អគ្គមគ្គុទេសក៍កូរ៉េខាងជើងនឹងបំពេញទស្សនកិច្ចនៅរុស្ស៊ី
គោលដៅចម្បងនៃទស្សនកិច្ចលោក គីម ជុងអ៊ុន នៅក្រុងម៉ូស្គូ នៅខែឧសភា ខាងមុខ តាមដែលវិមានក្រេមឡាំងបានប្រកាសថ្ងៃ២៨មករានេះ គឺដើម្បីចូលរួមក្នុងពិធីរំលឹក ខួបទី៧០ នៃ មហាជ័យជំនះលើរបបហ្វាស៊ីស្តអាល្លឺម៉ង់ ដណ្តើមបានដោយ សហភាពសូវៀត ក្នុងមហាសង្គ្រាមការពារមាតុភូមិពីឆ្នាំ១៩៤១ ដល់ ១៩៤៥។ គឺជាលើកទី១ ដែល លោក គីម ជុងអ៊ុន នឹងធ្វើដំណើរចេញទៅបរទេស គិតពីឆ្នាំ២០១១មក ឆ្នាំដែលគាត់បានឡើងកាន់ តំណែងកំពូល ដោយស្នងអំណាចពីបិតាគាត់ លោក គីម ជុងអ៊ិល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ពិធីដ៏មហោឡារឹក ឧទ្ទិសដល់ជ័យជំនះនេះ នឹងប្រព្រឹត្តទៅ នៅថ្ងៃទី៩ឧសភាឆ្នាំ២០១៥ ដែលជាកាលបរិច្ឆេទខួបគម្រប់៧០ឆ្នាំគត់ គិតពីថ្ងៃ៩ឧសភាឆ្នាំ១៩៤៥ ពេលដែលមេទ័ពរបបហ្វាស៊ីស្តហ៊ីត្លែរ បានចុះហត្ថលេខាសុំចុះចាញ់នៅពីមុខមេទ័ពសូវៀត ខ័ណ្ឌបញ្ចប់សង្គ្រាមលោកលើកទី២ នៅទ្វីបអឺរ៉ុប ចំណែកនៅទ្វីបអាស៊ីវិញ សង្គ្រាមនេះ បានចប់ជាស្រេចបាច់ គឺ លុះនៅថ្ងៃទី២កញ្ញាឆ្នាំ១៩៤៥នោះឯង ដោយការចុះហត្ថលេខាសុំចុះចាញ់នៃមេទ័ពជប៉ុន។
ថ្នាក់ដឹកនាំរុស្ស៊ី ប្រទេសដែលបន្តកេរ្ត៏ពីសហភាពសូវៀត បានផ្ញើលិខិតអញ្ជើញ ទៅកាន់ ប្រមុខរដ្ឋ ប្រមុខរដ្ឋាភិបាល បណ្តាប្រទេសដែលបានពាក់ព័ន្ធនឹងសង្គ្រាមដ៏សែនវិនាសនេះ ឲ្យមកវត្តមានអបអរសាទរនៅរដ្ឋធានីរុស្ស៊ី។
ក្នុងបទសម្ភាសន៍ទៅទីភ្នាក់ងារព័ត៌មានកូរ៉េខាងត្បូង Renhap អ្នកនាំពាក្យផ្លូវការរបស់ ប្រធានាធិបតីរុស្ស៊ី លោក Dmitri Peskov បានឲ្យដឹងថា មានមេដឹកនាំ២០ប្រទេសទៅហើយ បានបញ្ជាក់ថា គេនឹងវត្តមានដោយផ្ទាល់ ក្នុងពិធីបុណ្យនៅម៉ូស្គូ ពីក្នុងនោះ មានជាអាទិ៍ គឺ អគ្គមគ្គុទេសក៍កូរ៉េខាងជើង លោក គីម ជុងអ៊ុន។
កាសែតរុស្ស៊ីដោយចុះផ្សាយដំណឹងនេះ កត់សម្គាល់ថា គឺជាលើកទី១ ដែល លោក គីម ជុងអ៊ុន នឹងធ្វើទស្សនកិច្ចនៅបរទេសគិតពីឆ្នាំ២០១១មក ឆ្នាំដែលគាត់បាន ស្នងតំណែងកំពូលពីបិតាគាត់លោក គីម ជុងអ៊ិល ដែលបានទទួលអនិច្ចកម្មក្នុងឆ្នាំនោះឯង។
គួររំលឹកថា លោក គីម ជុងអ៊ិល ជាឳពុក កាលគាត់នៅកាន់អំណាច តាមសេចក្តីអញ្ជើញនៃ លោកប្រធានាធិបតីរុស្ស៊ីពូទីន ធ្លាប់បានបំពេញទស្សនកិច្ចរយៈពេលយ៉ាងយូរ ដល់ទៅ២៤ថ្ងៃ នៅរុស្ស៊ី ក្នុងខែកក្កដា-សីហាឆ្នាំ២០០១ ដោយជិះក្នុងរថភ្លើងក្រោះរបស់គាត់ សម្រាប់ធានាសុវត្ថិភាពដល់រូបគាត់ ដែលបានបើកតាមខ្សែផ្លូវដែក ឆ្លងកាត់តំបន់ស៊ីបេរីទាំងមូល ដ្បិតគាត់ តែងខ្លាចមិនហ៊ានជិះយន្តហោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ