អង្គការ OMS ចង្អុលមុខកូរ៉េខាងត្បូងពីការមើលស្រាលមេរោគមជ្ឈិមបូព៌ាមែរ (MERS)
នៅថ្ងៃពុធ ទី១៨ មិថុនា អង្គការសុខភាពពិភពលោកហៅកាត់ថា OMS បានដំឡើងសម្លេងដាក់រដ្ឋាភិបាលកូរ៉េខាងត្បូងពីបទមិនបានចាត់វិធានការខ្លំាងក្លាក្នុងការប្រឈមមុខនឹងការឆ្លងរាតត្បាតមេរោគផ្លូវដង្ហើមមជ្ឈិមបូព៌ាមែរ (MERS)។ OMS បានសម្គាល់ឃើញពីកង្វះសមត្ថភាពរបស់មន្រ្តីសុខាភិបាលកូរ៉េខាងត្បូងលើមេរោគមែរដែលឆ្លងមកពីប្រទេសអារ៉ាប៊ីសាអូឌីត។ ប្រតិកម្មខ្លំាងៗរបស់ OMS បានធ្វើឡើង ចំពេលដែលមេរោគផ្លូវដង្ហើមមជ្ឈិមបូព៌ាមួយនេះទើបបានសម្លាប់ប្រជាជនកូរ៉េម្នាក់ទៀតនាថ្ងៃពុធ ទី១៧ មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
គិតតំាងពីថ្ងៃទី២០ ឧសភាមក ពោលតំាងពីមានអ្នកជម្ងឺជនជាតិកូរ៉េខាងត្បូងម្នាក់បានវិលត្រឡប់ពីប្រទេសអារ៉ាប៊ីសាអូឌីតវិញមក មេរោគផ្លូវដង្ហើមមជ្ឈិមបូព៌ាមែរ (MERS) បានសម្លាប់មនុស្ស ២០នាក់ និងមានអ្នកឆ្លងចំនួន ១៦២នាក់នៅក្នុងទឹកដីកូរ៉េខាងត្បូង។ ទឹកដីកូរ៉េខាងត្បូងដែលកំពុងទទួលរងគ្រោះថ្នាក់ដោយមេរោគនេះខ្លំាងជាងគេ បន្ទាប់ពីប្រទេសអារាប៊ីសាអូឌីតដែលគិតតំាងពីឆ្នំា ២០១២ មក មានអ្នកឆ្លងជាង ៩៥០នាក់ និងអ្នកស្លាប់ ៤១២នាក់។
អង្គការសុខភាពពិភពលលោកបានទាញសញ្ញាអាសន្នដោយបានអំពាវនាវឲ្យពិភពលោកមានការប្រយ័ត្នប្រយែងដោយធ្វើយ៉ាងណាកុំស្ថានការណ៍ធ្លាក់ជ្រុលហួសដូចនៅកូរ៉េខាងត្បូង។ ប្រឈមនឹងមេរោគមែរនេះ គណៈកម្មាធិការ OMS បានបើកកិច្ចប្រជុំបន្ទាន់មួយនៅក្នុងទីក្រុងហ្សឺណែវ ប្រទេសស្វីស។ លោកហ្វ៊ូគូដា អគ្គនាយករង OMS ទទួលបន្ទុកសន្តិសុខសុខភាពបានថ្លែងនៅក្នុងសន្និសីតកាសែតថា វត្តមានមេរោគមែរបានធ្វើឲ្យគ្រប់គ្នាភ្ញាក់ផ្អើលនៅកូរ៉េខាងត្បូងដែលជាហេតុធ្វើឲ្យរដ្ឋាភិបាលមានការយឺតយ៉ាវក្នុងទប់ស្កាត់។
អង្គការ OMS ដែលទើបបានបញ្ជូនបុគ្គលិកមួយក្រុមទៅកាន់កូរ៉េខាងត្បូងបានលើកករណីពីកង្វះចំណេះដឹងរបស់បុគ្គលសុខាភិបាលឯកជន និងរដ្ឋនៅកូរ៉េខាងត្បូងទាក់ទងនឹងមេរោគមែរ ព្រមទំាងកង្វះវិធានការបង្ការឆ្លងនៅក្នុងមន្ទីរពេទ្យ។ ករណីកង្វះវិធានការបង្ការនេះក៏ត្រូវបានលើកឡើងដោយក្រុមអ្នជំនាញដែរ ពិសេសការដែលទុកបណ្តោយឲ្យអ្នកជម្ងឺអាចទាក់ទងជាមួយអ្នកផ្សេងនៅក្នុងបរិវេណមន្ទីរពេទ្យ។
នៅដើមសប្តាហ៍នេះ លោកស្រីប្រធានាធិបតីកូរ៉េខាងត្បូងប៉ាក់ គុនហឺបានគូសបញ្ជាក់ថា គេមិនគួរណាបង្កើតឲ្យបរិយាកាសស្លន់ស្លោខ្លំាងនៅក្នុងចំណោមមហាជនទូទៅទេ តែសម្តីរបស់លោកស្រីប៉ាក់ គុនហឺត្រូវបានកាសែតក្នុងស្រុកមួយចោទពីបទបានមើលស្រាលលើមេរោគមែរ។ យោងតាម OMS នៅមិនទាន់មានថ្នំាវ៉ាក់សំាងសម្រាប់ការពារមេរោគមែរទេ និងថា អត្រាមរណៈរបស់មេរោគផ្លូវដង្ហើមមួយនេះមានប្រមាណជា ៣៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ