ហុងកុង៖ហេតុអ្វីបានជាលទ្ធិប្រជាធិបតេយ្យកំពុងទទួលការគំរាមកំហែង?
ចុះផ្សាយនៅថ្ងៃ៖
ស្តាប់ - ០៥:០០
នៅថ្ងៃពុធ ទី១៧ មិថុនា សភាហុងកុងផ្តើមពិភាក្សាលើសេចក្តីព្រាងច្បាប់បោះឆ្នោតដ៏ចម្រូងចម្រាស។ តែនៅប៉ុន្មានថ្ងៃចុងក្រោយនេះ ប៉ូលិសហុងកុងបានធ្វើការចាប់ខ្លួនមនុស្សចំនួន ១០នាក់ ព្រមទំាងរឹបអូសបាននូវសម្ភារៈ និងគ្រឿងផ្សំជាច្រើនសម្រាប់ផលិតជាតិផ្ទុះ។ ប៉ូលីសបានឲ្យដឹងបន្ថែមថា ក្នុងចំណោមមនុស្សចាប់ខ្លួនទំាង ១០នាក់នោះ មានម្នាក់បានប្រកាសសារភាពថា ជាសកម្មជនចេញពីចលនាជ្រុលនិយមមួយ។ ប្រភពព័ត៌មានជាច្រើនបានឲ្យដឹងថា ក្រុមជ្រុលនិយមកំពុងត្រៀមខ្លួនរៀបចំអំពើហិង្សាបង្ហូរឈាមនៅហុងកុងដើម្បីប្រឆំាងនឹងសេចក្តីព្រាងច្បាប់បោះឆ្នោតនៅហុងកុងដែលចង្អុលបង្ហាញដោយចិនប៉េកំាង។
នៅពេលនេះ មានជនសង្ស័យតែ ១០នាក់គត់ដែលបានចាប់ខ្លួន ក្នុងនោះ មានបុរស ៦នាក់ និងស្រ្តី ៤នាក់ដែលមានអាយុពី ២១ ទៅ ៥៨ឆ្នំា។ ជនសង្ស័យ ២នាក់ដំបូងត្រូវបានប៉ូលិសចាប់ខ្លួននៅយប់ថ្ងៃអាទិត្យ ទី១៤ មិថុនាក្នុងពេលដែលពួកគេកំពុងត្រៀមខ្លួនសាកល្បងជាតិផ្ទុះនៅក្នុងបន្ទប់ពិសោធន៍មួយស្ថិតក្នុងស្រុកសៃគុងដែលជាអតីតស្រុកអ្នកនេសាទ និងជាកន្លែងដែលសំបូរដោយពលរដ្ឋបស្ចិមលោករស់នៅ។ ទន្ទឹមនឹងការចាប់ខ្លួនជនសង្ស័យ ប៉ូលិសក៏រឹបអូសបានសម្ភារៈ និងគ្រឿងផ្សំជាច្រើនសម្រាប់ផលិតជាតិផ្ទុះ ពិសេសជាតិគីមីហៅកាត់ TATP ដែលភេរវជនបានប្រើនៅក្នុងអំពើភេរវកម្មក្នុងទីក្រុងឡុងដ៏ ប្រទេសអង់គ្លេសកាលពីឆ្នំា ២០០៥។ បន្ទាប់មក ប៉ូលិសក៏បានរកឃើញផែនទីចំនួន២ផ្ទំាងទាក់ទងនឹងសង្កាត់ Wan Chai និង Admiralty ដែលជាទីប្រជុំជនសំខាន់ជាងគេនៅហុងកុង។
សំណួរដែលកំពុងចោទឡើងពេលនេះគឺថា តើជនសង្ស័យចាប់ខ្លួនទំាងអស់ជានរណា ចេញមកពីប្រភពណា និងថា តើពួកគេមានបំណងធ្វើសកម្មភាពអ្វីនៅលើទឹកដីហុងកុង?
បើយោងតាមប៉ូលីស មានជនសង្ស័យយ៉ាងតិចម្នាក់ក្នុងចំណោមជនសង្ស័យចាប់ខ្លួនទំាង ១០នាក់ជាសមាជិករបស់គណបក្សឯករាជ្យជាតិ។ តែបញ្ហានៅត្រង់ថាមកទល់ថ្ងៃនេះ គេមិនដែលធ្លាប់ដឹង និងធ្លាប់ឮឈ្មោះគណបក្សមួយនេះសោះឡើយ។ ចំណែកប្រភពព័ត៌មានមួយទៀតចុះផ្សាយដោយកាសែត South China Morning Post ថែមទំាងបានចុះផ្សាយសម្តីរបស់ជនសង្ស័យម្នាក់ដែលបានថ្លែងយ៉ាងដូច្នេះថា « បំផ្ទុះគ្រាប់បែកមួយគ្រាប់ និងសម្លាប់ចោលទំាងអស់គ្នា សូមឲ្យលទ្ធិប្រជាធិបតេយ្យមានអាយុយឺនយូរ »។
រហូតមកដល់ពេលនេះ នៅមិនទាន់មានប្រភពផ្លូវការណាមួយហ៊ានចេញមុខបញ្ជាក់ពីប្រភពកំណើតរបស់គណបក្សឯករាជ្យជាតិដែលប្រកាសក្តែងៗដោយជនសង្ស័យចាប់ខ្លួននោះទេ តែសារព័ត៌មាននៅហុងកុងបាននំាគ្នាចុះផ្សាយថា មិនមែនជាគណបក្សទេ តែជាចលនាជ្រុលនិយមអនាមិកមួយដែលបានចាប់កំណើតចេញពីក្បួនបាតុកម្មរបស់សកម្មជនអ្នក ប្រជាធិបតេយ្យកាលពីខែមករាកន្លងទៅ។ មកដល់ត្រង់ចំណុចនេះនំាឲ្យគេយល់បានភ្លាមថា កម្មវត្ថុរបស់ចលនាអនាមិកមួយនេះ គឺរួមកម្លំាងជាមួយអ្នកប្រជាធិបតេយ្យដើម្បីប្រឆំាងនឹងការលូកដៃចូលជ្រៀតជ្រែករបស់ចិនប៉េកំាងនៅក្នុងកិច្ចការផ្ទៃក្នុងរបស់ហុងកុង។
សូមជម្រាបជូនថា វត្តមានលេចធ្លោគួរឲ្យភ្ញាក់ផ្អើលនៃចលនាអនាមិកក្រោមឈ្មោះគណបក្សឯករាជ្យជាតិបានកើតមានឡើង ចំពេលដែលសភាហុងកុងផ្តើមជជែកដេញដោលលើសេចក្តីព្រាងច្បាប់បោះឆ្នោតថ្មីមួយដ៏ចម្រូងចម្រាស។ នៅក្នុងសេចក្តីព្រាងច្បាប់បោះឆ្នោតនោះ រដ្ឋអំណាចកណ្តាលនៅប៉េកំាងបានអនុញ្ញាតឲ្យពលរដ្ឋហុងកុងអាចចូលរួមបោះឆ្នោតជ្រើសរើសថ្នាក់ដឹកនំារបស់ខ្លួនដោយផ្ទាល់នៅឆ្នំា ២០១៧។ គួររម្លឹកជូនឡើងវិញបន្តិចថា តំាងពីប្រទេសអង់គ្លេសបានប្រគល់ដែនដីហុងកុងទៅចិនវិញក្នុងឆ្នំា ១៩៩៧ មក ប៉េកំាងបានយល់ព្រមឲ្យហុងកុងមានលក្ខន្តិកជាដែនដីស្វ័យ័ត ហើយការតែងតំាងថ្នាក់ដឹកនំាត្រូវបានធ្វើឡើងដោយគណៈកម្មាធិការមួយមានសមាជិក ១ ២០០នាក់ ភាគច្រើនជាអ្នកមានទំនោររកចិនកុម្មុយនិស្ត។
វាពិតជាដំណឹងល្អមួយដែលប៉េកំាងយល់ព្រមផ្តល់សិទ្ធិឲ្យពលរដ្ឋហុងកុងជាអ្នករើសថ្នាក់ដឹកនំារបស់ខ្លួនដោយខ្លួនឯង តែនេះគ្រាន់ជាអ្វីដែលចិនធ្វើឲ្យល្អមើលតែសំបកក្រៅប៉ុណ្ណោះ ព្រោះចូរកុំភ្លេចថា សេចក្តីព្រាងច្បាប់បោះឆ្នោតថ្មីដែលសភាហុងកុងកំពុងជជែកពិភាក្សាពេលនេះ គឺជាសេចក្តីព្រាងច្បាប់បោះឆ្នោត Made in China ដែលប៉េកំាងចង់ឱបរឹតហុងកុងឲ្យតឹងជាមុនតែប៉ុណ្ណោះ។ ជាក់ស្តែង ប៉េកំាងបានកំណត់ឲ្យមានបេក្ខជនតែ ២ ឬ ៣នាក់គត់ដែលអាចឈរឈ្មោះនៅក្នុងការបោះឆ្នោត និងដែលរូបបេក្ខជននោះទៀតសោត ជាមនុស្សជ្រើសរើសដោយប៉េកំាង។
គឺទង្វើរបស់ចិនដីគោករបៀបនេះហើយដែលបាន និងកំពុងដុតកម្តៅកំហឹងរបស់អ្នកប្រជាធិបតេយ្យនៅហុងកុងឆេះយ៉ាងសន្ធោសន្ធៅ ពិសេសនៅក្នុងចំណោមសិស្ស និស្សិត។ គេពិតជានៅចំាបានមិនភ្លេចកាលពីរដូវស្លឹកឈើជ្រុះឆ្នំា ២០១៤ សិស្ស និស្សិតហុងកុងបានចុះផ្លូវធ្វើបាតុកម្មប្រឆំាងនឹងសេចក្តីព្រាងច្បាប់បោះឆ្នោត និងទាមទារឲ្យប៉េកំាងបញ្ឈប់ការលូកដៃចូលកិច្ចការផ្ទៃក្នុងរបស់ហុងកុង។ ក្បួនបាតុកម្មដែលគេហៅថា ចលនាឆ័ត្របានធ្វើឲ្យសកម្មភាពនានានៅកណ្តាលបេះដូងហុងកុងជាប់គំាងរយៈពេល ៧៩ថ្ងៃ។ បាតុកម្មរយៈពេលជាង ២ខែដែលមិនបានទទួលលទ្ធផលអ្វីទំាងអស់។
ឥឡូវនេះ រឿងច្រំដែលបានវិលត្រឡប់ជាថ្មីដែលលើកនេះ អាចនឹងមានកម្តៅក្តៅខ្លំាងជាមុន ព្រោះថាទី១ ចំពេលដែលសភាហុងកុងផ្តើមពិនិត្យ និងត្រៀមអនុម័តនូវសេចក្តីព្រាងច្បាប់បោះឆ្នោតនោះឲ្យបានមុនដំណាច់សប្តាហ៍នេះ និងទី២ ចំពេលដែលមានលេចវត្តមានក្រុមជ្រុលនិយមដែលគ្រោងអនុវត្តវិធានការជ្រុលនិយម និងហិង្សាដើម្បីកាច់ធ្មុងប៉េកំាង។ នេះពិតជារឿងថ្មីស្រឡាងដែលរហូតមកដល់ឥឡូវ ហុងកុងមិនដែលក្លាយជាផ្ទំាងស៊ីបនៃការវាយប្រហារតាមបែបភេរវនិយមទេ។ តែចិនប៉េកំាងបានព្រមានទុកជាមុនរួចជាស្រេចថា នឹងកំចាត់រាល់ទង្វើជ្រុលនិយមគ្រប់រូបភាពឲ្យដល់ឫសគល់នៅហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ