ឥណ្ឌូណេស៊ីបិទព្រលានយន្តហោះបាលីសាជាថ្មីដោយសារតែផ្សែងភ្នំភ្លើង
ការធ្វើដំណើរតាមផ្លូវអាកាស នៅតំបន់ទេសចរណ៍ ក្នុងប្រទេសឥណ្ឌូណេស៊ី ត្រូវជួបនឹងបញ្ហារអាក់រអួលសាជាថ្មីម្តងទៀត នៅថ្ងៃអាទិត្យនេះ ក្រោយពីអាជ្ញាធរសម្រេចផ្អាកដំណើរការព្រលានយន្តហោះនៅកោះបាលី ដោយសារតែមានការរំខានពីផ្សែងភ្នំភ្លើង។ អាជ្ញាធរបានបិទព្រលានយន្តហោះបាលីនេះទៅវិញ តែមួយថ្ងៃប៉ុណ្ណោះ ក្រោយពីបានបើកឲ្យដំណើរការ កាលពីថ្ងៃសៅរ៍ម្សិលមិញ ដើម្បីបើកផ្លូវឲ្យអ្នកទេសចរបរទេសធ្វើដំណើរត្រឡប់ទៅស្រុកគេវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
អស់រយៈពេលជាច្រើនសប្តាហ៍មកហើយ ដែលភ្នំភ្លើងនៅលើកោះជ្វា ប្រទេសឥណ្ឌូណេស៊ី បានផ្ទុះបញ្ចេញផ្សែងនិងផេះដេដាសទៅក្នុងបរិយាកាស ហើយចាប់ពីថ្ងៃព្រហស្បតិ៍សប្តាហ៍មុន ផ្សែងភ្នំភ្លើងដ៏ក្រាសឃ្មឹកនេះបានតម្រូវឲ្យអាជ្ញាធរឥណ្ឌូណេស៊ីបិទព្រលានយន្តហោះជាច្រើនកន្លែង ក្នុងនោះក៏មានព្រលានយន្តហោះនៅតំបន់ទេសចរណ៍នៅកោះបាលីផងដែរ ដែលជាហេតុធ្វើឲ្យអ្នកទេសចរបរទេសរាប់ពាន់នាក់ត្រូវជាប់គាំងដំណើរ។
កាលពីថ្ងៃសៅរ៍ម្សិលមិញ ព្រលានយន្តហោះនៅបាលីនេះ ត្រូវបានអាជ្ញាធរបើកឲ្យដំណើរការឡើងវិញ ដើម្បីបើកផ្លូវឲ្យអ្នកទេសចរធ្វើដំណើរចេញពីកោះបាលី។ ក៏ប៉ុន្តែ មិនដល់២៤ម៉ោងក្រោយមក អាជ្ញាធរក៏បានសម្រេចបិទព្រលានយន្តហោះនេះទៅវិញ ស្ទើរតែពេញមួយថ្ងៃអាទិត្យនេះ ដោយសារតែគេសង្កេតឃើញថា ខ្យល់បានប្តូរទិសដៅ ហើយបក់នាំផ្សែងភ្នំភ្លើងឲ្យត្រឡប់មកកាន់កោះបាលីវិញ។
មន្រ្តីអ្នកនាំពាក្យក្រសួងដឹកជញ្ជូនឥណ្ឌូណេស៊ីបានប្រាប់ទីភ្នាក់ងារព័ត៌មាន AFP ថា ព្រលានយន្តហោះបាលីបានចាប់ផ្តើមដំណើរការឡើងវិញ នៅល្ងាចថ្ងៃអាទិត្យ។
យោងតាមអ្នកជំនាញភ្នំភ្លើង គិតមកទល់នឹងថ្ងៃអាទិត្យនេះ ភ្នំភ្លើង Raung នៅលើកោះជ្វាប្រទេសឥណ្ឌូណេស៊ី នៅតែបន្តផ្ទុះ ដោយបញ្ចេញផ្សែងលាយផេះ រហូតទៅដល់រយៈកម្ពស់ប្រមាណជា ១ពាន់ម៉ែត្រ។ គួរបញ្ជាក់ថា ភ្នំភ្លើង Raung នេះ គឺជាភ្នំភ្លើងមួយ ក្នុងចំណោមភ្នំភ្លើងទាំង ១២៩ នៅក្នុងប្រទេសឥណ្ឌូណេស៊ី ដែលគេចាត់ទុកថាជាភ្នំភ្លើងសកម្ម អាចនឹងផ្ទុះឡើងនៅគ្រប់ពេល។
ផ្សែងភ្នំភ្លើង ដែលមានលាយផេះដ៏ក្រាសឃ្មឹក គឺជាគ្រោះថ្នាក់ដ៏ធំមួយចំពោះយន្តហោះ។ គេនៅចាំបានថា កាលពីឆ្នាំ១៩៨២ យន្តហោះធុនប៊ូអ៊ីង ៧៤៧ របស់ក្រុមហ៊ុន British Airways ត្រូវរលត់ម៉ាស៊ីនទាំង៤ នៅពេលហោះកាត់ផ្សែងភ្នំភ្លើងនៅឥណ្ឌូណេស៊ី។ ហេតុការណ៍ស្រដៀងគ្នានេះក៏បានកើតមានឡើងដែរ ទៅលើយន្តហោះធុនប៊ូអ៊ីង ៧៤៧ របស់ក្រុមហ៊ុនអាកាសចរណ៍ហូឡង់ នៅពេលហោះកាត់ផ្សែងភ្នំភ្លើងនៅរដ្ឋអាឡាស្កា សហរដ្ឋអាមេរិក។ ក៏ប៉ុន្តែ សំណាងល្អ នៅក្នុងហេតុការណ៍ទាំងពីរនេះ អ្នកបើកបរយន្តហោះសុទ្ធតែអាចបញ្ចៀសគ្រោះថ្នាក់ ហើយធ្វើការចុះចតយន្តហោះជាបន្ទាន់ប្រកបដោយជោគជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ