មេដឹកនាំចិន-ជប៉ុន-កូរ៉េខាងត្បូងបើកធ្វើជំនួបកំពូលត្រីភាគីដ៏កម្រ
មេដឹកនាំចិន ជប៉ុន និងកូរ៉េខាងត្បូង បានបើកធ្វើជំនួបកំពូលត្រីភាគី នៅថ្ងៃអាទិត្យនេះ នៅក្នុងទីក្រុងសេអ៊ូល។ ជំនួបកំពូលត្រីភាគី ដែលប្រទេសទាំងបីធ្លាប់រៀបចំធ្វើជារៀងរាល់ឆ្នាំ ក៏ប៉ុន្តែ ត្រូវជាប់គាំងតាំងពីឆ្នាំ២០១២ ក្រោយពីលោកស្ហ៊ីនហ្សូ អាបេ និងគណបក្សអភិរក្សនិយមឡើងកាន់អំណាចនៅជប៉ុន។ តាមរយៈជំនួបកំពូលនៅថ្ងៃអាទិត្យនេះ មេដឹកនាំប្រទេសទាំងបីបានប្រកាសថា ទំនាក់ទំនងត្រូវបានស្តារឡើងវិញយ៉ាងពេញលេញ។
ចុះផ្សាយនៅថ្ងៃ៖
ស្តាប់ - ០១:៤០
នៅក្នុងជំនួបកំពូលនៅថ្ងៃអាទិត្យនេះ លោកស្រីប៉ាក់ គុនហេ ប្រធានាធិបតីកូរ៉េខាងត្បូង លោកលី ខឺឈាំង នាយករដ្ឋមន្រ្តីចិន និងលោកស្ហ៊ីនហ្សូ អាបេ នាយករដ្ឋមន្រ្តីជប៉ុន បានផ្តោតទៅលើប្រធានបទដ៏សំខាន់មួយ គឺទំនាក់ទំនងផ្នែកសេដ្ឋកិច្ច និងពាណិជ្ជកម្ម ដែលជាចំណងដ៏សំខាន់មួយតែងតែចងទំនាក់ទំនងប្រទេសទាំងបី មិនឲ្យដាច់ទាំងស្រុង បើទោះបីជាត្រូវប្រឈមមុខនឹងភាពតានតឹងខ្លាំងយ៉ាងណាក៏ដោយ។ ក្រៅពីបញ្ហាសេដ្ឋកិច្ចនេះ មេដឹកនាំទាំងបីក៏បានជជែកគ្នាផងដែរ អំពីសំណុំរឿងនុយក្លេអ៊ែរកូរ៉េខាងជើង ដែលនៅតែជាបញ្ហាចោទ នៅក្នុងតំបន់។
នៅទីចុងបញ្ចប់នៃជំនួបកំពូល មេដឹកនាំប្រទេសទាំងបីមិនបានចុះកិច្ចព្រមព្រៀងនៅក្នុងវិស័យណាមួយនោះទេ ក៏ប៉ុន្តែ ទោះជាយ៉ាងណា ជំនួបកំពូលថ្ងៃនេះគឺជានិមិត្តរូបដ៏សំខាន់មួយ នៃការបន្ធូរបន្ថយភាពតានតឹង ដែលបានបំពុលទំនាក់ទំនងក្នុងតំបន់ តាំងពីចុងឆ្នាំ២០១២មក គឺតាំងពីពេលដែលលោកស្ហ៊ីនហ្សូ អាបេ បានឡើងកាន់អំណាចនៅជប៉ុន ហើយបានដាក់ចេញនូវនយោបាយជាតិនិយម ដែលធ្វើឲ្យប៉ះពាល់ទៅដល់ស្នាមរបួសចាស់របស់ចិន និងកូរ៉េខាងត្បូង ដែលសុទ្ធសឹងជាប្រទេសធ្លាប់រងគ្រោះដោយសារនយោបាយវាតទីនិយមរបស់ជប៉ុន កាលពីសម័យសង្រ្គាម។
ក្រៅពីជំនួបកំពូលត្រីភាគី នៅថ្ងៃអាទិត្យនេះ ជំហានជាវិជ្ជមានមួយទៀតនៃការបន្ធូរបន្ថយភាពតានតឹងនៅក្នុងតំបន់ គឺជំនួបកំពូលទ្វេភាគី រវាងលោកស្រីប៉ាក់ គុនហេ និងលោកស្ហ៊ីនហ្សូ អាបេ នៅថ្ងៃចន្ទស្អែក។
គួររំឭកឡើងវិញថា ចាប់តាំងពីបានឡើងកាន់តំណែងជាប្រធានាធិបតីកូរ៉េខាងត្បូង កាលពីឆ្នាំ២០១៣ លោកស្រីប៉ាក់ គុនហេ តែងតែបដិសេធមិនព្រមជួបជាមួយលោកស្ហ៊ីនហ្សូ អាបេនោះទេ។ ទំនាស់ រវាងប្រទេសទាំងពីរនេះ ដែលសុទ្ធសឹងជាសម្ព័ន្ធមិត្តដ៏សំខាន់បំផុតរបស់អាមេរិក ក្នុងតំបន់អាស៊ី គឺជាបញ្ហាឈឺក្បាលដ៏ធំមួយ សម្រាប់លោកអូបាម៉ា ដែលបានកំណត់យកតំបន់អាស៊ី ជាអាទិភាពធំបំផុត នៅក្នុងនយោបាយការបរទេសរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ