ចិនសន្យាបន្តកំណែទម្រង់ និងធ្វើអោយកំណើនសេដ្ឋកិច្ចមានលំនឹង ក្នុងឆ្នាំ២០១៨
ចិនបានបើកសន្និសីទសេដ្ឋកិច្ចប្រចាំឆ្នាំ ដោយមានវត្តមានថ្នាក់ដឹកនាំសំខាន់ៗក្នុងប្រទេសចូលរួម។ រដ្ឋាភិបាលចិនបានសន្យាថា នឹងបន្តធ្វើកំណែទម្រង់នៅឆ្នាំ២០១៨ តទៅទៀត ហើយនឹងធ្វើការប្រុងប្រយ័ត្នក្នុងនយោបាយរូបិយវត្ថុ។
ចុះផ្សាយនៅថ្ងៃ៖
សារព័ត៌មានផ្លូវការចិន បានចុះផ្សាយនៅថ្ងៃពុធនេះថា ឆ្នាំ២០១៨ខាងមុខនេះ រដ្ឋាភិបាលប៉េកាំងនឹងបន្តកំណែទម្រង់តទៅទៀត ដោយធ្វើយ៉ាងណាអោយកំណើនសេដ្ឋកិច្ចមានលំនឹង។ ចិនលើកឡើងថា ការអភិវឌ្ឍសេដ្ឋកិច្ចរបស់ចិនបានឈានចូលយុគមួយថ្មី ហើយសេដ្ឋកិច្ចចិនបានឈានជើងពីដំណាក់កាលនៃកំណើនឆាប់រហ័ស មកដល់ដំណាក់កាលនៃការអភិវឌ្ឍប្រកបដោយគុណភាពខ្ពស់។
គិតត្រឹម៩ខែដើមឆ្នាំ២០១៧នេះ ផលិតផលសុរបជាតិក្នុងស្រុកចិនបានកើនឡើង៦,៩ភាគរយ ប្រៀបនឹងរយៈពេលដដែល ក្នុងឆ្នាំ២០១៦។ ដូច្នេះ សម្រាប់ឆ្នាំ២០១៧ទាំងមូល រដ្ឋចិនអាចនឹងសម្រេចទិសដៅហួសពីគម្រោងខ្លួន ដែលចង់អោយភាគរយផលិតផលសុរបជាតិក្នុងស្រុកមាន៦,៥ភាគរយ។ ផលវិជ្ជមាននេះគឺបានមកពីការនាំចេញក្រៅស្រុក និងចំណាយសាធារណៈ។
ក្នុងគំរោងបន្តកំណែទម្រង់សេដ្ឋកិច្ចនៅឆ្នាំ២០១៨ខាងមុខ ចិនគ្រោងកាត់បន្ថយការប្រថុយប្រថានពាក់ព័ន្ធនឹងបំណុល គឺធ្វើយ៉ាងណាត្រូវចៀសវៀងកំណើនបំណុលតែម្តង។ យោងតាមធនាគារអន្តរជាតិមួយហៅកាត់ថា BRI ឆ្នាំ២០១៧នេះ ចិនមានធ្វើការគ្រប់គ្រងបំណុលខ្លួនបានល្អ។
ដោយឡែក ក្នុងសន្និសីទសេដ្ឋកិច្ចប្រចាំឆ្នាំ អ្នកចូលរួមមិនបានលើកឡើងពីទិសដៅបន្ថយបំណុលសហគ្រាសទេ តែក្រុមជំនាញលើកឡើងថា ការកាត់បន្ថយបំណុលសហគ្រាសនេះ វានៅតែស្ថិតក្នុងយុទ្ធសាស្ត្រកំណែទម្រង់របស់រដ្ឋចិនតែដដែលហ្នឹង។ ក្រៅពីបំណុល រដ្ឋចិនក៏គ្រោងរក្សាលំនឹងទីផ្សារអចលនទ្រព្យផងដែរ។ ប៉ុន្មានឆ្នាំចុងក្រោយេនះ តម្លៃអចលនទ្រព្យបានឡើងរហ័សគួរកត់សម្គាល់ ប៉ុន្តែឆ្នាំ២០១៧នេះ តម្លៃអចលនទ្រព្យមិនឡើងរហ័សដូចមុនទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ