តំណាងរាស្ត្រជប៉ុនប្រវាយប្រតប់គ្នា រឿងអនុម័តច្បាប់ការពារជាតិថ្មី
គម្រោងច្បាប់ការពារជាតិជប៉ុនថ្មី ដែលអនុញ្ញាតឲ្យជប៉ុន អាចបញ្ជូនកងទ័ព ទៅធ្វើបេសកកម្មនៅបរទេស ជួយសម្ព័ន្ធមិត្ត កំពុងតែត្រូវបានពិភាក្សានៅក្នុងព្រឹទ្ធសភា យ៉ាងក្តៅគគុក។ តំណាងរាស្ត្របក្សប្រឆាំង បានព្យាយាមរារាំងការពិភាក្សាគ្នា ជាច្រើនលើក ហើយដែលឈានទៅដល់ការប្រវាយប្រតប់គ្នា ទៅវិញទៅមក នៅក្នុងសភា នៅថ្ងៃព្រហស្បតិ៍ទី ១៧កញ្ញានេះ។ ចំណែកនៅខាងក្រៅ តាមផ្លូវឯណោះវិញ ប្រជាជនជប៉ុនជាង ១ម៉ឺននាក់ បានធ្វើបាតុកម្ម ទាមទារកុំឲ្យសភាជប៉ុន អនុម័តគម្រោងច្បាប់ ដ៏ចម្រូងចម្រាសនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ប្រជាជនជប៉ុន ដែលគេទទួលស្គាល់ថា ជាមនុស្សស្ងប់ស្ងាត់ ប៉ុន្តែពេលនេះ បានធ្វើឲ្យគេភ្ញាក់ផ្អើលជាខ្លាំង ដោយសារមានការប្រទូស្តរាយ រុញច្រានគ្នា យ៉ាងអាណាធិបតេយ្យ រវាងតំណាងរាស្រ្តជប៉ុន នៅក្នុងព្រឹទ្ធសភា កាលពីព្រឹកថ្ងៃព្រហស្បតិ៍នេះ។ ហេតុការណ៍នេះបានកើតឡើង ក្នុងខណៈពេលដែលតំណាងរាស្រ្តជប៉ុនទាំងអស់ ប្រជុំពិភាក្សាគ្នា លើគម្រោងច្បាប់ការពារជាតិថ្មី ដែលច្បាប់នេះ និងអនុញ្ញាត ឲ្យជប៉ុន អាចបញ្ជូនកងទ័ព ទៅធ្វើបេសកកម្ម នៅបរទេស ដើម្បីជួយប្រទេសសម្ព័ន្ធមិត្ត។
ក្រុមតំណាងរាស្រ្តបក្សប្រឆាំងជប៉ុន បាននាំគ្នាស្រែកតវ៉ា និងឡោមព័ទ្ធ លោកតំណាងរាស្ត្រ Masahito Sato ដែលជាប្រធានគណកម្មការពិសេសទទួលបន្ទុកកិច្ចការពារជាតិ ហើយបានយកដៃរុញច្រានរូបលោកចុះឡើង បង្ករជាការប្រវាយប្រតប់គ្នា យ៉ាងចលាចល។ តាមការពិតទៅ ការពិភាក្សាគ្នា បានធ្វើឡើងតាំងតែពីយប់ថ្ងៃពុធ ឈានចូលថ្ងៃព្រហស្បតិ៍ ប៉ុន្តែត្រូវអាក់ខាន ដោយសារតែក្រុមតំណាងរាស្ត្របក្សប្រឆាំង បានរារាំង ខ្ទប់ទ្វារមិនឲ្យមានការពិភាក្សា។
ភ្លាមៗ ក្នុងហេតុការណ៍ដ៏រញ៉េរញ៉ៃនេះ លោក Tetsuro Fukuyama តំណាងរាស្រ្តគណបក្សប្រឆាំង បានចាប់កាន់ក្បាលមីក្រូ ស្រែកទាំងអួលដើមក ដែលមានខ្លឹមសារជាអាទិ៍ថា៖ “រដ្ឋាភិបាលមិនអាចធ្វើអ្វីស្រេចតែចិត្ត ដោយអាងតែខ្លួន មានសម្លេងភាគច្រើន ក្នុងសភានោះទេ។ រដ្ឋាភិបាលត្រូវតែស្តាប់យោបល់ របស់ប្រជាជនជប៉ុនទូទៅ។”
ជាការពិតណាស់ អស់រយៈពេលជាច្រើនសប្តាហ៍មកហើយ មានប្រជាជនជប៉ុនជាងមួយម៉ឺននាក់ បានដើរធ្វើបាតុកម្ម ស្ទើរតែជារៀងរាល់ថ្ងៃ ដើម្បីទាមទារឲ្យរដ្ឋាភិបាល លោកស៊ិនហ្សូអាបេ បោះបង់ចោលគម្រោងច្បាប់នេះ។ នៅយប់ថ្ងៃពុធ មានមនុស្សប្រមាណជា១៣០០០នាក់ ធ្វើបាតុកម្មនៅខាងមុខសភា។ តាមការរាយការណ៍របស់បណ្តាញព័ត៌មានជប៉ុន យ៉ាងហោចណាស់ មានមនុស្ស១៣នាក់ ត្រូវបានឃាត់ខ្លួន ពីបទបង្ករចលាចល និងរារាំងសមត្ថកិច្ចប៉ូលីស។
សូមបញ្ជាក់ថា គម្រោងច្បាប់ការពារជាតិ ដែលស្នើឡើង ដោយរដ្ឋាភិបាលលោកស៊ិនហ្សូអាបេ បានប៉ះពាល់យ៉ាងខ្លាំង ទៅលើរដ្ឋធម្មនុញ្ញជប៉ុន ដែលបានកំណត់ឲ្យជប៉ុន ក្លាយជាប្រទេសសន្តិភាព មិនចូលរួមសង្រ្គាមណាទាំងអស់ ចាប់តាំងពីចប់សង្រ្គាមលោកលើកទីពីរ។ ជាមួយនឹងមេរៀន ពីអតីតកាល ប្រជាជនជប៉ុនទូទៅ រឹងរូស មិនចង់ឲ្យជប៉ុន ទៅប្រលាក់ប្រឡូស ក្នុងសង្រ្គាម ណាមួយផ្សេងទៀតទេ។ ប៉ុន្តែលោក ស៊ិនហ្សូអាបេ បានអះអាងថា ពេលនេះជាយុគសម័យថ្មី ជាមួយនឹងបរិបទនយោបាយអន្តរជាតិថ្មី ដែលជប៉ុនត្រូវតែបត់បែនតាម។ ជាពិសេស ស្ថិតក្នុងកាលៈទេសៈ ដែលចិនកំពុងតែវាទទី ក្នុងតំបន់អាស៊ីប៉ាស៊ីហ្វិក វាគឺជាករណីកិច្ចរបស់ជប៉ុន ក្នុងការសហការ ជួយសម្ព័ន្ធមិត្ត ដើម្បីរក្សាសន្តិភាព និងស្ថិរភាពក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ