ច្បាប់ការពារជាតិជប៉ុនត្រូវបានអនុម័តជាស្ថាពរតែក្រុមប្រឆាំងនៅតែបន្តតវ៉ាជំទាស់
ច្បាប់ការពារជាតិថ្មី ដែលមានគោលដៅពង្រីកតួនាទីកងទ័ពជប៉ុននៅបរទេស ត្រូវបានអនុម័តជាស្ថាពរនៅព្រឹកព្រលឹមថ្ងៃសៅរ៍នេះ ក្រោយពីមានការតស៊ូមតិយ៉ាងតឹងតែងនៅក្នុងរយៈពេលប៉ុន្មានថ្ងៃកន្លងទៅនេះ រហូតមានការប្រទូស្តរាយគ្នា នៅក្នុងព្រឹទ្ធសភា។ ក៏ប៉ុន្តែ បើទោះបីជាច្បាប់នេះត្រូវបានអនុម័តជាស្ថាពររួចហើយក៏ដោយ ក្រុមអ្នកប្រឆាំងនៅតែបន្តធ្វើការតវ៉ាជំទាស់ ដោយទាមទារឲ្យលុបច្បាប់នេះចោលវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ជាលើកទី១ នៅក្នុងរយៈពេល ៧០ឆ្នាំ គឺចាប់តាំងពីក្រោយសង្រ្គាមលោកលើកទី២មក ជប៉ុនមានច្បាប់ថ្មីមួយ ដែលបើកផ្លូវឲ្យកងទ័ពជប៉ុនអាចត្រូវដាក់ពង្រាយទៅបរទេស ដើម្បីធ្វើអន្តរាគមន៍ជួយសម្ព័ន្ធមិត្ត បើទោះបីជាជប៉ុនមិនទទួលរងការវាយប្រហារដោយផ្ទាល់ក៏ដោយ។
សម្រាប់លោកស្ហ៊ីនហ្សូ អាបេ និងគណបក្សអភិរក្សនិយមរបស់លោក ច្បាប់ការពារជាតិថ្មីនេះ គឺជាការចាំបាច់ ដើម្បីទប់ទល់នឹងការគំរាមកំហែងពីសំណាក់ប្រទេសចិន និងកូរ៉េខាងជើង។ ក៏ប៉ុន្តែ ក្រុមអ្នកប្រឆាំងវិញយល់ថា ច្បាប់នេះអាចនឹងទាញជប៉ុនឲ្យធ្លាក់ចូលទៅក្នុងសង្រ្គាមនៅឯបរទេស ហើយដែលមិនជាប់ពាក់ព័ន្ធនឹងសន្តិសុខជាតិរបស់ជប៉ុន។
សមាជិកសភាមកពីគណបក្សប្រឆាំងបានអះអាងនៅថ្ងៃសៅរ៍នេះថា បើទោះបីជាច្បាប់ការពារជាតិថ្មីនេះត្រូវបានអនុម័តជាស្ថាពរហើយក៏ដោយ ក៏ពួកគេនឹងមិនបញ្ឈប់ការតវ៉ាប្រឆាំងតែត្រឹមនេះនោះដែរ។ នៅខាងក្រៅវិមានសភា មនុស្សប្រមាណជា ៣០០នាក់បាននាំគ្នាប្រមូលផ្តុំគ្នា តវ៉ាទាមទារឲ្យលុបច្បាប់នេះចោលវិញ។ ក្នុងពេលជាមួយគ្នា គណបក្សប្រឆាំង រួមជាមួយនឹងក្រុមអ្នកជំនាញខាងនីតិធម្មនុញ្ញជប៉ុន កំពុងតែសិក្សាអំពីគម្រោងដាក់ពាក្យបណ្តឹងទៅតុលាការ ប្រឆាំងនឹងច្បាប់ថ្មីនេះ ដែលពួកគេយល់ថាមានខ្លឹមសារផ្ទុយនឹងរដ្ឋធម្មនុញ្ញសន្តិភាពនិយមរបស់ជប៉ុន។
គួរបញ្ជាក់ថា ក្រៅពីចលនាប្រឆាំងនៅក្នុងស្រុក ច្បាប់ការពារជាតិដែលស្នើឡើងដោយរដ្ឋាភិបាលរបស់លោកស្ហ៊ីនហ្សូ អាបេ ក៏ទទួលរងនូវការរិះគន់យ៉ាងខ្លាំងផងដែរពីប្រទេសជិតខាង គឺចិន និងកូរ៉េខាងត្បូង ដែលជាអតីតប្រទេសរងគ្រោះដោយនយោបាយយោធានិយមរបស់ជប៉ុនពីអតីតកាល។ ផ្ទុយទៅវិញ ប្រទេសសម្ព័ន្ធមិត្តរបស់ជប៉ុន ជាពិសេស អាមេរិក និងអូស្រ្តាលី ព្រមទាំងហ្វីលីពីន ដែលកំពុងតែជាប់ជម្លោះដែនសមុទ្រជាមួយចិន សុទ្ធតែបាននាំគ្នាអបអរសាទរកំណែទម្រង់វិស័យការពារជាតិរបស់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ