ចិនលើកលែងទោសអ្នកទោសក្នុងឱកាសខួប ៧០ឆ្នំានៃការបញ្ចប់សង្រ្គាមលោកលើកទី២
នៅថ្ងៃទី២៩ សីហា រដ្ឋាភិបាលចិនបានសម្រេចលើកលែងទោសដល់អ្នកទោសជាច្រើនពាន់នាក់។ ការសម្រេចយ៉ាងដូចនេះរបស់ទីក្រុងប៉េកំាង គឺដើម្បីចូលរួមអបអរសាទរខួបគម្រប់ ៧០ឆ្នំានៃការចាញ់សង្រ្គាមលោកលើកទី២ របស់ប្រទេសជប៉ុនកាលពីឆ្នំា ១៩៤៥។ នាឱកាសនោះ ចិនក៏បានត្រៀមរៀបចំមហាក្បួនព្យុះហយាត្រាយោធានៅទីលានធានអាន់មេននាថ្ងៃទី៣ កញ្ញាខាងមុខដោយមានទាហានចូលរួមជាង ១០ ០០០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
វិធានការលើកលែងទោសអ្នកទោសចិនដែលគណៈកម្មាធិការនៃរដ្ឋសភាចិនទើបបានអនុម័តពេលនេះ គឺសំដៅជាពិសេសលើអ្នកទោសដែលជាអតីតយុទ្ធជន អ្នកទោសមានវ័យចំណាស់ វ័យក្មេង ឬមួយក៏កំពុងមានជម្ងឺ នេះបើយោងតាមព័ត៌មានចុះផ្សាយដោយកាសែតចិនស៊ីនហួរ។ កាសែតស៊ីនហួរដែលបានស្រង់ព័ត៌មានពីប្រភពតុលាការបានឲ្យដឹងទៀតថា មានអ្នកទោសជាច្រើនពាន់នាក់ដែលនឹងត្រូវលើកលែងទោស ហើយក្នុងចំណោមអ្នកទោសដែលមានវ័យចំណាស់ជាងគេមានអាយុ ៩៥ឆ្នំា។
យោងតាមកាសែតស៊ីនហួរដដែល មានទោសឧក្រិដ្ឋចំនួន ៤ប្រភេទដែលរដ្ឋាភិបាលចិនចាត់ទុកថា លែងជាការគំរាមកំហែងចំពោះសង្គមជាតិទៀតឡើយ ក្នុងនោះមានក្រុមទាហានជើងចាស់ដែលបានទទួលទោសនៅក្នុងសម័យសង្រ្គាមប្រឆំាងជប៉ុន និងនៅក្នុងសម័យសង្រ្គាមស៊ីវិលក្នុងប្រទេសចិនដែលបានបញ្ចប់ក្នុងឆ្នំា ១៩៤៩ ព្រមទំាងក្រុមអតីតយុទ្ធជនផ្សេងទៀត។
ដោយឡែក អ្នកទោសណាដែលជាប់ចោទពីបទឧក្រិដ្ឋធ្ងន់ធ្ងរ ដូចយ៉ាងលួចលុយរដ្ឋ ស៊ីសំណូកសូកប៉ាន់ ភេរវនិយម ឬមួយក៏ឧក្រិដ្ឋកម្មរៀបចំទុកមុននឹងមិនជាប់ពាក់ព័ន្ធនឹងវិធានការលើកលែងទោសនោះទេ។ តែអ្នកទោសជាឧក្រិដ្ឋជនដែលមានអាយុចាប់ពី ៧៥ឆ្នំាឡើង និងអ្នកពិការដងខ្លួនធ្ងន់ធ្ងរដែលមិនអាចព្យាបាលដោយខ្លួនឯងបានក៏រាប់បញ្ចូលនៅក្នុងអ្នកទោសដែលត្រូវលើកលែងទោសដែរ។ ទន្ទឹមគ្នានេះ វិធានការលើកលែងទោសនេះក៏ទាក់ទងចំពោះអ្នកទោសដែលបទឧក្រិដ្ឋរបស់ពួកគេបានប្រព្រឹត្តិឡើងនៅពេលមានអាយុ ១៨ឆ្នំា និងដែលទទួលទោសជាប់គុកច្រើនបំផុត ៣ឆ្នំា ឬមួយក៏ការអនុវត្តន៍របស់ពួកគេនៅសល់តិចជាង ១ឆ្នំា។
តំាងពីការបង្កើតរបបសាធារណរដ្ឋប្រជាមានិតចិនក្នុងឆ្នំា ១៩៤៩ មក នេះជាលើកទី៨ ដែលចិនបានអនុវត្តន៍នូវវិធានការលើកលែងទោស។ ដោយឡែក និងក្រៅពីវិធានការលើកលែងទោស ចិនក៏ត្រៀមរៀបចំផងដែរនូវមហាក្បួនព្យុះហយាត្រាមួយនៅទីលានធានអាន់មេន ក្រុងប៉េកំាងនាថ្ងៃទី៣ កញ្ញាខាងមុខ ដោយមានទាហានចូលរួមចំនួន ១២ ០០០នាក់ និងបញ្ចេញយន្តហោះចម្បំាងនៅលើអាកាសចំនួន ២០០គ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ