កុម្មុយនិស្តវៀតណាម៤០ឆ្នាំក្រោយឈ្នះសង្រ្គាមលើអាមេរិក
ចុះផ្សាយនៅថ្ងៃ៖
ស្តាប់ - ០៤:៤១
ថ្ងៃព្រហស្បតិ៍៣០មេសានេះ គឺជាថ្ងៃគម្រប់ ៤០ឆ្នាំគត់ ដែលសង្រ្គាមវៀតណាមត្រូវបញ្ចប់ជាផ្លូវការ។ វៀតណាមកុម្មុយនិស្តបានយកឈ្នះលើកងទ័ពអាមេរិក ហើយវៀតណាមដែលត្រូវពុះចែកជាវៀតណាមខាងជើង និងវៀតណាមខាងត្បូង ត្រូវបានរួបរួមជាប្រទេសតែមួយឡើងវិញ។ ៤០ឆ្នាំក្រោយជ័យជម្នះនេះ វៀតណាមនៅតែស្ថិតក្រោមការដឹកនាំនៃរបបកុម្មុយនិស្ត ក៏ប៉ុន្តែ មនោគមន៍វិជ្ជាកុម្មុយនិស្តកំពុងតែឆ្លងកាត់នូវវិបត្តិ ដោយចលនាប្រឆាំងនឹងបក្សកុម្មុយនិស្តវៀតណាមបានកើតឡើងកាន់តែខ្លាំង បើទោះបីជាមានការរឹតត្បឹតសិទ្ធិសេរីភាពពីសំណាក់អាជ្ញាធរ។
សង្រ្គាម ដែលគេឲ្យឈ្មោះថា “សង្រ្គាមវៀតណាម” តាមការពិត គឺជាសង្រ្គាម ដែលបានកើតឡើង នៅក្នុងតំបន់ឥណ្ឌូចិនទាំងមូល គឺទាំងក្នុងប្រទេសវៀតណាម និងប៉ះពាល់ទៅដល់ផ្នែកខ្លះនៃប្រទេសកម្ពុជា និងឡាវ។ សង្រ្គាមនេះបានចាប់ផ្តើមឡើង នៅឆ្នាំ១៩៥៥ នៅក្រោយពេលដែលអាមេរិកបញ្ជូនកងទ័ពចូលធ្វើអន្តរាគមន៍ ជួយកងទ័ពវៀតណាមខាងត្បូង ដើម្បីប្រយុទ្ធតទល់នឹងវៀតណាមខាងជើង ដែលដឹកនាំដោយពួកកុម្មុយនិស្ត។ អន្តរាគមន៍យោធាដែលបានធ្វើឲ្យអាមេរិកត្រូវផុងខ្លួនក្នុងសង្រ្គាមអស់រយៈពេលជិត ២០ឆ្នាំ ហើយត្រូវបិទបញ្ចប់ជាមួយនឹងបរាជ័យដ៏សែនជូរចត់មួយ ក្នុងប្រវត្តិសាស្រ្ត។
សង្រ្គាមវៀតណាមត្រូវបានគេកំណត់ថាបានបិទបញ្ចប់ជាផ្លូវការ នៅថ្ងៃទី៣០ ខែមេសា ឆ្នាំ១៩៧៥ នៅពេលដែលកងទ័ពកុម្មុយនិស្តវៀតណាមខាងជើងបានវាយលុកចូលកាន់កាប់ទីក្រុងសៃហ្កន (ព្រៃនគរ) ហើយរដ្ឋាភិបាលវៀតណាមខាងត្បូង ដែលគាំទ្រដោយសហរដ្ឋអាមេរិកត្រូវដួលរលំ។ នៅក្រោយសង្រ្គាម វៀតណាម ដែលត្រូវពុះចែកជាពីរប្រទេស តាំងពីឆ្នាំ១៩៤៩មកនោះ ក៏ត្រូវបានបង្រួបបង្រួមជាប្រទេសតែមួយឡើងវិញ ក្រោមការដឹកនាំនៃរបបកុម្មុយនិស្តវៀតណាមខាងជើង។
ក៏ប៉ុន្តែ ការបង្រួបបង្រួមដោយប្រើកម្លាំងទ័ពនេះបានបន្សល់ទុកនូវការពុះចែកនូវផ្នត់គំនិតខុសគ្នា រវាងវៀតណាមខាងជើង និងវៀតណាមខាងត្បូង រហូតមកទល់នឹងពេលបច្ចុប្បន្ន ជាពិសេស ក្នុងចំណោមអ្នកដែលមានវ័យចំណាស់ដែលធ្លាប់ឆ្លងកាត់សម័យសង្រ្គាម។ ការសិក្សាស្រាវជ្រាវរបស់អ្នកប្រវត្តិសាស្រ្តជាច្រើនបានបង្ហាញថា នៅក្រោយសង្រ្គាម មានអតីតមន្រ្តីរដ្ឋាភិបាលវៀតណាមខាងត្បូងរហូតដល់ទៅ ២០ម៉ឺននាក់ ត្រូវបានពួកកុម្មុយនិស្តចាប់ខ្លួនយកទៅដាក់ក្នុងជំរំប្រមូលផ្តុំ ហើយមានខ្លះត្រូវជាប់ឃុំរហូតដល់ឆ្នាំ១៩៩២។ ចំណែកឯប្រជាជនវៀតណាមខាងត្បូងរាប់សិបម៉ឺននាក់ផ្សេងទៀតបានរត់ភៀសខ្លួនតាមទូកទៅបរទេស។ ចលនាជនភៀសខ្លួនវៀតណាម ដែលគេហៅថា « Boat People » ដែលបច្ចុប្បន្នកំពុងរស់នៅក្រៅប្រទេស ជាពិសេស នៅបារាំង និងនៅកាណាដា ហើយដែលបានក្លាយជាកម្លាំងដ៏សំខាន់មួយ ក្នុងការប្រឆាំងនឹងរបបកុម្មុយនិស្តវៀតណាមក្នុងស្រុក។
នៅថ្ងៃព្រហស្បតិ៍នេះ មេដឹកនាំកំពូលៗវៀតណាម រាប់ចាប់តាំងពីប្រធានាធិបតី នាយករដ្ឋមន្រ្តី រហូតដល់សមាជិកបក្សកុម្មុយនិស្តនឹងចូលរួមក្នុងពិធីព្យុហយាត្រាដ៏ធំមួយ នៅក្នុងអតីតរដ្ឋធានីនៃវៀតណាមខាងត្បូង ដែលបច្ចុប្បន្នគេឲ្យឈ្មោះថា ក្រុងហូជីមិញ ដើម្បីរំឭកវិញ្ញានក្ខន្ធដល់ប្រជាជនវៀតណាមរាប់លាននាក់ដែលបាត់បង់ជីវិតក្នុងសង្រ្គាម និងជាពិសេស ដើម្បីអបអរខួប ៤០ឆ្នាំនៃជ័យជម្នះរបស់វៀតណាមលើកងទ័ពអាមេរិក គឺជ័យជម្នះរបស់ចលនាកុម្មុយនិស្តនៅវៀតណាម។
ក៏ប៉ុន្តែ គេសង្កេតឃើញថា នៅក្នុងពេលបច្ចុប្បន្ននេះ ៤០ឆ្នាំក្រោយជ័យជម្នះ ថ្វីដ្បិតតែវៀតណាមនៅតែមានរបបនយោបាយបែបកុម្មុយនិស្ត (អំណាចរដ្ឋទាំងអស់ត្រូវគ្រប់គ្រងដោយបក្សតែមួយ គឺបក្សកុម្មុយនិស្ត ដោយបិទខ្ទប់រាល់សំឡេងប្រឆាំង) ក៏ប៉ុន្តែ មនោគមន៍វិជ្ជាកុម្មុយនិស្តនៅវៀតណាមកំពុងតែឆ្លងកាត់នូវវិបត្តិ ដោយសារតែកត្តាធំៗចំនួន ៣ គឺការការរីកដុះដាលនៃចលនាសេដ្ឋកិច្ចបែបមូលធននិយម វិសមភាពក្នុងសង្គម និងអំពើពុករលួយនៅក្នុងជួររដ្ឋាភិបាល។
នៅក្រោយឆ្នាំ១៩៧៥ សង្រ្គាមរយៈពេល ២០ឆ្នាំ បានធ្វើឲ្យសេដ្ឋកិច្ចវៀតណាមត្រូវខូចខាតខ្ទេចខ្ទី ដែលជាហេតុធ្វើឲ្យបក្សកុម្មុយនិស្តវៀតណាមសុខចិត្តបោះបង់ចោលសេដ្ឋកិច្ចផែនការ ហើយបើកចំហទីផ្សារចាប់យកសេដ្ឋកិច្ចទីផ្សារសេរី ដោយយកគំរូតាមចិន។ មេដឹកនាំបក្សកុម្មុយនិស្តវៀតណាមតែងតែលើកឡើងការពារខ្លួនថា កំណែទម្រង់សេដ្ឋកិច្ច នៅក្នុងអំឡុងទសវត្សរ៍ឆ្នាំ៨០ បានទទួលជោគជ័យ ក្នុងការទាក់ទាញវិនិយោគបរទេស ជំរុញកំណើនសេដ្ឋកិច្ច និងកាត់បន្ថយភាពក្រីក្រ។
ជាការពិត គេសង្កេតឃើញថា វៀតណាមមានកំណើនសេដ្ឋកិច្ចខ្ពស់ចាប់តាំងពីឆ្នាំ១៩៩១ ហើយនៅក្នុងឆ្នាំ២០១៥នេះទៀតសោត គេព្យាករថា សេដ្ឋកិច្ចវៀតណាមនឹងមានកំណើន ៦,៥% ដែលជាអត្រាមួយខ្ពស់ធៀបនឹងបណ្តាប្រទេសជាច្រើនផ្សេងទៀត។ ក៏ប៉ុន្តែ ក្រុមអ្នកប្រឆាំងនឹងរដ្ឋាភិបាលវៀតណាម តែងតែបាននាំគ្នាធ្វើការកត់សម្គាល់ថា ធនធានដែលបានមកពីកំណើនសេដ្ឋកិច្ចរាប់សិបឆ្នាំកន្លងទៅនេះ មិនត្រូវបានចែករំលែកដល់ប្រជាជនដោយស្មើភាពគ្នានោះទេ ដោយគម្លាតរវាងអ្នកមាន និងអ្នកក្រ កើតមានកាន់តែខ្លាំង ហើយក្នុងពេលជាមួយគ្នា គេតែងតែលេចឮឥតដាច់នូវរឿងអាស្រូវពុករលួយ ដែលភាគច្រើនមានជាប់ពាក់ព័ន្ធនឹងមន្រ្តីជាន់ខ្ពស់បក្ស។ ទាំងអស់នេះគឺសុទ្ធសឹងជាហេតុផលសំខាន់ៗ ដែលធ្វើឲ្យចលនាប្រឆាំងនឹងបក្សកុម្មុយនិស្តវៀតណាមមានការកើនឡើងនៅក្នុងពេលបច្ចុប្បន្ន ដែលអ្នកជំនាញខ្លះយល់ថា អ្នកដែលឈ្នះសង្រ្គាមវៀតណាម កាលពី ៤០ឆ្នាំមុន កំពុងតែឆ្លងកាត់នូវបរាជ័យក្នុងការគ្រប់គ្រងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ