ភូមា៖លោកថេន សេនចេញមុខធ្វើជាអន្តរការីទាមទារឲ្យសភាកែប្រែគម្រោងច្បាប់អប់រំ
នៅប្រទេសភូមា លោកប្រធានាធិបតីថេន សេនបានចេញមុខធ្វើជាអន្តរការីដោយបានទាមទារឲ្យសភាធ្វើការកែប្រែលើគម្រោងច្បាប់អប់រំ។ គម្រោងច្បាប់អប់រំដែលក្រុមសិស្ស និស្សិតចាត់ទុកថា មានលក្ខណៈប្រឆំាងនឹងលទ្ធិប្រជាធិបតេយ្យ។ សំណើទាមទាររបស់លោកថេន សេនពេលនេះបានធ្វើឡើង ចំពេលដែលសិស្ស និស្សិតបានប្រកាសឲ្យដឹងនៅថ្ងៃពុធ ទី២១ មករាថា នឹងរក្សាគម្រោងធ្វើបាតុកម្មប្រឆំាងនឹងគម្រោងច្បាប់អប់រំថ្មីនោះ។
ចុះផ្សាយនៅថ្ងៃ៖
ស្តាប់ - ០២:០៨
គឺនៅក្នុងសេចក្តីជូនដំណឹងមួយរបស់វិមានប្រធានាធិបតីដែលលោកថេន សេនបានថ្លែងយ៉ាងច្បាស់ៗថា មានតែការធ្វើវិសោតនកម្មលើគម្រោងច្បាប់ស្តីពីកាអប់រំដ៏ចម្រូងចម្រាសទេ ទើបគេអាចរួមចំណែកឲ្យមានសន្តិភាព និងស្ថិរភាព ព្រមទំាងអនុញ្ញាតឲ្យសិស្ស និស្សិតបន្តការសិក្សារៀនសូត្ររបស់ខ្លួនដោយសុខសន្តិភាព។ ការបញ្ចេញប្រតិកម្មរបស់លោកប្រធានាធិបតីភូមាពេលនេះបានធ្វើឡើង មួយថ្ងៃ ក្រោយពីមានសិស្សមួយក្រុមបាននំាគ្នាចុះផ្លូវធ្វើបាតុកម្មដោយគ្មានការអនុញ្ញាតក្នុងទីក្រុងម៉ង់ដាឡៃដើម្បីប្រឆំាងនឹងគម្រោងកំណែទម្រង់ច្បាប់អប់រំដែលសភាកំពុងធ្វើការសិក្សា។ គម្រោងច្បាប់ដែលបាតុករសិស្ស និស្សិតយល់ថា មានលក្ខណៈប្រឆំាងនឹងលទ្ធិប្រជាធិបតេយ្យ និងថា សញ្ញានៃឆន្ទៈដ៏ល្អរបស់រដ្ឋាភិបាលពេលនេះនៅមិនទាន់គ្រប់គ្រាន់ទេ។ ចំណែកលោកលេខាធិការនៃសហព័ន្ធសហជីពសិស្សបានបញ្ចេញប្រតិកម្មថា អ្វីដែលសិស្ស និស្សិតចង់បាន គឺការផ្លាស់ប្តូរពិតប្រាកដមួយ។
គួរជម្រាបជូនថា បន្ទាប់បានចុះផ្លូវធ្វើបាតុកម្មដំបូងក្នុងខែវិច្ឆិកា ឆ្នំា ២០១៤ កន្លងទៅ ក្រុមសិស្ស និស្សិតគ្រោងនឹងដង្ហែរក្បួនបាតុកម្មពីទីក្រុងម៉ង់ដាឡៃទៅកាន់ទីក្រុងរ៉ង់ហ្គូនដែលមានចម្ងាយ ៦០០គីឡូម៉ែត្រដោយធ្វើការឈប់សម្រាកជាដំណាក់ៗនៅតាមផ្លូវ។ អ្វីដែលពួកគេបានទាមទារជាចម្បងនៅក្នុងគម្រោងច្បាប់អប់រំថ្មីនោះ គឺសុំឲ្យមានការដំឡើងថវិកាអប់រំ និងទាមទារកុំឲ្យលប់ចោលសិទ្ធិក្នុងការបង្កើតសហជីពសិស្ស និស្សិត។ គួរជម្រាបជូនថា សិស្ស និស្សិត ជាកម្លំាងនយោបាយមួយយ៉ាងសំខាន់នៅក្នុងប្រវត្តិនៃប្រទេសភូមាសម័យថ្មី។ នៅក្នុងអតីតកាល ពួកគេក៏ធ្លាប់បានងើបប្រឆំាងនឹងរបបសឹកអស់ជាច្រើនទសវត្ស ដូចយ៉ាងមហាបាតុកម្មក្នុងឆ្នំា ១៩៩៨ ដែលត្រូវបានកម្លំាងទ័ពវាយបង្រ្កាបយ៉ាងបង្ហូរឈាម។
គួររម្លឹកជូនឡើងវិញថា គឺទើបតែក្នុងឆ្នំា ២០១១ កន្លងទៅទេដែលភូមាបានប្តូរពីរបបដឹកនំាដោយយោធាមករបបដឹកនំាដោយស៊ីវិល និងដែលរូបលោកថេន សេនផ្ទាល់ ក៏បានដោះសម្លៀកបំពាក់យោធាមកស្លៀកស៊ីវិលដើម្បីកាន់តំណែងប្រធានាធិបតីសព្វថ្ងៃ។ តែបញ្ហានៅត្រង់ថា នៅមានរឿងសេសសល់ពីរបបសឹកជាច្រើនដែលធ្វើកំណែទម្រង់ឡើងវិញ ពិសេសច្បាប់រដ្ឋធម្មនុញ្ញរបស់ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ