ជាប់គុក ២ឆ្នាំ ដោយសារជេរប្រមាថសាសនានៅភូមា
អ្នកនិពន្ធសៀវភៅ និងជាសមាជិករបស់គណបក្សប្រឆាំងភូមា ត្រូវបានតុលាការភូមា កាត់ទោស នៅថ្ងៃអង្គារទី ២ មិថុនា ឲ្យជាប់គុកពីឆ្នាំ ក្នុងបទបានជេរប្រមាថសាសនា។ប្រជាជនភូមា ៨៥ភាគរយគោរពជឿសាសនាព្រះពុទ្ធ។ ព្រះពុទ្ធសាសនាត្រូវបានការពារយ៉ាងរឹងមាំ ដោយក្រុមព្រះសង្ឃ ដ៏មានឥទ្ធិពល ដែលជាអ្នកញុះញង់ឲ្យមាននយោបាយស្អប់អ្នកកាន់សាសនាអ៊ីស្លាមនៅភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ទីន លីនអូ (Htin Lin Oo) ជាអ្នកនិពន្ធ និងជាមនុស្សស្និទ្ធនឹងលោកស្រី អ៊ុងសាន ស៊ូជី ក្នុងគណបក្សសម្ព័ន្ធជាតិប្រជាធិបតេយ្យ។ លោកត្រូវបានអាជ្ញាធរភូមាចាប់ឃុំខ្លួន តាំង ពីខែធ្នូ ឆ្នាំ ២០១៤ បន្ទាប់ពីលោកបានថ្លែង និងផ្សព្វផ្សាយសុន្ទរកថារបស់លោក ក្នុងបណ្តាញសង្គមហ្វេសប៊ុក ដែលបានបង្កឲ្យមានកំហឹងដុតរោលក្នុងចំណោមព្រះសង្ឃភូមា។
តាមមេធាវីរបស់លោកទីន លីនអូ កូនក្តីរបស់លោកគ្រាន់តែបាននិយាយរិះគន់រាល់អ្នកដែលយកឈ្មោះព្រះពុទ្ធ ឈ្មោះសាសនា និងឈ្មោះជាតិ មកប្រើដើម្បី ញុះញង់ឲ្យមានការស្អប់ និងឈ្លោះគ្នា។ គឺពាក្យប៉ុន្មានម៉ាត់នេះហើយដែលធ្វើឲ្យអ្នកនិពន្ធភូមា ត្រូវតុលាការរបស់ខេត្តចូងអូ ប៉ែកកណ្តាលភូមា សម្រេច នៅថ្ងៃអង្គារ កាត់ទោស លោកឲ្យជាប់គុក ២ឆ្នាំ។
អង្គការការពារសិទ្ធិមនុស្សAmnesty international បានរិះគន់ការសម្រេចចិត្តរបស់តុលាការ និងចាត់ទុកលោកទីន លីនអូជាអ្នកទោសមនសិការ។ សម្រាប់Amnesty internatilonal ដោយអយុត្តិធម៌ លោកទីន លីនអូ ត្រូវបានកាត់ទោស ដោយសារតែលោកបញ្ចេញយោបល់ ដើម្បីជំរុញការយោគយល់អធ្យាស្រ័យ រវាងអ្នកកាន់សាសនាខុសគ្នា ក្នុងប្រទេសភូមា។
ចាប់តាំងពីដើមឆ្នាំនេះ លោកទីន លីនអូជាមនុស្សទី ៤ដែលតុលាការភូមាកាត់ទោសឲ្យជាប់គុក ក្នុងបទជេរប្រមាថពុទ្ធសាសនា។ កាលពីខែមីនាកន្លងទៅ ជនជាតិនូវែលហ្សេឡង់ម្នាក់ និងសហជីវិនពីរនាក់ ត្រូវបានតុលាការប្រកាសផ្តន្ទាទោសឲ្យជាប់គុក២ឆ្នាំកន្លះ និងចាប់បង្ខំឲ្យធ្វើការជាទម្ងន់ ដោយសារតែពួកគេទាំង៣នាក់បានយករូបព្រះពុទ្ធទៅកែច្នៃ ធ្វើជារូបផ្សាយពាណិជ្ជកម្ម ឲ្យរង្គសាលរបស់ពួកគេ។ អង្គការដែលមានមូលដ្ឋាននៅទីក្រុងឡុងដ៍ បារម្ភថា ភូមាដែលទើបទ្វារ ធ្វើកំណែទម្រង់នយោបាយ អាចនឹងដើរថយក្រោយ។ ផ្ទុយពីការសន្យាដោះលែងរាល់អ្នកទោសនយោបាយ អាជ្ញាធរភូមា ដែលទទួលការញុះញង់ពីក្រុមពុទ្ធសាសនិក ជាតិនិយម ជ្រុល កំពុងយកលេសសាសនា ដើម្បីបិទសិទ្ធិសេរីភាពបញ្ចេញមតិ និងចាប់ចង ក្រុមអ្នកប្រឆាំងនឹងខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ