តុលាការភូមាកាត់ទោសជនជាតិនូវែលសេឡង់ឲ្យជាប់ពន្ធនាគារ២ឆ្នាំកន្លះពីបទប្រមាថពុទ្ធសាសនា
ជនជាតិនូវែលសេឡង់ម្នាក់ រួមជាមួយនឹងជនជាតិភូមាពីរនាក់ផ្សេងទៀត ត្រូវបានតុលាការភូមាកាត់ទោសនៅថ្ងៃអង្គារនេះឲ្យជាប់ពន្ធនាគារម្នាក់ៗ ២ឆ្នាំកន្លះ ក្រោមបទចោទប្រកាន់ថាបានប្រមាថពុទ្ធសាសនា។ អង្គការសិទ្ធិមនុស្សវិញបានហៅការកាត់ទោសនេះថាជាការរំលោភលើសិទ្ធិសេរីភាពក្នុងការបញ្ចេញមតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
លោក Philip Blackwood រួមជាមួយនឹងសហការីជនជាតិភូមាពីរនាក់ផ្សេងទៀត ដែលជាម្ចាស់ និងជាអ្នកគ្រប់គ្រងរង្គសាលមួយ នៅទីក្រុងរ៉ង់ហ្គូន ត្រូវបានតុលាការកាត់ឲ្យជាប់ពន្ធនាគារម្នាក់ៗ ២ឆ្នាំកន្លះ ដោយតម្រូវឲ្យធ្វើការជាទម្ងន់ ដោយសារតែពួកគេបានយកពុទ្ធរូបទៅប្រើក្នុងការផ្សព្វផ្សាយពាណិជ្ជកម្មឲ្យហាងរបស់ពួកគេ។
កាលពីខែធ្នូ លោក Philip Blackwood បានធ្វើការចុះផ្សាយនៅលើទំព័រហ្វេសប៊ុកនូវរូបថតផ្សព្វផ្សាយពាណិជ្ជកម្មរង្គសាលរបស់ខ្លួន ដោយបង្ហាញពីរូបព្រះពុទ្ធពាក់កាសស្តាប់ភ្លេងជារបៀប DJ ដែលបង្កឲ្យមានប្រតិកម្មយ៉ាងផុសផុល ពីសំណាក់ព្រះសង្ឃ និងសាធារណមតិជាទូទៅ នៅទូទាំងប្រទេសភូមា។
នៅក្នុងសវនាការជំនុំជម្រះក្តី ជនជាប់ចោទទាំង ៣រូប បានទទួលស្គាល់ថា ខ្លួនពិតជាបានចុះផ្សាយរូបថតពិតមែន ក៏ប៉ុន្តែ បានបដិសេធថា ពួកគេមិនមានចេតនាប្រមាថចំពោះពុទ្ធសាសនានោះទេ ហើយពួកគេក៏បានធ្វើការសុំទោសជាសាធារណៈចំពោះទង្វើរបស់ពួកគេផងដែរ។ ការឆ្លើយការពារខ្លួននេះមិនត្រូវបានតុលាការទទួលយកនោះទេ ដោយចៅក្រមតុលាការក្រុងរ៉ង់ហ្គូនបានកំណត់ថា លោក Philip Blackwood មានចេតនាប្រមាថពុទ្ធសាសនាពិតប្រាកដ នៅពេលដែលគាត់ចុះផ្សាយរូបនៅលើបណ្តាញសង្គមហ្វេសប៊ុក។
លោក Phil Robertson នាយករងប្រចាំតំបន់អាស៊ី នៃអង្គការ Human Rights Watch បានចេញសេចក្តីថ្លែងការណ៍មួយភ្លាមៗ នៅថ្ងៃអង្គារនេះ ដោយបានរិះគន់សេចក្តីសម្រេចរបស់តុលាការក្រុងរ៉ង់ហ្គូនថា ជាការប៉ះពាល់ទៅដល់សិទ្ធិសេរីភាពក្នុងការបញ្ចេញមតិ ព្រមទាំងបានលើកឡើងថា អាជ្ញាធរភូមាគួរតែទទួលយកនូវ “ការសុំទោសជាសាធារណៈ និងដោយស្មោះអស់ពីចិត្ត របស់ជនជាប់ចោទទាំង៣ ហើយដោះលែងពួកគេឲ្យមានសេរីភាពវិញជាបន្ទាន់ និងដោយគ្មានលក្ខខណ្ឌ”។
គួរបញ្ជាក់ថា នៅក្នុងរយៈពេលថ្មីៗនេះ សហគមន៍អន្តរជាតិបាននាំគ្នាសម្តែងនូវក្តីព្រួយបារម្ភ ចំពោះការកើនឡើងនៃចលនាជាតិនិយមពុទ្ធសាសនា និងអំពើហិង្សាសាសនា ដែលបាន និងកំពុងកើតមានឡើង នៅក្នុងប្រទេសភូមា ជាពិសេស អំពើហិង្សា រវាងអ្នកកាន់ពុទ្ធសាសនា ដែលជាសាសនាភាគច្រើន និងអ្នកកាន់សាសនាអ៊ីស្លាម ដែលជាសាសនាភាគតិច។ ការរិះគន់បានកើតមានឡើងខ្លាំងទៅលើគម្រោងបង្កើតច្បាប់មួយ ដើម្បីរឹតបន្តឹងការរៀបអាពាហ៍ពិពាហ៍រវាងអ្នកកាន់ពុទ្ធសាសនា និងអ្នកកាន់សាសនាផ្សេង។ សេចក្តីព្រាងច្បាប់ ដែលរដ្ឋាភិបាលរបស់លោកថេន សេន បានរៀបចំធ្វើឡើង ទៅតាមញត្តិទាមទាររបស់ព្រះសង្ឃមួយក្រុម ដែលគេចាត់ទុកថាជាអ្នកមានគំនិតជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ