ចិនព្រមានអាមេរិកកុំឲ្យលូកដៃជ្រៅពេកក្នុងសំណុំរឿងសមុទ្រចិនខាងត្បូង
នៅថ្ងៃព្រហស្បតិ៍ ទី៣១ មីនា ក្រសួងការពារជាតិចិនបានចេញមុខព្រមានអាមេរិកឲ្យប្រយ័ត្នប្រយែងក្នុងសំណុំរឿងសមុទ្រចិនខាងត្បូងដែលចិនកំពុងមានជម្លោះជាមួយបណ្តាប្រទេសសមាជិកអាស៊ានមួយចំនួន។ តែអាមេរិកហាក់ដូចជាបានជួយឈឺឆ្អាលកាន់តែខ្លាំងនារយៈពេលចុងក្រោយនេះ។ ដោយនិយាយមិនលាក់កំបាំង ក្រសួងការពារជាតិចិនបានបរិហារចំៗលើកិច្ចព្រមព្រៀងយោធាដែលអាមេរិក និងហ្វីលីពីនទើបបានចុះហត្ថលេខានាពេលថ្មីៗកន្លងទៅ។
ចុះផ្សាយនៅថ្ងៃ៖
ស្តាប់ - ០១:៥៧
កិច្ចព្រមព្រៀងយោធាដែលអាមេរិក និងហ្វីលីពីនទើបបានចុះហត្ថលេខាក្នុងខែមីនាកន្លងទៅ គឺទាក់ទងនឹងការដែលហ្វីលីពីនបានអនុញ្ញាតឲ្យទាហានអាមរិកាំងបោះទីតាំងនៅលើមូលដ្ឋានយោធាហ្វីលីពីនចំនួន ៥កន្លែង និងដែលមានមូលដ្ឋានយោធាខ្លះស្ថិតនៅមិនឆ្ងាយប៉ុន្មានពីសមុទ្រចិនខាងត្បូង។ សមុទ្រចិនខាងត្បូងដែលជាប្រភពជម្លោះរវាងចិន និងហ្វីលីពីន ព្រមទាំងរវាងចិនជាមួយប្រទេសអាស៊ីផ្សេងទៀត មានវៀតណាម ម៉ាឡេស៊ី តៃវ៉ាន់ និងប្រទេសព្រុយណេ។ ប៉េកាំងធ្លាប់បានបញ្ជាក់ម្តងជាពីរដងថា សមុទ្រចិចខាងត្បូងទាំងមូលជាកម្មសិទ្ធីរបស់ខ្លួនដែលគ្មាននរណាអាចប៉ះពាល់បាន។
តែកន្លងមក និងក្រៅពីប្រទេសជាប់ជម្លោះផ្ទាល់ជាមួយចិន ក៏មានប្រទេសខ្លះចូលខ្លួនជួយឈឺឆ្អាលប្រឆាំងនឹងចិនដែរ ពិសេសគឺអាមេរិក។ នារយៈពេលចុងក្រោយនេះ អាមេរិកបានបញ្ជូននាវាចម្បាំងរបស់ខ្លួនទៅកាន់ក្បែរទីប្រជុំកោះកាន់កាប់ដោយចិនក្នុងសមុទ្រចិនខាងត្បូងដោយលើកយកហេតុផលថា ដើម្បីការពារសេរីភាពចរាចរណ៍ផ្លូវសមុទ្រដែលជាដែនសមុទ្រអន្តរជាតិ។ ទង្វើរបៀបនេះរបស់វ៉ាស៊ីនតោនគឺជាសារបញ្ជូនប្រាប់ប៉េកាំងថា ដែនសមុទ្រចិនខាងត្បូងជារបស់សមូហភាពដែលមិនមែនជាកម្មសិទ្ធិផ្តាច់មុខរបស់ប្រទេសណាមួយទេ។
ទាក់ទងនឹងវត្តមាននាវាចម្បាំងអាមេរិកក្នុងតំបន់ថ្មីៗនេះត្រូវបានអ្នកនាំពាក្យក្រសួងការពារជាតិចិនលោកយ៉ាង យូយ៉ុនថ្លៃងថា លោកបានត្រឹមទូន្មានអាមេរិកឲ្យមានការប្រយ័ត្នប្រយែង និងកុំសូវលូកដៃជ្រៅពេកនៅក្នុងបញ្ហាសមុទ្រចិនខាងត្បូងនេះ។ ចំណែកការពង្រឹងសម្ព័ន្ធយោធារវាងហ្វីលីពីន និងអាមេរិកវិញត្រូវបានលោកយ៉ាង យូយ៉ុនចាត់ទុកជាការឆ្លុះបញ្ចាំងនៃចិត្តគំនិតសង្គ្រាមត្រជាក់។
សូមជម្រាបជូនថា អាមេរិកតែងតែបរិហារចិនពីការពង្រីកមហិច្ឆតាយោធានៅក្នុងសមុទ្រចិនខាងត្បូងតាមរយៈការសាងសង់កោះសិប្បនិមិត្ម ព្រលានយន្តហោះ និងការដាក់ពង្រាយគ្រឿងសព្វាវុធ។ តែចិនបានឆ្លើយបដិសេធ និងបានចោទអាមេរិកវិញថា ជាអ្នកបង្កឲ្យមានភាពតានតឹងកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ