ភូមា៖រដ្ឋាភិបាលបានបញ្ជាក់ពីហេតុផលនៃការប្រើកម្លំាងបាយបង្រ្កាបលើក្រុមបាតុករ
នៅប្រទេសភូមា មួយថ្ងៃ ក្រោយពីមានការវាយបង្រ្កាបលើហ្វូងបាតុករសិស្សនិស្សិត និងកម្មករមក រដ្ឋាភិបាលបានបញ្ជាក់នៅថ្ងៃសុក្រ ទី៦ មីនាពីហេតុផលត្រឹមត្រូវដែលខ្លួនបានប្រើកម្លំាងបាយ។ គួររម្លឹកជូនថា អស់ជាច្រើនសប្តាហ៍មកហើយដែលសិស្សនិស្សិតបាននំាគ្នាចុះផ្លូវធ្វើបាតុកម្មប្រឆំាងនឹងកំណែទម្រង់ប្រព័ន្ធអប់រំដែលពួកគេចាត់ទុកថា គ្មានលក្ខណៈប្រជាធិបតេយ្យ។ ក្បួនបាតុកម្មរបស់សិស្សនិស្សិតដែលបានចូលរួមជួយគំាទ្រពីកម្លំាងកម្មកររាប់រយនាក់ត្រូវបានកម្លំាងប៉ូលិសវាយបង្រ្កាបយ៉ាងចាស់ដៃដោយបណ្តាលឲ្យរបួស និងចាប់ខ្លួនជាច្រើននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
រដ្ឋាភិបាលទីក្រុងណៃពីដ៏បានលើកយកហេតុផលមកពន្យល់ថា ការដែលក្រុមប៉ូលិសបានបើកការវាយបង្រ្កាបលើហ្វូងបាតុករក៏ដោយសារតែពួកគេបានប្រើអំពើហិង្សាដាក់ប៉ូលិសមុន។ តែក្រុមបាតុករបានឆ្លើយតបវិញថា ក្បួនបាតុកម្មរបស់ពួកគេជាក្បួនបាតុកម្មអហិង្សា តែគឺក្រុមប៉ូលិសទេដែលបានបញ្ចេញប្រតិកម្មហិង្សាមុនគេ។ ប្រមុខម្នាក់នៃចលនានិស្សិតឈ្មោះចលនាជំនាន់ ៨៨ ដែលប៉ូលិសទើបបានដោះលែងវិញនៅថ្ងៃសុក្រ ទី៦ មីនាបានបញ្ជាក់ថា ទង្វើវាយបង្រ្កាបរបស់ប៉ូលិស ជាទង្វើជ្រុលហួសហេតុដែលមិនអាចទទួលយកបានទេ។ ទន្ទឹមនឹងការដោះលែងរូបប្រមុខចលនានិស្សិតឈ្មោះចលនាជំនាន់ ៨៨ នោះ ប៉ូលិសក៏បានចាប់ខ្លួននិស្សិត ៥នាក់ទៀតនៅប៉ែកកណ្តាលប្រទេស។
ដោយឡែក និងក្រៅពីការចាប់ខ្លួនបាតុករសិស្សនិស្សិត ប៉ូលិសក៏បានចាប់ខ្លួនបាតុករជាកម្មករកាត់ដេរចំនួន ១៤នាក់ដែលបានចូលរួមធ្វើបាតុកម្មសម្តែងសាមគ្គីភាពជាមួយបាតុករសិស្សនិស្សិត។ បើយោងតាមកាសែតផ្លូវការ កម្មករកាត់ដេរទំាង ១៤នាក់អាចនឹងជាប់ចោទពីបទបំបះបំបោរ និងដែលម្នាក់ៗអាចទទួលទោសជាប់គុកដល់ទៅ ២ឆ្នំា ព្រមទំាងបង់ប្រាក់ពិន័យទៀត។ គួររម្លឹកជូនថា អស់ជាច្រើនសប្តាហ៍មកហើយដែលសិស្សនិស្សិតភូមាបាននំាគ្នាចុះផ្លូវធ្វើបាតុកម្មប្រឆំាងនឹងកំណែទម្រង់ប្រព័ន្ធអប់រំដែលពួកគេចាត់ទុកថា គ្មានលក្ខណៈប្រជាធិបតេយ្យ។ ពួកគេបានទាមទារជាពិសេសឲ្យបង្កើតក្រុមសហជីពសិស្សនិស្សិត និងដាក់បញ្ចូលភាសាជនជាតិភាគតិចទៅក្នុងកម្មវិធីសិក្សា។
ចលនាបះបោររបស់សិស្សនិស្សិតភូមាពេលនេះបានកើតមានឡើង ចំពេលការបោះឆ្នោតសភាកាន់តែខិតជិតមកដល់នៅចុងឆ្នំា ២០១៥ នេះ និងដែលរដ្ឋាភិបាលភូមាកំពុងស្ថិតក្រោមសម្ពាធរបស់សហគមន៍អន្តរជាតិយ៉ាងខ្លំាង។ សូមជម្រាបជូនថា តំាងពីភូមាបានបិទបញ្ចប់របបសឹកក្នុងឆ្នំា ២០១១ មក រដ្ឋាភិបាលស៊ីវិលបានធ្វើ និងកំពុងបន្តធ្វើកំណែទម្រង់ច្រើនណាស់ តែក្រុមអ្នកសង្កេតការណ៍បស្ចិមលោកក៏កំពុងបារម្ភពីដំណើរវិលថយក្រោយរបស់ភូមាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ