លោក ថេន សេន ប្រកាសផ្ទេរអំណាចដោយសន្តិវិធីឲ្យលោកស្រី អ៊ុងសាន ស៊ូជី
លោកប្រធានាធិបតីភូមា ថេន សេន បានប្រកាស នៅថ្ងៃនេះថា នឹងមានការផ្ទេរអំណាចរដ្ឋបាល ដោយសន្តិវិធី ទៅឲ្យគណបក្សឈ្នះឆ្នោតរបស់លោកស្រី អ៊ុងសាន ស៊ូជី។ គណបក្សសម្ព័ន្ធជាតិដើម្បីប្រជាធិបតេយ្យ របស់លោកស្រី អ៊ុងសាន ស៊ូជី បានឈ្នះឆ្នោតសភាលើសលប់ជាង៨០ភាគរយ ក្នុងការបោះឆ្នោតជាតិ កាលពីសប្តាហ៍មុន។ ប្រធានាធីបតីភូមាជិតផុតអាណត្តិ លោក ថេន សេន នៅថ្ងៃអាទិត្យនេះ ក៏បញ្ជាក់ដែរថា លោកសន្យានឹងមានការផ្ទេរអំណាច ហើយសូមកុំឲ្យមានការព្រួយបារម្ភ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
នៅទីក្រុង Rangoun លោក ថេន សេន ប្រធានាធិបតីភូមាជិតផុតអាណត្តិ បានកោះប្រជុំ នៅថ្ងៃអាទិត្យនេះ និងបានប្រកាសថា នឹងមានការផ្ទេរអំណាចរដ្ឋបាល ដោយសន្តិវិធី ទៅឲ្យគណបក្សឈ្នះឆ្នោតរបស់លោកស្រី អ៊ុងសាន ស៊ូជី ។ មិនតែប៉ុណ្ណោះ លោក ថេន សេន ថែមទាំងបានលើកសរសើរខ្លួនឯងផងថា ការឈ្នះឆ្នោតរបស់បក្សប្រឆាំង នៅពេលនេះ គឺជាលទ្ធផលល្អនៃការធ្វើកំណែទម្រង់រដ្ឋាភិបាលរបស់លោកទៀតផង។
លោក ថេន សេន ដែលទើបតែចេញមុខ ជាសាធារណៈលើកទី១ បន្ទាប់ពីការបោះឆ្នោតជាតិសប្តាហ៍មុខ នៅថ្ងៃនេះ បានអបអរសាទរ គណបក្សប្រឆាំង និងបញ្ជាក់ប្រាប់ថា «សូមកុំបារម្ភពីការផ្លាស់ប្តូរអំណាចនេះ ហើយលោកសូមសន្យា»។ ទន្ទឹមនឹងនេះ អ្នកនាំពាក្យគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុង សានស៊ូជី បានគូសបញ្ជាក់ថា «នេះគឺជាការផ្សះផ្សារជាតិដ៏ធំសម្បើម»។
ចំណែកប្រមុខបក្សប្រឆាំង លោកស្រី អ៊ុង សានស៊ូជី បានរក្សាភាពស្ងាត់ស្ងៀមតាំងតែពីការបោះឆ្នោតរួច ហើយក៏កំពុងតែរង់ចាំការចរចាបន្តទៀត នៅសប្តាហ៍ក្រោយ គឺនៅរដ្ឋធានី Naypyidaw ដែលជាទីក្រុងរដ្ឋបាលរបស់ប្រទេសភូមា។ ទោះយ៉ាងណាក្តី ការចរចា នៅអាទិត្យក្រោយនេះ នៅមិនទាន់មានការកំណត់ថ្ងៃ ខែម៉ោងពេល ឲ្យជាក់ច្បាស់នៅឡើយទេ។
យ៉ាងណាក៏ដោយចុះ គេមិនទាន់ដឹងថា តំណែងអនាគតប្រធានាធិបតីអាណត្តិថ្មីរបស់ប្រទេសភូមា ត្រូវធ្លាក់ទៅលើនរណានៅឡើយទេ។ ក៏ប៉ុន្តែ ចំពោះលោកស្រី អ៊ុងសាន ស៊ូជី បើតាមច្បាប់រដ្ឋធម្មនុញ្ញភូមា ច្បាស់ជាមិនអាចក្លាយជាប្រធានាធិបតីភូមាបានឡើយ ដោយសារតែលោកស្រី មានកូនប្រុស២នាក់ សញ្ជាតិបរទេស ដែលផ្ទុយពីរដ្ឋធម្មនុញ្ញ។ បើលោកស្រីចង់ធ្វើវិសោធនកម្មរដ្ឋធម្មនុញ្ញ ក៏រឹតតែលំបាកទៅទៀត ប្រសិនបើពុំមានការយល់ព្រមពីពួកយោធា ដែលកាន់កាប់សំឡេង២៥ភាគរយ ក្នុងរដ្ឋសភានោះ។
សូមបញ្ជាក់ថា បើតាមរដ្ឋធម្មនុញ្ញ ពួកយោធាទាំង២៥ភាគរយ ក្នុងរដ្ឋសភានោះ ត្រូវជាប់ជាតំណាងរាស្ត្រដោយការតែងតាំង មិនបាច់មានការបោះឆ្នោតទេ។ ជារួម បើអ្វីៗប្រព្រឹត្តទៅដោយរលូនមែន ប្រទេសភូមា នឹងមានរដ្ឋសភា និងរដ្ឋាភិបាលថ្មី នៅដើមក្រោមឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ