ចរាចរណ៍ផ្លូវអាកាសនៅអឺរ៉ុបជាប់គាំងដោយមកពីផេះភ្នំភ្លើង
ចរាចរណ៍ផ្លូវអាកាស នៅអឺរ៉ុបប៉ែកខាងជើង ត្រូវបានជាប់គាំងទាំងស្រុង ដោយបណ្តាលមកពីផេះភ្នំភ្លើង ដែលផ្ទុះនៅប្រទេសអ៊ីសឡង់ដ៍ (Islande)។ ជើងហោះហើររាប់ពាន់ត្រូវបានគេលុបចោល កាលពីថ្ងៃព្រហស្បតិ៍។ ព្រលានយន្តហោះរាប់សិបត្រូវបានបិទ។ ជើងហោះហើរពីបណ្តាប្រទេសនៅអាស៊ី មកអឺរ៉ុបក៏ត្រូវលុបចោលខ្លះដែរ។
ចុះផ្សាយនៅថ្ងៃ៖ កែប្រែថ្ងៃទី៖
គិតមកត្រឹមយប់ថ្ងៃព្រហស្បតិ៍ ម្សិលមិញនេះ ព្រលានយន្តហោះធំៗ នៅក្នុងប្រទេសអង់គ្លេស បារាំង អាឡឺម៉ង់ អៀរឡង់ ស៊ុយអែដ ហុឡង់ ប៊ែលហ្ស៊ិក ដាណឺម៉ាក និងប៉ូឡូញ ត្រូវបានបិទលែងឲ្យដំណើរការទាំងស្រុង។ រាល់ជើងហោះហើរឡើង និងចុះ នៅព្រលានយន្តហោះទាំងនេះ ត្រូវបានលុបចោលទាំងអស់។
ការបិទព្រលានយន្តហោះ នៅអឺរ៉ុប ក៏បានធ្វើឲ្យប៉ះពាល់ផងដែរ ដល់ការហោះហើរ នៅអាស៊ី។ ក្រុមហ៊ុនអាកាសចរណ៍អូស្រ្តាលី ជប៉ុន និងនូវែលហ្សេឡង់ បានប្រកាសលុបចោលរាល់ជើងហោះហើរទាំងអស់ទៅអឺរ៉ុប។ ជើងហោះហើរខ្លះរបស់ក្រុមហ៊ុនថៃ ម៉ាឡេស៊ី សិង្ហបុរី និងហុងកុង ក៏ត្រូវបានលុបចោលដែរ។
យោងតាមមន្រ្តីទទួលបន្ទុកសុវត្ថិភាពផ្លូវអាកាសរបស់អឺរ៉ុប ជើងហោះហើរចេញ និងចូលទៅអឺរ៉ុប នឹងត្រូវបន្តជាប់គាំងយ៉ាងតិចក៏២ថ្ងៃទៀតដែរ។
គួរបញ្ជាក់ថា ភ្នំភ្លើងដ៏ធំមួយបានផ្ទុះ កាលពីថ្ងៃពុធ នៅប្រទេសអ៊ីសឡង់ដ៍។ ផ្សែងដែលហុយចេញពីភ្នំភ្លើងនេះបានរសាត់ទៅពាសពេញអឺរ៉ុបប៉ែកខាងជើង។ រហូតមកទល់ពេលនេះ ភ្នំភ្លើងនេះ នៅតែបន្តផ្ទុះបង្ហុយផ្សែងទៅក្នុងបរិយាកាសតទៅទៀត។
ផ្សែងភ្នំភ្លើងនេះផ្តុំគ្នាជាពពកយ៉ាងក្រាស់ ស្ថិតនៅកំពស់ប្រមាណជា ១០ ទៅ១៥គីឡូម៉ែត្រ ដែលជារយៈកំពស់សម្រាប់ផ្លូវហោះហើរ។ ផ្សែងភ្នំភ្លើងដ៏ក្រាស់នេះអាចធ្វើឲ្យម៉ាស៊ីនយន្តហោះគាំងបាន។
គេនៅចាំបានថា កាលពីឆ្នាំ ១៩៨២ យន្តហោះរបស់ក្រុមហ៊ុន British Ariway និង Singapore Airway បានរលត់ម៉ាស៊ីនទាំងអស់ នៅពេលហោះចូលក្នុងផ្សែងភ្នំភ្លើង នៅឥណ្ឌូនេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ