ភូមា៖ហេតុអ្វីបានជាលោកស្វេ ម៉ានត្រូវបានគេកំចាត់ចេញពីតំណែងប្រធានបក្ស?
ចុះផ្សាយនៅថ្ងៃ៖
ស្តាប់ - ០៥:០០
កាលពីថ្ងៃព្រហស្បតិ៍ ទី១៣ សីហាកន្លងទៅនេះ លោកស្វេ ម៉ាន ប្រធានរដ្ឋសភា និងជាគណបក្សសាមគ្គី និងអភិវឌ្ឍន៍សហភាពដែលជាបក្សកាន់អំណាចសព្វថ្ងៃត្រូវបានគេដកចេញពីតំណែងគណបក្សយ៉ាងទាន់ហន់។ ការកំចាត់លោកស្វេ ម៉ានចេញពីប្រធានបក្សត្រូវបានគេឲ្យហេតុផលជាផ្លូវការថា គឺជាការដោះដូរដើម្បីឲ្យការងាររបស់បក្សមានដំណើរការល្អ និងទទួលបានប្រសិទ្ធិភាពជាងមុន។ តែក្រុមអ្នកវិភាគបានមើលឃើញថា ទង្វើនេះជារដ្ឋប្រហារនៅផ្ទៃក្នុងបក្សដែលមានការរៀបចំទុកជាមុន ពិសេសនៅប៉ុន្មានមុនការរៀបចំបោះឆ្នោតសភានាខែវិច្ឆិកាខាងមុខ។ តើអ្វីទៅ ជាការពិត?
វាពិតណាស់ថា ការរុះរើដោះដូរសមាសភាពដឹកនំានៅក្នុងគណបក្សមួយ រហូតដល់ផ្លាស់តំណែងប្រធាន ជារឿងមួយធម្មតា តែអ្វីដែលមិនធម្មតា និងហាក់ដូចជាចម្លែកបន្តិចនៅក្នុងប្រទេសភូមានោះគឺថា លោកស្វេ ម៉ានត្រូវបានគេធ្វើរដ្ឋប្រហារទម្លាក់ចេញពីតំណែងបក្សតែម្តង។ ការហ៊ាននិយាយយ៉ាងដូចនេះក៏ដោយសារថា នៅក្នុងថ្ងៃដកតំណែងលោកស្វេ ម៉ាន រដ្ឋអំណាចបានដាក់ពង្រាយកម្លំាងប៉ូលិសយ៉ាងច្រើនសម្បើមព័ទ្ធជុំវិញទីស្នាក់ការគណបក្ស។ តើរូបភាពរបៀបនេះ មិនមែនជាការធ្វើរដ្ឋប្រហារទេ ឬយ៉ាងណា? ហើយបើជារូបភាពធ្វើរដ្ឋប្រហារមែន តើវាជាស្នាដៃរបស់អ្នកណា?។ សំណួរមួយទៀតសួរថា ហេតុអ្វីបានជាការដកលោកស្វេ ម៉ានចេញពីប្រធានបក្សបានធ្វើឡើងនៅប៉ុន្មានខែមុនការបោះឆ្នោតសភានាខែវិច្ឆិកាខាងមុខ?។
មកដល់ត្រង់ចំណុចនេះត្រូវបានក្រុមអ្នកវិភាគមើលឃើញយ៉ាងច្បាស់ក្រឡែតថា អ្នកដែលបានផ្តួចផ្តើមគំនិតរៀបចំកំចាត់លោកស្វេ ម៉ានចេញពីតំណែងប្រធានបក្ស គឺគ្មាននរណាក្រៅពីលោកប្រធានាធិបតីថេន សេនសព្វថ្ងៃទេ។ ចូរកុំភ្លេចថា ក្នុងពេលដែលភូមាស្ថិតក្រោមការកាន់កាប់របស់របបសឹក លោកស្វេ ម៉ាន និងលោកថេន សេនជាឧត្តមសេនីយដូចគ្នា តែបើគិតជាឋានន្តរសក្តិ លោកស្វេ ម៉ានដែលជាមនុស្សខ្លំាងលំដាប់ទី៣ របស់របបសឹកមានឋានៈខ្ពស់។ នៅក្រោយការរំលាយរបបសឹកក្នុងឆ្នំា ២០១១ ឧត្តមសេនីយស្វេ ម៉ានមានមហិច្ឆតាចង់កាន់តំណែងប្រធានាធិបតី តែនៅទីបំផុត តំណែងកំពូលមួយនេះបានធ្លាក់ទៅក្នុងកណ្តាប់ដៃឧត្តមសេនីយថេន សេន ហើយលោកស្វេ ម៉ានបានទទួលតំណែងប្រធានរដ្ឋសភា។
ការបែងចែងអំណាចរបៀបនេះត្រូវបានគេយល់ឃើញថា គឺដើម្បីបញ្ចប់ការប្រជែងកម្លំាងគ្នារវាងអតីតឧត្តមសេនីយទំាងពីររូប។ តែពេលវេលាកាន់តែខិតទៅមុខ ពិសេសនៅប៉ុន្មានខែមុនការបោះឆ្នោតសភានាខែវិច្ឆិកាឈានមកដល់ ទំនាក់ទំនងរវាងឥស្សរជននយោបាយជើងចាស់ទំាងពីរនាក់ក៏បានផ្តើមរង្គោះរង្គើកាន់តែខ្លំាងឡើងដែរ។ អ្វីដែលលោកស្វេ ម៉ានបាន និងកំពុងសម្លឹងឃើញនៅពេលខាងមុខ គឺតំណែងប្រធានាធិបតី។ អ៊ីចឹងហើយបានជានារយៈពេលចុងក្រោយនេះ លោកស្វេ ម៉ានបានផ្តើមដើរតួនាទីជាប្រធានាធិបតីដោយកាត់មុខ កាត់មាត់លោកថេន សេន ពិសេសការរំកិលទៅរកលោកស្រីអ៊ុង សានស៊ូជី ប្រធានគណបក្សប្រឆំាង គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យដែលគេមើលឃើញថា ជាអ្នកឈ្នះឆ្នោតនៅក្នុងការបោះឆ្នោតសភាខាងមុខ។
លោកស្វេ ម៉ានបានដឹងយ៉ាងច្បាស់ថា ដើម្បីអាចទទួលបានតំណែងប្រធានាធិបតី លោកត្រូវការសម្លេងគំាទ្រពីលោកស្រីអ៊ុង សានស៊ូជី និងគណបក្សរបស់លោកស្រីនៅក្នុងរដ្ឋសភា។ ចូរកុំភ្លេចថា ច្បាប់ធម្មនុញ្ញភូមាសព្វថ្ងៃបានរារំាងឥស្សរជននយោបាយណាដែលរៀបការជាមួយជនបរទេស ឬមួយក៏មានកូនជាមួយជនបរទេសឡើងកាន់តំណែងប្រធានាធិបតី។ ដូច្នេះគ្មានទេតំណែងប្រធានាធិបតីសម្រាប់លោកស្រីអ៊ុង សានស៊ូជី ព្រោះលោកស្រីបានរៀបការជាមួយជនបរទេស។ ប៉ុន្តែមានការលើកឡើងថា លោកស្រីអ៊ុង សានស៊ូជីអាចនឹងចងសម្ព័ន្ធជាមួយលោកស្វេ ម៉ានដើម្បីទទួលបានតំណែងអនុប្រធានាធិបតី ក្នុងករណីណាដែលលោកស្វេ ម៉ានកាន់តំណែងប្រធានាធិបតី។
សំណួរសួរថា ចុះលោកថេន សេនវិញ តើលោកនឹងឈប់កាន់តំណែង ឬមួយក៏ចង់កាន់បន្តទៀត?។ រហូតដល់ពេលនេះ នៅមិនទាន់មានសញ្ញា ឬតម្រុយអ្វីមួយដែលអាចបញ្ជាក់បំណងរបស់លោកថេន សេនបានឡើយ។ គួរជម្រាបជូនថានៅភូមា សភាជាអ្នកបោះឆ្នោតជ្រើសរើសរូបប្រធានាធិបតី ហើយនៅក្នុងសភាភូមាទៀតសោត មានអសនៈចំនួន ២៥% ត្រូវបានគេកក់ទុកជាស្វ័យប្រវត្តិសម្រាប់កងទ័ពដោយមិនបាច់បោះឆ្នោត។ លោកថេន សេនអាចពឹងលើសន្លឹកឆ្នោតរបស់ក្រុមអ្នកតំណាងរាស្រ្តទាហានទំាងអស់សម្រាប់អាណត្តិថ្មី តែអ្វីដែលលោកថេន សេនកំពុងបារម្ភខ្លំាងនោះ គឺក្រុមសមាជិកសភានៃបក្សប្រឆំាងរបស់លោកស្រីអ៊ុង សានស៊ូជីដែលលោកស្វេ ម៉ានកំពុងចែចូវ។
ដូច្នេះជម្រើសរបស់លោកថេន សេនគឺច្បាស់ណាស់ មនុស្សដែលលោកត្រូវកំចាត់ និងដែលអាចកំចាត់បានឥឡូវនេះ គឺគ្មាននរណាក្រៅពីលោកស្វេ ម៉ានឡើយ។ តើទង្វើរបៀបនេះ ជាការប្រជែងកម្លំាងគ្នារវាងអតីតឧត្តមសេនីយថេន សេន និងស្វេ ម៉ាន ឬមួយក៏ជាការផ្តើមបែកបាក់ផ្ទៃក្នុងរបស់គណបក្សកាន់អំណាច?
ចម្លើយមួយណាក៏ត្រូវដែរ ប្រជែងកម្លំាងគ្នារវាងមនុស្សខ្លំាងពីរនាក់ក៏ត្រូវ ឬមួយក៏ការផ្តើមបែកបាក់ផ្ទៃក្នុងរបស់គណបក្សកាន់អំណាចក៏ថាបាន។ តែអ្វីដែលគួរឲ្យកត់សម្គាល់នោះគឺថា អ្នកឈ្នះនៅក្នុងរឿងរ៉ាវនេះមិនមែនលោកថេន សេន ហើយក៏មិនមែនលោកស្វេ ម៉ានដែរ តែគឺលោកស្រីអ៊ុង សានស៊ូជីឯណោះទៅវិញទេ។ នៅថ្ងៃអង្គារ ទី១៨ សីហា លោកស្រីអ៊ុង សានស៊ូជីបានថ្លែងថា គណបក្សលោកស្រីនឹងចងសម្ព័ន្ធភាពជាមួយលោកស្វេ ម៉ាន និងថា ចាប់ពីពេលនេះតទៅ គេបានដឹងហើយថា តើនរណាជាមិត្ត និងនរណាជាសត្រូវរបស់គណបក្សប្រឆំាង។ ទន្ទឹមគ្នានេះ លោកស្រីអ៊ុង សានស៊ូជីក៏បានសម្តែងក្តីបារម្ភដូចអាមេរិក និងអង់គ្លេសទាក់ទងនឹងវិធានការបែបរដ្ឋប្រហារក្នុងការដកតំណែងលោកស្វេ ម៉ាន។
គឺជារូបភាពមួយដែលធ្លាប់អនុវត្តន៍ដោយរបបសឹកនៅក្នុងអតីតកាល។ អ្វីដែលគ្រប់គ្នាកំពុងបារម្ភពេលនេះ គឺខ្លាចតែព្រឹត្តិការណ៍មួយនេះក្លាយជាសញ្ញានៃការផ្តើមក្តាប់អំណាចជាថ្មីរបស់យោធានៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ