអង្កេតសិទ្ធិមនុស្សរូបនេះបន្តផ្តល់ជាយោបល់ថា ក្រសួងគួរតែពិនិត្យឡើងវិញការ ផ្តល់ដីសម្បទានសេដ្ឋកិច្ច និងដីព្រៃសម្បទាន និងពិនិត្យឡើងវិញពីសកម្មភាពក្រុមហ៊ុនដែលកំពុងដំនើរការ។ ប្រសិនបើក្រុមហ៊ុនណាធ្វើខុសច្បាប់ រដ្ឋាភិបាលគួរដកដីសម្បទាននោះមកធ្វើជាកម្មសិទ្ធិរដ្ឋឡើងវិញ។ ក្រៅពីនេះ រដ្ឋាភិបាលគួរតែផ្អាកការផ្តល់ដីព្រៃសម្បទាននិងដីសម្បទានសេដ្ឋកិច្ច។ លោក អំ សំអាត បន្ថែមថា មួយរយៈចុងក្រោយនេះ បញ្ហាជម្លោះដីធ្លីបាននៅទ្រឹង ប៉ុន្តែមានតំបន់ខ្លះ បញ្ហាដីធ្លីចាប់ផ្តើមកំរើកឡើងវិញហើយ ដែលនេះជារឿងដែលគួរអោយព្រួយបារម្ភ។ យ៉ាងណាក៏ដោយ លោក ប៉ែន ប៊ុណ្ណារ៍ មន្ត្រីរបស់អង្គការអាដហុកប្រចាំខេត្តមណ្ឌលគិរី បានអះអាងថា ការគ្រប់គ្រងធនធានធម្មជាតិទំនងជាហួសពេលហើយពីព្រោះអ្វីៗត្រូវបានបំផ្លាញស្ទើរតែអស់ទៅហើយ។
សូមបញ្ចាក់ថា នៅថ្ងៃ ទី ០៣ កុម្ភៈ ឆ្នាំ២០១៤ រដ្ឋមន្ត្រីនិងមន្ត្រីជំនាញមកពីក្រសួងចំនួន៣គឺក្រសួងដែនដី ក្រសួងកសិកម្ម និងក្រសួងបរិស្ថាន បានជួបប្រជុំគ្នា ក្នុងគោលដៅសម្របសម្រួលការអនុវត្តន៍ច្បាប់ និងរៀបចំគម្រោងក្នុងការគ្រប់គ្រងដីធ្លី និងធនធានធម្មជាតិ។ បើតាមសេចក្តីប្រកាសពត៌មាន របស់ក្រសួងដែនដី នគរូបនីយកម្ម និងសំណង់ ក្រសួងទាំង៣មានឆន្ទៈរួមគ្នាសម្រេចគោលដៅគ្រប់គ្រងដីធ្លីរបស់រដ្ឋ អោយមានប្រសិទ្ធភាព ហើយក្នុងកិច្ចប្រជុំពួកគេបានឯកភាពបង្កើតក្រុមការងារចម្រុះមួយ ដើម្បីរៀបចំផែនទីឯកភាពគ្នា និងឈានទៅចុះបញ្ជីដីរដ្ឋចំពោះដីដែលមិនទាន់បានចុះបញ្ជី។
យោងតាមប្រភពដដែល ដោយសារដីរដ្ឋ មានវិសាលភាពធំធេង និងស្ថិតនៅគ្រប់ទិសទី ក្រសួងទាំង៣ក៏បានឯកភាពថា ចាប់ផ្តើមការងារពីតំបន់ដែលមានទីតាំងដីសម្បទានសេដ្ឋកិច្ច និងដីជួលរយៈពេលវែងដើម្បីធានាការវិនិយោគ និងកាត់បន្ថយទំនាស់ដីធ្លី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ