ភូមា៖លោកស្រីអ៊ុង សានស៊ូជីមានសុទិដ្ឋិនិយមនៅក្រោយជំនួបជាមួយលោកថាន់ ស្វេ
នៅក្នុងប្រទេសភូមា លោកស្រីអ៊ុង សានស៊ូជី ប្រធានគណបក្សប្រឆាំង គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យបានជួបសន្ទនាជាមួយលោកថាន់ ស្វេ អតីតប្រមុខរបបសឹកនៅថ្ងៃសៅរ៍ ទី៥ ធ្នូ។ ជំនួបរវាងលោកស្រីជ័យលាភីរង្វាន់ណូបែលសន្តិភាព និងអតីតមនុស្សខ្លាំងភូមាទទួលបានលទ្ធផលល្អ ព្រោះលោកថាន់ ស្វេបានគាំទ្រ និងសម្លឹងឃើញលោកស្រីអ៊ុង សានសូជីជាអនាគតអ្នកដឹកនាំ ចំណែករូបលោកស្រីអ៊ុង សានស៊ូជីក៏បានថ្លែងពីសុទិដ្ឋិនិយមសម្រាប់អនាគតប្រទេសភូមា។ គួរជម្រាបជូនថា គណបក្សសម្ព័ន្ធជាតិដើម្បីលទ្ធិប្រជាធិបតេយ្យទទួលបានជោគជ័យយ៉ាងធំធេងនៅក្នុងការបោះឆ្នោតនាដើមខែវិច្ឆិកាកន្លងទៅ។
ចុះផ្សាយនៅថ្ងៃ៖
ស្តាប់ - ០៦:១៣
ជំនួបរវាងលោកស្រីអ៊ុងសានស៊ូជី និងអតីតឧត្តមសេនីយថាន់ស្វេជាជំនួបសម្ងាត់ ព្រោះជាជំនួបមួយដែលគេមិនបានប្រាប់ឲ្យដឹងមុន ឬមួយជាជំនួបមួយដែលមិនបានគ្រោងទុកជាមុន។ លោកស្រីអ៊ុង សានស៊ូជី និងលោកថាន់ ស្វេមិនបានថ្លែងអ្វីនៅក្រោយជំនួបទេ តែព័ត៌មាន និងខ្លឹមសារនៃជំនួបត្រូវបានទម្លាយឲ្យដឹងដោយចៅប្រុសរបស់អតីតឧត្តមសេនីយថាន់ ស្វេ គឺលោកណៃស្វេ ថ្វៃអ៊ុង និងលោកវីន យីន អ្នកនាំពាក្យរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ។ លោកវីន យីនដែលបានបញ្ជាក់ជាផ្លូវការថា ពិតជាមានជំនួបសម្ងាត់រវាងលោកថាន់ ស្វេ និងលោកស្រីអ៊ុង សានស៊ូជីមែន និងថា នេះជាជំនួបលើកទី១ គិតតាំងពីឆ្នាំ ២០០៣។
ចំណែកលោកវីន ថេន ថ្នាក់ដឹកនំាម្នាក់របស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យបាននាំពាក្យលោកស្រីអ៊ុង សានស៊ូជីដែលថា លោកថាន់ ស្វេបាននិយាយប្រាប់លោកស្រីពីការដែលលោកបានគាំទ្រឲ្យមានដំណើរការលទ្ធិប្រជាធិបតេយ្យនៅភូមា និងការដែលលោកថាន់ ស្វេបានទទួលស្គាល់នូវសកម្មភាព និងជោគជ័យរបស់លោកស្រីអ៊ុង សានស៊ូជី។ ចំណែកចៅប្រុសរបស់លោកថាន់ ស្វេបានសរសេរនៅលើទំព័រ Facebook របស់ខ្លួនថា ជីតាថាន់ ស្វេបាននិយាយប្រាប់លោកស្រីអ៊ុង សានស៊ូជីពីការគាំទ្រដោយស្មោះត្រង់ដែលលោកអាចធ្វើបាន ប្រសិនបើលោកស្រីអាចបំពេញការងារដើម្បីអភិវឌ្ឍន៍ប្រទេស និងថា ទាំងអស់គ្នាត្រូវតែហ៊ានទទួលស្គាល់ការពិត ព្រមទំាងបានសម្លឹងឃើញលោកស្រីអ៊ុង សានស៊ូជីជាអនាគតអ្នកដឹកនាំប្រទេស។
តែលោកថាន់ ស្វេមិនបានបញ្ជាក់ពីអនាគតអ្នកដឹកនាំប្រទេសរបស់លោកស្រីអ៊ុង សានស៊ូជីក្នុងឋានៈជាអ្វីទេ។ យ៉ាងណាក៏ដោយ លោកស្រីអ៊ុង សានស៊ូជីមានសុទិដ្ឋិនិយមខ្លាំងណាស់ បន្ទាប់ពីបានជួបអតីតមនុស្សខ្លាំងរបបសឹកថាន់ ស្វេ។
អតីតមនុស្សខ្លាំងភូមាលោកថាន់ ស្វេនៅមានឥទ្ធិពលក្នុងឆាកនយោបាយភូមា !
បន្ទាប់ពីទទួលបានជោគជ័យយ៉ាងធំធេងនៅក្នុងការបោះឆ្នោតសភានាដើមខែវិច្ឆិកាកន្លងមក លោកស្រីអ៊ុង សានស៊ូជីបានចូលជួបសន្ទនាជាមួយអ្នកកាន់អណាចសព្វថ្ងៃ។ លោកស្រីបានជួបសន្ទនាជាមួយលោកប្រធានាធិបតីថេន សេន និងមេទ័ពលោកមីន អ៊ុងឡាងនាថ្ងៃពុធ ទី២ ធ្នូ។ តែជំនួបជាមួយអតីតប្រមុខរបបសឹកលោកថាន់ ស្វេពេលនេះក៏ត្រូវបានគេចាត់ទុកថា មានសារៈសំខាន់ដូចគ្នា។ សំខាន់ ព្រោះទាំងអ្នកដឹកនាំសព្វថ្ងៃ និងអតីតអ្នកដឹកនាំសុទ្ធតែចេញមកពីប្រភពដូចគ្នា ពោលសុទ្ធសឹងជាក្រុមមនុស្សខ្លាំងក្នុងជំនាន់របបសឹក។ គ្រាន់តែថា លោកថាន់ ស្វេដែលបច្ចុប្បន្នមានអាយុ ៨២ឆ្នាំទើបតែបានសម្រេចចិត្តដកខ្លួនចេញពីកិច្ចការនយោបាយនាប៉ុន្មានឆ្នាំចុងក្រោយនេះ។
សំណួរដែលកំពុងបន្តចោទ និងដែលរូបលោកស្រីអ៊ុង សានស៊ូជីខ្លួនឯងមិនអាចមើលរំលងបាននោះ គឺឥទ្ធិពលរបស់លោកថាន់ ស្វេនៅក្នុងឆាកនយោបាយភូមាសព្វថ្ងៃ។
គួរជម្រាបជូនថា លោកថាន់ ស្វេជាប្រមុខដឹកនាំរបបសឹកកណ្តាប់ដៃដែកជិត ២ទសវត្សពីខែមេសា ឆ្នំា ១៩៩២ ដល់ខែមីនា ឆ្នាំ ២០១១។ គឺរូបលោកថាន់ ស្វេដែលបានចាប់លោកស្រីអ៊ុង សានស៊ូជីទៅឃុំឃាំងក្នុងគេហដ្ឋានអស់រយៈពេលជាច្រើនឆ្នាំ។ គឺរូបឧត្តមសេនីយថាន់ ស្វេដែលបានបញ្ជាឲ្យកម្លំាងប៉ូលិស និងទាហានវាយបង្រ្កាបយ៉ាងបង្ហូរឈាមលើក្រុមបាតុករទាមទារលទ្ធិប្រជាធិបតេយ្យដឹកនំាដោយលោកស្រីអ៊ុង សានស៊ូជីក្នុងដំណាច់ទសវត្សឆ្នាំ ៨០។ គឺអតីតមនុស្សខ្លាំងថាន់ ស្វេដែលបានបដិសេធមិនទទួលស្គាល់លទ្ធផលនៃការបោះឆ្នោតសភាក្នុងឆ្នាំ ១៩៩១ ដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុងសានស៊ូជីទទួលបានជោគជ័យភ្លូកទឹក ភ្លូកដី។
ដូច្នេះគេអាចនិយាយបាន លោកថាន់ ស្វេ និងលោកស្រីអ៊ុង សានស៊ូជីជាសត្រូវនឹងគ្នា។ តែឥឡូវនេះ សត្រូវរបស់លោកស្រីអ៊ុង សានស៊ូជីបានចេញមុខគាំទ្រលោកស្រីពេញទី ព្រមទាំងសម្លឹងឃើញលោកស្រីជាអនាគតអ្នកដឹកនាំទៀតផង។ គឺការគាំទ្ររបស់លោកថាន់ ស្វេនេះហើយដែលលោកស្រីអ៊ុង សានស៊ូជីមិនញញើតនឹងថ្លែងពីសុទិដ្ឋិនិយមសម្រាប់អនាគតប្រទេសភូមា។ លោកស្រីយល់ច្បាស់ណាស់ថា តិច ឬច្រើន អតីតឧត្តមសេនីយថាន់ ស្វេនៅតែមានឥទ្ធិពលក្នុងឆាកនយោបាយភូមា។
កងទ័ពនៅបន្តដើរតួនាទីសំខាន់ក្នុងឆាកនយោបាយភូមា
ភូមាជាប្រទេសក្រីក្រមួយនៅអាស៊ីអាគ្នេយ៍ដែលស្គាល់តែរបបដឹកនំាយោធា ហើយសូម្បីតែរដ្ឋាភិបាលស៊ីវិលដែលទើបបង្កើតឡើងក្នុងឆ្នំា ២០១១ ក៏ដឹកនំាឲ្យអតីតយោធាដែរ រាប់ទំាងលោកប្រធានាធិបតីថេន សេនផង។ ពិតណាស់ថា គណបក្សលោកស្រីបានឈ្នះឆ្នោតយ៉ាងធំធេងនៅក្នុងការបោះឆ្នោតនាដើមខែវិច្ឆិកាកន្លងទៅមែន តែគេមិនត្រូវភ្លេចនិយាយទេថា នៅក្នុងចំនួនអសនៈទំាង ៤៤០ នៅក្នុងរដ្ឋសភា មានអសនៈ ១ភាគ៤ ត្រូវបានកក់ទុកសម្រាប់កងទ័ពជាស្វ័យប្រវត្តិដោយមិនបាច់បោះឆ្នោតហើយការតែងតំាងរដ្ឋមន្រ្តីក្រសួងសំខាន់ៗមួយចំនួន ដូចយ៉ាងក្រសួងការពារជាតិ ក្រសួងមហាផ្ទៃ ឬក្រសួងទទួលបន្ទុកកិច្ចការព្រំដែនជាបន្ទុករបស់មេបញ្ជាការកងទ័ព។
ដូច្នេះឃើញថា ទោះបីជាលទ្ធផលបោះឆ្នោតបានផ្តល់ជោគជ័យភ្លូកទឹក ភ្លូកដីឲ្យគណបក្សរបស់លោកស្រីអ៊ុង សានស៊ូជីមែន ក៏កងទ័ពនៅតែដើរតួនាទីយ៉ាងសំខាន់នៅក្នុងសង្គមភូមា និងដែលលោកស្រីអ៊ុង សានស៊ូជីគ្មានជម្រើសអ្វីក្រៅពីរួមសហការណ៍ជាមួយកងទ័ពទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ