មេរោគមជ្ឈិមបូព៌ាមែរ (MERS) បានឆ្លងចូលដល់ប្រទេសថៃ
នៅក្នុងប្រទេសថៃ ក្រសួងសុខាភិបាលបានប្រកាសឲ្យដឹងពីវត្តមានមេរោគមជ្ឈិមបូព៌ាមែរ (MERS) លើកទី១ នៅក្នុងទីក្រុងបាងកក។ ករណីនេះបានធ្វើឲ្យថៃក្លាយជាប្រទេសអាស៊ីទី២ បន្ទាប់ពីកូរ៉េខាងត្បូងដែលឆ្លងមេរោគផ្លូវដង្ហើមមជ្ឈិមបូព៌ាមែរ (MERS) មានប្រភពចេញពីប្រទេសអារ៉ាប៊ីសាអូឌីត។ លោករដ្ឋមន្រ្តីក្រសួងសុខាភិបាលថៃរ៉ាយ៉ាតា រ៉ាយ៉ាតាណាវីនបានប្រកាសឲ្យដឹងពីវត្តមានមេរោគមែរ និងអំពាវនាវកុំឲ្យប្រជាជនជ្រួលច្របល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
គឺនៅក្នុងសន្និសីទកាសែតមួយដែលលោករដ្ឋមន្រ្តីក្រសួងសុខាភិបាលថៃរ៉ាយ៉ាតា រ៉ាយ៉ាតាណាវីន បានបញ្ជាក់ពីវត្តមានមេរោគមែរលើកទី១ ក្នុងទឹកដីថៃ។ យោងតាមលោករ៉ាយ៉ាតាណាវីន អ្នកមានផ្ទុកមេរោគមែរមិនមែនជាជនជាតិថៃទេ តែជាបុរសជនជាតិអូម៉ង់មានអាយុ ៧៥ឆ្នំាដែលបានមកដល់ទឹកដីថៃកាលពីថ្ងៃទី១៥ មិថុនាដើម្បីព្យាបាលជម្ងឺបេះដូងនៅក្នុងមន្ទីរពេទ្យដ៏ធំមួយស្ថិតក្នុងទីក្រុងបាងកក។ គឺជាមន្ទីរពេទ្យដ៏ពេញនិយមសម្រាប់ប្រជាជនមកពីតំបន់មជ្ឈិមបូព៌ា។ លោករ៉ាយ៉ាតាណាវីនបានលំអិតបន្ថែមថា នៅពេលដែលបុរសជនជាតិអូម៉ង់បានមកដល់មន្ទីរពេទ្យឯកជនក្នុងទឹកដីថៃដំបូង រូបគាត់មានអាការៈក្អក និងពិបាកដកដង្ហើម។ ខណៈនេះ រដ្ឋអំណាចថៃបាននំាយកសមាជិកគ្រួសារ ៣នាក់ដែលនំាអ្នកជម្ងឺមកថៃទៅរក្សាទុកនៅក្នុងមន្ទីរពេទ្យឯកទេសជម្ងឺឆ្លងក្នុងក្រុងបាងកក។
ដោយឡែក អ្នកនំាពាក្យរដ្ឋាភិបាលបានប្រកាសធានាថា ក្រសួងសុខាភិបាលកំពុងតាមដានការវិវត្តន៍របស់មេរោគមែរយ៉ាងយកចិត្តទុកដាក់ ព្រមទំាងចាត់វិធានការទៅតាមនីតិវិធីពេទ្យដើម្បីបញ្ជៀសការឆ្លងរាតត្បាត។ ទន្ទឹមគ្នានេះ អ្នកនំាពាក្យរដ្ឋាភិបាលរូបនេះដដែលក៏បានអំពាវនាវឲ្យប្រជាជនរក្សាភាពស្ងប់ស្ងាត់កុំជ្រួលច្របល់ និងថា រដ្ឋអំណាចកំពុងធ្វើការស្រាវជ្រាវរកអ្នកដំណើរផ្សេងទៀតដែលបានជិះនៅក្នុងយន្តហោះជាមួយអ្នកជម្ងឺដែលបានមកដល់ទឹកដីថៃកាលពីថ្ងៃទី១៥ មិថុនា តាមជើងយន្តហោះលេខ WY០៨១៥ របស់ក្រុមហ៊ុន Oman Air។
ករណីឆ្លងមេរោគមែរលើកដំបូងនៅក្នុងទឹកដីថៃពេលនេះបានធ្វើឲ្យថៃក្លាយជាប្រទេសអាស៊ីទី២ បន្ទាប់ពីកូរ៉េខាងត្បូងដែលមេរោគមជ្ឈិមបូព៌ាមែរ (MERS) បានសម្លាប់មនុស្ស ២៣នាក់ និងមានអ្នកឆ្លងចំនួន ១៦២នាក់។ គួររម្លឹកជូនថា មេរោគមែរនេះមានប្រភពចេញមកពីប្រទេសអារាប៊ីសាអូឌីតដែលមានអ្នកស្លាប់ ៤១២នាក់ និងអ្នកឆ្លងជាង ៩៥០នាក់ គិតតំាងពីឆ្នំា ២០១២។ មកដល់ពេលនេះ នៅមិនទាន់មានថ្នំាវ៉ាក់សំាងសម្រាប់ការពារនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ