អ.ស.ប.៖កូរ៉េខាងជើងបានប្រើប្រាស់បណ្តាញបរទេសលួចលាក់ដើម្បីគេចពីទ័ណ្ឌកម្មអន្តរជាតិ
នៅថ្ងៃសុក្រ ទី២៤ កុម្ភៈ អង្គការសហប្រជាជាតិបានផ្សព្វផ្សាយរបាយការណ៍មួយស្តីពីស្ថានការណ៍នៅកូរ៉េខាងជើង។ របាយការណ៍ដែលមានកម្រាស់ ១០០ទំព័របានបង្ហាញថា របបកុម្មុយនិស្តក្រុងព្យុងយ៉ាងបានប្រើប្រាស់បណ្តាញអន្តរជាតិមួយចំនួនដើម្បីបន្តសកម្មភាពពាណិជ្ជកម្ម ធនាគារដោយលួចលាក់គេចពីទ័ណ្ឌកម្មអន្តរជាតិ។ ទន្ទឹមគ្នានេះ របាយការណ៍បានដាក់ចេញនូវអនុសាសន៍មួយចំនួនដើម្បីរឹតបន្តឹងទ័ណ្ឌកម្មលើកូរ៉េខាងជើងក្នុងសំណុំរឿងនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ពិតជារបាយការណ៍មួយដែលបានធ្វើឲ្យគ្រប់គ្នាភ្ញាក់ផ្អើល និងនឹកស្មានមិនដល់ទាល់តែសោះ។ ភ្ញាក់ផ្អើល និងនឹកស្មានមិនដល់ព្រោះពិតមែនតែកូរ៉េខាងជើងបានជាប់ទ័ណ្ឌកម្មអន្តរជាតិជាច្រើនឆ្នាំដោយសារកម្មវិធីនុយក្លេអ៊ែរ និងគ្រាប់មីស៊ីលក៏ដោយ ក៏របបកុម្មុយនិស្តមួយនេះអាចបន្តរស់រានមានជីវិត និងបន្តផ្គើនសហគមន៍អន្តរជាតិតាមរយៈការសាកល្បងនុយក្លេអ៊ែរ ឬគ្រាប់មីស៊ីល។ តាមពិតទៅ និងបើផ្អែកតាមរបាយការណ៍កម្រាស់ ១០០ទំព័ររបស់អង្គការសហប្រជាជាតិឲ្យដឹងថា កូរ៉េខាងជើងបន្តធ្វើពាណិជ្ជកម្ម និងប្រើគណនីនៅបរទេសដោយប្រើបណ្តាញបច្ចេកវិទ្យាលួចលាក់តាមរយៈការជួយពីក្រុមហ៊ុនបរទេសមួយចំនួន។
យោងតាមរបាយការណ៍ រដ្ឋអំណាចកូរ៉េខាងជើងបានប្រើគ្រប់មធ្យោបាយដើម្បីរកចំណូលដោយគេចពីទ័ណ្ឌកម្មអន្តរជាតិ ពិសេសការទទួលយកការទូរទាត់ជាលុយសុទ្ធ ឬជាមាស ពោលចៀងវាងការផ្ទេរ និងបញ្ជូនលុយតាមប្រព័ន្ធធនាគារដែលមានការហាមឃាត់នៅក្នុងទ័ណ្ឌកម្ម។ ក្រុមអ្នកជំនាញដែលបានតាក់តែងរបាយការណ៍នេះឲ្យដឹងថា កូរ៉េខាងជើងបន្ត និងបង្កើនការនាំចេញរ៉ែគ្រប់ប្រភេទដែលជាប្រភពចំណូលយ៉ាងសំខាន់។ ដោយមិននិយាយចំឈ្មោះប្រទេស របាយការណ៍បានអះអាងថា មានក្រុមហ៊ុនបរទេសចំនួនពីរបានជួយកូរ៉េខាងជើងឲ្យបន្តធ្វើពាណិជ្ជកម្មដោយគេចពីទ័ណ្ឌកម្មអន្តរជាតិ។
របាយការណ៍បានយល់ឃើញថា ទ័ណ្ឌកម្មដាក់លើកូរ៉េខាងជើងនៅខ្សោយ និងនៅមិនទាន់គ្រប់គ្រាន់ទេ។ នៅក្នុងន័យនេះ របាយការណ៍បានចេញអនុសាសន៍ឲ្យរឹតបន្តឹងទ័ណ្ឌកម្ម និងទាមទារឲ្យគ្រប់ប្រទេសសមាជិកអង្គការសហប្រជាជាតិតាមឃ្លាំមើលលើសកម្មភាពមន្រ្តីការទូតកូរ៉េខាងជើងនៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ