កងទ័ព និងពួកឧទ្ទាមកាឈីនចាប់អាវុធ ប្រយុទ្ធដាក់គ្នាជាថ្មី
មនុស្សជាច្រើនរយនាក់បានរត់ភៀសខ្លួន កាលពីថ្ងៃព្រហស្បតិ៍ម្សិលមិញ ដើម្បីគេចចេញពីការប្រយុទ្ធគ្នាយ៉ាងខ្លាំងមួយ រវាងទ័ពរដ្ឋាភិបាល និងពួកឧទ្ទាម នៅរដ្ឋកាឈីន ភាគខាងជើងប្រទេសភូមា។ សមរភូមិប្រយុទ្ធ មិនបន្ធូរដៃរបស់កងទ័ពរដ្ឋាភិបាលធ្វើឡើង នៅមួយថ្ងៃក្រោយពួកឧទ្ទាមចាប់ជំរិតរដ្ឋមន្រ្តីក្រសួងដឹកជញ្ជូនប្រចាំតំបន់នោះ និងប៉ូលិសបីនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
រដ្ឋមន្រ្តីក្រសួងដឹកជញ្ជូនដែលពួកឧទ្ទាមកាឈីន ចាប់ជាចំណាប់ខ្មាំង កាលពីថ្ងៃពុធត្រូវបានដោះលែងរួចហើយ ប៉ុន្តែ ប៉ូលិសភូមាបីនាក់ នៅបន្តជាប់ជាចំណាប់ខ្មាំងរបស់ក្រុមទាមទារឯករាជ្យកាឈីនដដែល។ នេះបើតាមការចុះផ្សាយរបស់កាសែតGlobal New Light of Myanmar។
អ្នកទទួលខុសត្រូវទ័ពកាឈីនវិញបានបញ្ជាក់ប្រាប់ទីភ្នាក់ងារព័ត៌មានបារាំង AFPថា ការប្រយុទ្ធគ្នាខ្លាំង ដែលមិនបាន កើតមានក្នុងរយៈពេលមួយឆ្នាំចុងក្រោយនេះ បានផ្ទុះឡើង តាំងពីព្រឹកព្រលឹមស្រាងៗ ដោយកងទ័ពរដ្ឋាភិបាលភូមាបានបើកការបាញ់ប្រហារទៅលើតំបន់គ្រប់គ្រងរបស់ឧទ្ទាមកាឈីន នៅភាគខាងជើងប្រទេសភូមា។
សកម្មជនម្នាក់របស់បណ្តាញដើម្បីសន្តិភាពនៅកាឈីន បាននិយាយថា មនុស្សជាង៨០០នាក់បានរត់ចោលផ្ទះសម្បែង និងរកកន្លែងជ្រកគេចពីគ្រាប់កាំភ្លើង នៅតាមវត្ត និងវិហារសាសនាគ្រឹស្ត។
តំាងពីខែវិច្ឆិកា ពោលគឺបន្ទាប់ពីពួកឧទ្ទាមកាឈីន១២នាក់ ត្រូវទ័ពរដ្ឋាភិបាលបាញ់សម្លាប់ ភាពតានតឹងកើតមានជាប្រចាំ នៅក្នុងតំបន់ភាគខាងជើងភូមា។ បទឈប់បាញ់ដែលមានសុពលភាពអស់១៧ឆ្នាំ នៅភូមា ក៏ត្រូវភាគីទាំងសងខាង រំលោភ មិនគោរពតាម។ ការប្រទះអាវុធគ្នាជាញឹកញយរវាងកងទ័ពរដ្ឋាភិបាល និងពួកឧទ្ទាមបានធ្វើឲ្យមនុស្សជាង ១សែននាក់ តាំងពីឆ្នាំ ២០១១មក ត្រូវរត់ភៀសខ្លួន ទៅរស់នៅតាមតំបន់ជាប់ព្រំដែនចិន។
ចាប់តាំងពីបានទទួលឯករាជ្យពីប្រទេសអង់គ្លេស ឆ្នាំ ១៩៤៨ ភូមានៅតែរងញាំញី ដោយសង្រ្គាមស៊ីវិល ក្នុងស្រុករវាងអ្នកកាន់អំណាចកណ្តាល និងពួកកុលសម្ព័ន្ធ អ្នកតំណាងជនជាតិភាគតិច ដែលមានច្រើនក្រុមនៅ ភូមា។ កាលពីខែកញ្ញាកន្លងទៅ ការប៉ុនប៉ងចរចា ដើម្បី បទឈប់បាញ់ថ្នាក់ជាតិបានជួបបរាជ័យ។ ខុសពីពួកឧទ្ទាមរបស់កុលសម្ព័ន្ធចំនួន១៤ដែលបានចុះកិច្ចព្រមព្រៀងធ្វើបទឈប់បាញ់ជាមួយរដ្ឋាភិបាល ពួកឧទ្ទាមកាឈីន និងស្ហាន នៅតែមិនព្រមចុះញ៉មនឹងរដ្ឋាភិបាលភូមា។
នៅពេលដែលការបោះឆ្នោតសភា កាន់តែខិតចូលមកដល់ នៅចុងឆ្នាំ ២០១៥ រដ្ឋាភិបាលស៊ីវិលភូមាចង់បានបទឈប់បាញ់ថ្នាក់ជាតិ ជាមួយពួកឧទ្ទាម ដើម្បីបញ្ចុះបញ្ចូល អូសទាញទាំងមតិជាតិ និងអន្តរជាតិ។ ប៉ុន្តែ ការវាយប្រហារមិនឈប់របស់ទាហានរដ្ឋាភិបាលទៅលើក្រុមឧទ្ទាម ដែលមិនសម្របខ្លួន តាមរដ្ឋាភិបាល បានបង្កឲ្យមានបរិយាកាសមិនទុកចិត្ត ចំណែកការប្រយុទ្ធគ្នា នៅតែបន្តមាន នៅតាមតំបន់ដែលកាន់កាប់ដោយពួកកាឈីន និងពួកស្ហាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ