ភូមា៖លោកស្រីអ៊ុង សានស៊ូជីសង្ឃឹមឈ្នះឆ្នោតនៅពេលខាងមុខ តែបារម្ភពីភាពមិនប្រក្រតីជាយថាហេតុ
នៅរសៀលថ្ងៃអង្គារ ទី២៥ សីហាម្សិលមិញ លោកស្រីអ៊ុង សានស៊ូជី ប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យដែលជាបក្សប្រឆំាងដ៏ធំនៅភូមាបានផ្តល់បទសម្ភាសន៍ឲ្យទីភ្នាក់ងារសារព័ត៌មានបារំាង AFP។ លោកស្រីអ៊ុង សានស៊ូជីបានថ្លែងនៅក្នុងបទសម្ភាសន៍នោះថា លោកស្រីមានសុទិដ្ឋិនិយមនឹងទទួលបានជោគជ័យនៅក្នុងការបោះឆ្នោតជាប្រវត្តិសាស្រ្តនៅពេលខាងមុខ ប្រសិនបើការបោះឆ្នោតនោះត្រូវបានរៀបចំឡើងដោយសេរី យុត្តិធម៌ និងមានតម្លាភាព។ តែទោះជាយ៉ាងនេះក្តី លោកស្រីនៅតែព្រួយបារម្ភពីភាពមិនប្រក្រតីជាយថាហេតុនៅក្នុងការបោះឆ្នោតខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៣
មានហេតុផលជាច្រើនដែលលោកស្រីអ៊ុង សានស៊ូជីហ៊ានអះអាងថា គណបក្សរបស់លោកស្រីនឹងឈ្នះឆ្នោតនាការបោះឆ្នោតនៅពេលខាងមុខ។ តែហេតុផលសំខាន់នោះ គឺហេតុផលប្រវត្តិសាស្រ្ត។ ហេតុផលប្រវត្តិសាស្រ្ត គឺគេចង់និយាយសំដៅលើប្រវត្តិនយោបាយដែលប្រទេសភូមាបានឆ្លងកាត់តំាងពីថ្ងៃទទួលបានឯករាជ្យពីប្រទេសអង់គ្លេសក្នុងថ្ងៃទី ៤ មករា ឆ្នំា ១៩៤៨។
តំាងពីឆ្នំា ១៩៦២ មក ប្រទេសក្រីក្រនៅអាស៊ីអាគ្នេយ៍មួយនេះបានស្គាល់តែរបបដឹកនំាយោធាផ្តាច់ការ។ គឺទើបតែនៅ៣ឆ្នំាចុងក្រោយនេះទេ ពោលតំាងពីឆ្នំា ២០១១ មកដែលភូមាបានស្គាល់របបដឹកនំាស៊ីវិល តែគេក៏មិនត្រូវភ្លេចនិយាយទេថា ថ្នាក់ដឹកនំាស៊ីវិលជាន់ខ្ពស់សព្វថ្ងៃក៏សុទ្ធសឹងជាអតីតឧត្តមសេនីយដែលបានយល់ព្រមស្រាកសម្លៀកបំពាក់យោធាចេញ។ ក្នុងរយៈពេល ៣ឆ្នំាកន្លងទៅនេះ លោកប្រធានាធិបតីថេន សេនដែលជាអតីតឧត្តមសេនីយម្នាក់ដែរនោះបានផ្តើមធ្វើកំណែទម្រង់ច្រើនណាស់។
កំណែទម្រង់របស់លោកថេន សេនបានធ្វើឲ្យសហគមន៍អន្តរជាតិមានទំនុកទុកចិត្ត និងយល់ព្រមលើកទណ្ឌកម្មមួយចំនួនចេញពីភូមា។ តែរឿងរ៉ាវប្រវត្តិសាស្រ្តដ៏ល្វីងជូរចត់ដែលភូមាបានឆ្លងកាត់ហាក់ដូចជាមិនអាចធ្វើឲ្យប្រជាជនភូមាបំភ្លចចោលដោយងាយៗទេ។ គឺនៅក្នុងន័យនេះហើយបានជាប្រជាជនភូមាទូទៅ ពិសេសមនុស្សជំនាន់ក្រោយពិបាកជឿទុកចិត្តលើថ្នាក់ដឹកនំាសព្វថ្ងៃ ហើយងាកទៅផ្តល់ការទុកចិត្តលើលោកស្រីអ៊ុង សានស៊ូជី។ រីឯរូបលោកស្រីអ៊ុង សានស៊ូជីខ្លួនឯងក៏បានយល់យ៉ាងច្បាស់ចំពោះបញ្ហានេះ និងអះអាងថា គណបក្សរបស់លោកស្រីអាចនឹងបង្កើតបានរដ្ឋាភិបាលមួយ ហើយអាចដឹកនំាប្រទេសគ្រាន់បើជាងរដ្ឋាភិបាលមុនៗទៅទៀត។
តែលោកស្រីអ៊ុង សានស៊ូជីបានព្រមានទុកជាមុនរួចជាស្រេចថា ដើម្បីអាចឲ្យគណបក្សរបស់លោកស្រីឈ្នះឆ្នោតដឹកនំាប្រទេសបាន លុះត្រាណាតែការរៀបចំបោះឆ្នោតនៅថ្ងៃខាងមុខប្រព្រឹត្តិទៅដោយសេរី យុត្តិធម៌ និងមានតម្លាភាពពិតប្រាកដ។
លោកស្រីអ៊ុង សានស៊ូជីបារម្ភចំពោះព្រឹត្តិការណ៍វិវត្តិន៍ថ្មីៗចុងក្រោយ
នៅប៉ុន្មានខែមុនការបោះឆ្នោតឈានមកដល់នាថ្ងៃទី៨ វិច្ឆិកាខាងមុខ របបដឹកនំាសព្វថ្ងៃបានជាប់ចោទពីបទបានផ្តើមបោះមួយជំហានថយក្រោយ ដោយពង្រឹងអំណាចរបស់ខ្លួនតាមរយៈការរឹតបន្តឹងសិទ្ធិសេរីភាពក្នុងការបញ្ចេញមតិ ឬមួយក៏ផ្តើមចំណាត់ការលើក្រុមមនុស្សផ្ទៃក្នុងបក្សដែលខ្លួនគិតថា ជាអ្នកចង់ដណ្តើមអំណាចពីខ្លួននាពេលខាងមុខ។ ជាក់ស្តែងថ្មីៗចុងក្រោយនេះ គឺការកំចាត់លោកស្វេ ម៉ានចេញពីតំណែងប្រធានគណបក្ស។ ការដកតំណែងប្រធានគណបក្សពីលោកស្វេ ម៉ានត្រូវបានគេមើលឃើញថា ជាទង្វើរៀបចំឡើងដោយលោកថេន សេន និងបក្សពួកទាហានរបស់លោកក្នុងគោលដៅពង្រឹងអំណាចនៅមុនការបោះឆ្នោត។
ព្រឹត្តិការណ៍ចុងក្រោយមួយនេះត្រូវបានលោកស្រីអ៊ុង សានស៊ូជីបារម្ភ និងយល់ថា ផ្លូវទៅកាន់លទ្ធិប្រជាធិបតេយ្យដែលភូមាបានសន្យានោះហាក់ដូចជាឆ្ងាយសែនឆ្ងាយនៅឡើយ។ ក្តីបារម្ភមួយទៀតរបស់លោកស្រីអ៊ុង សានស៊ូជី គឺការយកសាសនាទៅប្រើនៅក្នុងនយោបាយ ព្រោះនារយៈពេលប៉ុន្មានឆ្នំាកន្លងទៅនេះ ភូមាបានស្គាល់កំណើនព្រះពុទ្ធសាសនាជ្រុលនិយមដែលបានផ្តួចផ្តើមឡើងដោយក្រុមព្រះសង្ឃជ្រុលនិយមមួយចំនួន។ ថ្មីៗនេះ ឥទ្ធិពលរបស់ក្រុមព្រះសង្ឃជ្រុលនិយមបានចាប់បង្ខំរដ្ឋាភិបាលឲ្យអនុម័តនូវច្បាប់មួយដែលមានលក្ខណៈរើសអើង ពិសេសរើសអើងចំពោះពួករ៉ូហ៊ីងយ៉ាអ្នកកាន់សាសនាអ៊ីស្លាម។
គឺហេតុផលទំាងអស់នេះហើយដែលបានធ្វើឲ្យលោកស្រីអ៊ុង សានស៊ូជីមានមន្ទិលសង្ស័យចំពោះភាពមិនប្រក្រតី ឬការកេងបន្លំនៅក្នុងការបោះឆ្នោតខាងមុខ។
អ្វីៗវាអាស្រ័យលើឆន្ទៈពិតប្រាកដរបស់គណបក្សកាន់អំណាច
ឧបមាថា គណបក្សលោកស្រីអ៊ុង សានស៊ូជីទទួលបានជោគជ័យនៅក្នុងការបោះឆ្នោតខាងមុខ តើលោកស្រីពិតជាមានសមត្ថភាពក្នុងការដឹកនំាប្រទេសដែរ ឬទេ?។ តែមានសំណួរមួយទៀតបានចោទឡើងថា បើគណបក្សលោកស្រីអ៊ុង សានស៊ូជីឈ្នះឆ្នោតនៅក្នុងការបោះឆ្នោតខាងមុខ តើគណបក្សកាន់អំណាចសព្វថ្ងៃយល់ព្រមទទួលស្គាល់ឬអត់?។
សំណួរចុងក្រោយនេះពិតជាគ្មាននរណាម្នាក់អាចផ្តល់ចម្លើយច្បាស់លាស់ទេ។ ជាការពិត ការបោះឆ្នោតសភានៅថ្ងៃទី៨ វិច្ឆិកាខាងមុខ គឺជាការបោះឆ្នោតជាប្រវត្តិសាស្រ្តមួយដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជីត្រូវចូលរួមជាលើកទី១ គិតតំាងពី ២៥ឆ្នំាកន្លងទៅ។ គួរជម្រាបជូនថា ការបោះឆ្នោតនៅពេលខាងមុខមិនត្រឹមតែជាការជ្រើសរើសតំណាងរាស្រ្តថ្មីប៉ុណ្ណោះទេ តែក៏នឹងត្រូវជ្រើសរើសរូបប្រធានាធិបតីថ្មីដែរនៅប៉ុន្មានខែក្រោយមក។
ដូច្នេះឃើញថា ការបោះឆ្នោតលើកនេះពិតជាឱកាសដ៏ល្អមួយសម្រាប់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ និងអាចថា ជាឱកាសចុងក្រោយសម្រាប់រូបលោកស្រីអ៊ុង សានស៊ូជីក៏ថាបានដែរ។ លោកស្រីអ៊ុង សានស៊ូជីដែលបានប្រយុទ្ធតស៊ូប្រឆំាងនឹងរបបសឹកអស់ជាច្រើនឆ្នំាកន្លងមក។ នៅក្នុងការបោះឆ្នោតកន្លងមក ពោលក្នុងឆ្នំា ១៩៩០ គណបក្សរបស់លោកស្រីអ៊ុង សានស៊ូជីបានទទួលជោគជ័យយ៉ាងធំធេង តែរបបសឹកបានបដិសេធមិនទទួលស្គាល់ និងថែមទំាងចាប់លោកស្រីទៅឃុំនៅក្នុងគេហដ្ឋានទៀតផង។
ដូច្នេះឃើញថា អ្វីៗវាមិនអាស្រ័យតែលើប្រជាប្រិយភាព និងសមត្ថភាពរបស់លោកស្រីអ៊ុង សានស៊ូជីប៉ុណ្ណោះទេ តែវាអាស្រ័យផងដែរលើឆន្ទៈពិតប្រាកដរបស់គណបក្សកាន់អំណាចសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ